وتكەندە الماتى قالاسىنداعى الماتى-2 تەمىر جول ستانساسىنداعى جەلىلىك پوليتسيا بولىمشەسىنىڭ قىزمەتكەرلەرى الماتى-2 تەمىر جول ۆوكزالىنان 27 كەلىدەن استام ماريحۋانا الىپ كەتىپ بارا جاتقان كۇدىكتىنى ۇستادى.

-تۇنگى ساعات 23:00 شاماسىندا تەكسەرىس بارىسىندا ەسىرتكى بيزنەسىنە قارسى كۇرەس جانە كريمينالدىق پوليتسيا توبىنىڭ قىزمەتكەرلەرى، پوليتسيا اعا لەيتەنانتى شالقار نۇرعازين مەن پوليتسيا سەرجانتى قوجاحان ماعجان ۆوكزال ماڭىنان كۇدىكتى ادامدى تەكسەرگەن كەزدە ونىڭ جول سومكەسىنەن ەرەكشە ءيىسى بار سكوتچپەن ورالعان پوليەتيلەن پاكەتتەر تابىلدى.

سوت ساراپتاماسىنىڭ قورىتىندىسىنا سايكەس، كۇدىكتى ادامنان تاركىلەنگەن زات 27 كگ 460 گرامم بولاتىن قۇرعاق ماريحۋانا بولىپ شىقتى. قازىر كۇدىكتى دەپ تانىلعان ەش جەردە جۇمىس ىستەمەيتىن جامبىل وبلىسى تۇرعىنىنىڭ ۇستىنەن قىلمىستىق كودەكستىڭ 296-بابى 4-ءبولىمى بويىنشا، ياعني اسا ءىرى مولشەردەگى ەسiرتكi, پسيحوتروپتىق زاتتاردى، سول تەكتەستەردى وتكىزۋ ماقساتىنسىز زاڭسىز دايىندادى جانە تاسىمالدادى دەگەن كۇدىكپەن ءىس قوزعالىپ، ول ۋاقىتشا تەرگەۋ اباقتىسىنا جابىلدى، – دەيدى الماتى -1 ستانساسىنداعى ىشكى ىستەر جەلىلىك باسقارماسى ەسىرتكى بيزنەسىنە قارسى ءبولىمىنىڭ باستىعى، پوليتسيا پودپولكوۆنيگى م.داحوۆ.

اتالعان ءبولىم قىزمەتكەرلەرى بيىلعى وتكەن 10 ايدا زاڭسىز ەسىرتكى اينالىمىنا قاتىستى 27 قۇقىق بۇزۋشىلىقتى انىقتاسا، ونىڭ 12-ءسى – جولاۋشى پويىزدارىندا ەسىرتكى زاتتارىن زاڭسىز تاسىمالداۋ جانە ساقتاۋ قىلمىستارى. ەسىرتكى زاتتارىنىڭ زاڭسىز اينالىمىنا قاتىستى 20 ادام قىلمىستىق جاۋاپكەرشىلىككە تارتىلعان.

الماتى-1 ستانساسى توعىز جولدىڭ تورابى بولعاندىقتان، كورشى ەلدەردەن ەسىرتكى تاسىمالداۋشىلاردىڭ ترانزيتتىك جولى ەكەنى انىق. وسىنداي ەسىرتكى تاسىمالداۋشىلاردىڭ جولىن كەسۋ ماقساتىندا اتالعان ءبولىم قىزمەتكەرلەرى جەدەل الدىن الۋ شارالارىن ءجيى وتكىزەدى. اتاپ ايتقاندا، جىل باسىنان بەرى الماتى-1 ستانساسىنداعى ءىىجب ەسىرتكى بيزنەسىنە قارسى كۇرەس ءبولىمىنىڭ كۇشىمەن زاڭسىز اينالىمنان 9 كەلىگە جۋىق ەسىرتكى زاتى الىنعان بولاتىن. وسى جولى تاركىلەنگەن 27 كەلى 460 گرامم ماريحۋانا – ءبولىم قىزمەتكەرلەرى جىل ىشىندە تاركىلەگەن ەڭ ۇلكەن كولەمدەگى ەسىرتكى. ەسىرتكى زاتىن تاسىمالداۋشىلاردى انىقتاۋعا قىزمەتتىك يتتەر دە كومەكتەسۋدە.

اباي اقپارات