27 قاراشادا الماتى قالاسىنىڭ ىشكى ىستەر دەپارتامەنتىمەن قر قك-ءنىڭ 256-بابىنىڭ 1-بولىگىندە قاراستىرىلعان (تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ) قىلمىس بەلگىلەرى بويىنشا سوتقا دەيىنگى تەرگەۋدىڭ بىرىڭعاي رەەسترىنە تىركەلگەن قىلمىستىق ءىس اياسىندا ءبىر توپ ادام ۇستالدى.

توپ جەتەكشىلەرى – ا.جۇماعۇلوۆ، و.ومىروۆ جانە ك.ابىشەۆتەرگە قاتىستى قاماۋعا الۋ تۇرىندەگى بۇلتارتپاۋ شاراسى تۋرالى شەشىم قابىلداندى.

تەرگەۋ بولجامى بويىنشا، اتالعان تۇلعالار تىركەلمەگەن قوعامدىق ۇيىم اتاۋىن جامىلىپ، الماتىدا قوعامدىق ءتارتىپتى بۇزۋعا، حالىقتى ۇرەيلەندىرۋگە، سونداي-اق قۇقىققورعاۋ ورگاندارىنىڭ  جۇمىسىنا ىرىتكى سالۋعا باعىتتالعان اكتسيا ازىرلەگەن.

وزدەرىنىڭ قىلمىستىق جوسپارلارىن ىسكە اسىرۋ ءۇشىن كۇدىكتىلەر ۇگىت-ناسيحات ماتەريالدارىن دايىنداپ، «قارۋلى دجيحاد» قۇرۋعا شاقىرعان بەينەۇندەۋ جازعان.

ءوزىنىڭ ءانونيمدى بەينەحابارلاماسىندا بەتپەردە كيگەن ازاماتتار، قازاقستاندا تىيىم سالىنعان «حيزب-ۋت-تاحرير» ءدىني-ەكسترەميستىك پارتياسىنىڭ سيمۆوليكاسى مەن قارۋلاردى قولعا العان كۇيى جاپپاي قۇقىققا قارسى ءىس-ارەكەتتەر جاساۋعا شاقىرعان.

ۇستالعانداردىڭ مەكەن-جايىن ءتىنتۋ كەزىندە اتالمىش روليك، ەلەكتروندى اقپارات تاسىعىشتار، سونداي-اق ءدىني ادەبيەتتەر تاركىلەنىپ، تەرگەۋ ماتەريالدارىنا تىركەلدى. ولار بويىنشا قاجەتتى ساراپتامالار تاعايىندالدى.

بۇدان باسقا، كۇدىكتىلەر وزىنە سىبايلاستار جيناپ، ءوز ءىس-ارەكەتتەرىنىڭ جازاسىزدىعىن قامتاماسىز ەتۋ ءۇشىن ءانونيمدى قوڭىراۋلار شالىپ، مەملەكەتتىك جانە قۇقىق قورعاۋ ورگاندارىنىڭ قىزمەتكەرلەرىنە جانە ولاردىڭ وتباسى مۇشەلەرىنە ءزابىر كورسەتۋ تۋرالى قوقان-لوققى كورسەتىلگەن بەينەروليكتەر جىبەرىپ، اكتسيالار وتكىزۋدى جوسپارلاعان.

تەرگەۋ بولجامدارىنىڭ ءبىرى بويىنشا، اتالمىش توپ قازاقستاندىق سوت تورەلىگىنەن شەتەلدە جاسىرىنىپ جۇرگەن قىلمىستىق ەلەمەنتتەردىڭ نۇسقاۋى بويىنشا ارەكەت ەتىپ وتىرعان

قازىرگى تاڭدا جۇماعۇلوۆ، ومىروۆ جانە ابىشەۆ الماتى قالاسىنىڭ ءىىد تەرگەۋ يزولياتورىنا قامالدى. سوتقا دەيىنگى تەرگەۋ اياسىندا قىلمىستىق توپتىڭ باسقا دا قاتىسۋشىلارىنا قاتىستى بۇلتارتپاۋ شاراسىن تاڭداۋ تۋرالى ماسەلەلەر شەشىلۋدە. ءىستىڭ ءمان-جايىن انىقتاۋعا ارنالعان تەرگەۋ امالدارى جۇرگىزىلۋدە.

تەرگەۋ مۇددەسىنە بايلانىستى وزگە اقپارات ازىرگە جاريالانبايدى.

 گۇلنار جامانقۇلوۆا

Abai.kz