اتىراۋ مۇناي وڭدەۋ زاۋىتىنىڭ كوكس جانە كۇكىرت ءوندىرىسىنىڭ باياۋ كوكستەۋ قوندىرعىسىنىڭ اقابا سۋلارىن تازارتۋ قۇرىلعىلارىندا جاڭا سۋ سالقىنداتقىش يمارات ىسكە قوسىلدى.

بۇل نىسان 2016-2020 جىلدارعا قۇرىلعان زاۋىتتى سۋمەن قامتۋ جانە سۋدى بۇرۋ جۇيەسىن جاڭارتىلۋىن جۇزەگە اسىرۋ جوسپارى اياسىندا سالىنىپ وتىر دەپ حابارلايدى اباي-اقپارات.

جاڭا يمارات تازارتىلعان سۋدى كوكس وندىرىسىندە قايتا پايدالانۋ كوەففيتسيەنتىن كوتەرۋگە، سونداي-اق سۋ بلوگىندا اينالىم سۋ شىعىنىن تومەندەتۋگە جانە مەحانيكالىق تازارتۋ قۇرىلعىلارى مەن اقابا سۋلاردىڭ بيولوگيالىق تازارتۋىن اتقاراتىن قوندىرعىعا تۇسەتىن سالماقتى ازايتۋعا مۇمكىندىك بەرەدى.

بۇرىن باياۋ كوكستەۋ قوندىرعىسىنىڭ اقابا سۋلارى كارىز جۇيەسىنە ءتۇسىپ، زاۋىتتىڭ تازارتۋ قۇرىلعىلارىنا جىبەرىلىپ، تولىق تازارتۋ تسيكلىنەن وتەتىن. ەندى جاڭا نىسان وندىرىستىك سۋ اعىزۋ كولەمىن جىلىنا 325 مىڭ تونناعا ازايتۋ، ال جايىق وزەنىنىڭ سۋىن قولدانۋ كولەمىن جىلىنا 500 مىڭ تونناعا دەيىن ازايتادى دەپ كۇتىلۋدە. ناتيجەسىندە، ەكونوميكالىق تيىمدىلىك جىلىنا 219 ميلليون تەڭگەنى قۇراماق.

جاڭا يماراتتىڭ نەگىزگى تەحنولوگيالىق جابدىعى قالىڭ جانە تات باسۋدان قورعايتىن جابىندىمەن (بمگ-350) وڭدەلىپ، جارىلىستان قورعايتىن ەكى ەلەكتر قوزعالتقىشتى سورعىمەن جابدىقتالعان.

جوبالىق كورسەتكىشتەرگە جەتۋ ماقساتىندا يماراتتىڭ تاجىريبەلىك-وندىرىستىك ءجۇرىسى جۇزەگە اسىرىلدى، سودان سوڭ جاڭا يمارات ءساتتى ىسكە قوسىلدى.

ايدار اسپانديار

Abai.kz