مەملەكەتتىك ايىپتاۋشى - پروكۋرور ارمان ورازباقوۆ بۇعان دەيىنگى سوتتا كيبيروۆتى اتالعان ايىپتار بويىنشا كىنالى دەپ تاۋىپ، 11 جىلعا سوتتاۋ جانە دۇنيە مۇلكىن تاركىلەۋ جازاسىن كەسۋدى سۇراعان. بىراق سۋديا بەينەگۇل كايسينا پروكۋرور سۇراعان جازادان از مەرزىم كەستى جانە جازاسىن جالپى رەجيمدەگى كولونيادا وتەۋگە ۇكىم شىعاردى.

شۋحرات كيبيروۆ وزىنە تاعىلعان ايىپتاردى مويىنداماعان. ادۆوكات نۇرپەيىسوۆ كيبيروۆ سوتتاعى سوڭعى سوزىندە ءوزىنىڭ "جازىقسىز" سوتتالىپ جاتقانىن ايتىپ، ءوزىن نە ءۇشىن سوتتاپ جاتقانىن سۇراعانىن، بىراق وعان ەشكىم جاۋاپ بەرە الماعانىن ايتتى. ادۆوكات سوت ۇكىمىنە شاعىمداناتىنىن جەتكىزدى.

- ءبىز ۇكىمگە مىندەتتى تۇردە شاعىمدانامىز. بىراق مەنىڭ ايتايىن دەگەنىم مىناۋ - قازىر يسلاموفوبيا قاتتى ۇلعايىپ بارادى. بۇل دەگەنىمىز ەندى ادامدى كەز-كەلگەن جاعدايدا تەرروريزم، ءدىني الاۋىزدىق تۋدىرۋ ايىپتارى بويىنشا نەگىزسىز سوتتاي بەرۋگە بولادى دەگەن ءسوز، - دەدى ادۆوكات نۇرپەيىسوۆ.

شۋحرات كيبيروۆكە تاعىلعان ايىپتارعا سەبەپ رەتىندە تەرگەۋشىلەر 2014 جىلى "ۆكونتاكتە" الەۋمەتتىك جەلىسىندەگى "اليم احمەتوۆ" اتتى اككاۋنت جاريالاعان اراب جانە شەشەن تىلىندەگى ءدىني اندەردى العان. مەملەكەتتىك ايىپتاۋشى ارمان ورازباقوۆ "ۆكونتاكتە" جەلىسىنە "اليم احمەتوۆ" دەگەن لوگينمەن كيبيروۆتىڭ تىركەلگەنىن", لوگيندى تىركەۋ ءۇشىن ول ءوزىنىڭ "موبيلدىك تەلەفونىن پايدالانعانىن" ايتتى. "ۆكونتاكتەدەگى" "اليم احمەتوۆتىڭ" پاراقشاسىندا ءتورت اراب جانە ءبىر شەشەن تىلىندەگى ناشيدتەردىڭ ء(دىني اندەردىڭ) اۋديوجازباسى جاريالانعان بولاتىن.

عالىم نۇرپەيىسوۆ ۇكىم ناشيدتەرگە ساراپتاما جاساعان ماماننىڭ قورىتىندىسىنا سۇيەنىپ شىعارىلعانىن ايتتى.

Abai.kz