استانا جاڭا جىلدىڭ شىرشاسىن تاۋەلسىزدىك كۇنىنەن كەيىن جاعادى. بۇل تۋرالى اكىم اسەت ورەنتايۇلىنىڭ ءوزى ايتتى.

ەلوردادا جەلتوقسانداعى مەرەكەگە وراي قالانى بەزەندىرۋ ءتارتىبى بەكىتىلدى. سوعان سايكەس جاڭا جىلعا دايىندىق تاۋەلسىزدىك كۇنىن مەرەكەلەگەننەن كەيىن باستالادى. قالالىق اكىمدىكتە وتكەن اپپارات جينىندا اكىم مىرزا وسىلاي دەپ  مالىمدەدى.

ەلوردادا مەملەكەتتىك جانە ۇلتتىق مەرەكەلەر – قازاقستان رەسپۋبليكاسىنىڭ تۇڭعىش پرەزيدەنتى كۇنىن، قازاقستان رەسپۋبليكاسىنىڭ تاۋەلسىزدىك كۇنىن جانە جاڭا جىلدى ەلوردانىڭ اۋماعىندا مەرەكەلەۋ اياسىندا قالانى بەزەندىرۋ تۋرالى استانا اكىمى اسەت يسەكەشەۆتىڭ تاپسىرماسىن ورىنداۋ ماقساتىندا جۇمىس جۇرگىزىلىپ جاتىر.

ال ەلىمىزدىڭ باستى مەرەكەسى - تاۋەلسىزدىك كۇنىنە ارنالعان بەزەندىرۋ جۇمىستارى 12 جەلتوقساندا باستالادى. اتاۋلى مەرەكە كەزىندە استانانى 1280 جالاۋ، 2 جالاۋشا پاننوسى، 64 ساياباق ەلەمەنتى جانە جارىق اسپانىڭ 1 جيىنتىعى ساندەيدى دەپ جوسپارلانىپ وتىر. سونداي-اق، وتان قورعاۋشىلار مونۋمەنتىندەگى سۋ بۇرقاقتاردىڭ ورنىنا جارىق ديودتى ينستالياتسيالار ورناتىلادى. جارىق فونتانى مەتالل كاركاسىنىڭ نەگىزىندە جاسالادى. كونسترۋكتسيانىڭ بيىكتىگى 3,5 مەتردى قۇرايدى. جارىقتاندىرۋ اق جانە كوك تۇستە بولادى.

جاڭا جىلعا دايىندىق تاۋەلسىزدىك كۇنىن مەرەكەلەگەننەن سوڭ عانا، ياعني 18 جەلتوقساندا باستالادى. ول ماقساتتا شاھاردا 25 جاڭا جىلدىق شىرشا، 12 حوككەي الاڭى، 15 مۇز ايدىنى، 10 مۇز تومپەشىگى، 2 مۇز قالاشىعى («Astana ەحPO-2017» ۇلتتىق كومپانياسى» اق اۋماعىندا جانە استانا قالالىق اكىمدىگى عيماراتى الدىنداعى الاڭدا) بوي كوتەرەدى. بۇعان قوسا 2 جارىق پاننوسى، 18 جارىق يلليۋميناتسياسى، 52 جارىق يلليۋميناتسيالىق اركاسى، 830 پانەل-كرونشتەين، 106 كسپ، 5 كوپىر مەن كولىك جولايرىعى ورناتىلاتىن بولادى. 3300 شاعىن جانە ورتا بيزنەس نىساندارىنىڭ قاسبەتى، 255 اعاش، 2 قالا ساياباعى مەن 1 گۇلزار بەزەندىرىلەدى.

كاسىپكەرلىك جانە ونەركاسىپ باسقارماسىنىڭ اقپاراتىنا سايكەس، شوب كاسىپكەرلىكتەرى ءوز ەركىمەن قالادا ەلۋدەن استام شىرشانى ورناتادى. ەلورداداعى «كەرۋەن»، «راحمەت»، «حان شاتىر»، «سارىارقا» سياقتى ويىن-ساۋىق ورتالىقتارى شىرشالاردى ورناتىپ، بەزەندىرۋ شارالارىن باستاپ كەتكەن.

ايتا كەتەيىك، سوڭعى ۋاقىتتا الەۋمەتتىك جەلىلەردە قالاداعى جەكەلەگەن نىسانداردىڭ جاڭا جىلعا دايىندىعى مەن تاۋەلسىزدىك كۇنىن ەلەۋسىز قالدىرعانىنا قاتىستى بىرقاتار پىكىرتالاس تۋىنداعان بولاتىن. وسىعان وراي استانا اكىمى ءوز ويىن ءبىلدىردى.

«جاڭا جىلدىق شىرشالاردى تاۋەلسىزدىك كۇنىن اتاپ وتكەن سوڭ، 18 جەلتوقساننان باستاپ ورناتامىز دەپ جوسپارلاعان ەدىك. كەيبىر جەكەلەگەن نىساندار شىرشا ورناتىپ، ونى بەزەندىرە باستادى. بۇعان قاتىستى نارازىلىق بىلدىرگەندەر بار. تاۋەلسىزدىك كۇنى ەلىمىزدىڭ باستى مەرەكەسى بولعاندىقتان، باسىمدىلىق سول مەرەكەگە بەرىلەدى. شاعىن جانە ورتا بيزنەس نىساندارى قالانىڭ مەرەكەلىك بەزەندىرۋىن قاتاڭ ۇستاناتىن بولسىن. تاۋەلسىزدىك كۇنىندە سالتاناتتى جانە مەرەكەلىك شارالار وتەدى. ونىڭ اراسىندا كاراتە-كيوكۋشينكايدان Kazakhstan Open, ۇستەل تەننيسىنەن «Seamaster 2017 ITTF World Tour GrandFinal» ءتۋرنيرى، «كۇي قاينارى» VI كۇي تارتىس، قر تاۋەلسىزدىك كۇنىنەن ارنالعان «تاۋەلسىزدىگىم – تەڭدىگىم، ەگەمەندىگىم – ەلدىگىم!» اتتى جاس اقىندار ايتىسى، كىتاپ كورمەسى مەن قازاقستاندىق ەسترادا وكىلدەرىنىڭ قاتىسۋىمەن ءداستۇرلى كونتسەرتتەر وتەدى»، - دەدى استانا اكىمى اسەت يسەكەشەۆ قالالىق اكىمدىكتە وتكەن اپپارات جينالىسىندا.

سونىمەن بىرگە، ەلوردا اكىمى اۋدان اكىمدەرى مەن كاسىپكەرلىك جانە ونەركاسىپ باسقارماسىنىڭ باسشىسىنا شاعىن جانە ورتا بيزنەس وكىلدەرىنە قالانى مەرەكەلىك بەزەندىرۋگە قاتىستى بەكىتىلگەن جوسپارىن ۇستانۋ تۋرالۋ تۇسىندىرمە جۇمىستارىن جۇرگىزۋگە تاپسىرما جۇكتەدى. ياعني، جاڭا جىلعا دايىندىق تاۋەلسىزدىك كۇنىن اتاپ وتكەننەن سوڭ عانا باستالادى.

Abai.kz