بۇل تۋرالى بۇگىن «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد ەلىمىزدىڭ دارىندى جاستارىن پارتيا قاتارىنا قابىلداۋ كەزىندە ايتتى.

قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي ۇيىمداستىرىلعان سالتاناتتى قابىلداۋ راسىمىندە عىلىم، ءبىلىم، ونەر، مادەنيەت، سپورت سياقتى ءار سالادا ەلىمىزدىڭ اتىن شىعارىپ جۇرگەن جاس ازاماتتارعا پارتيالىق بيلەتتەرى تابىس ەتىلدى. ولاردىڭ قاتارىندا بەلگىلى انشىلەر: تورەعالي تورەالى مەن ەركە ەسماحان، اۋىر اتلەتيكادان ريو وليمپياداسىنىڭ قولا جۇلدەگەرى كارينا گوريچەۆا، كاسىپقوي بوكستا ەل نامىسىن ابىرويمەن قورعاپ جۇرگەن جانات جاقيانوۆ سياقتى تانىمال جاستار بار.

پارتيا توراعاسىنىڭ ءبىرىنشى ورىنباسارى بۇگىنگى تاۋەلسىز قازاقستاننىڭ تولايىم تابىستارى مەن باعىندىرعان بيىكتەرى ەلباسىمىزدىڭ اتىمەن تىعىز بايلانىستى ەكەنىن ايتىپ ءوتتى. سونداي-اق، مۇحتار قۇل-مۇحاممەد ەل تاريحىنا نازار اۋدارىپ، بيىل 100 جىلدىعى اتالىپ ءوتىلىپ جاتقان الاش قوزعالىسى مەن قايراتكەرلەرى تۋرالى وي ءوربىتتى.

– جيىرماسىنشى عاسىر باسىندا پاتشالىق رەسەيدى مەكەندەگەن تۇركى حالىقتارى ىشىندە قازاق ۇلتىنىڭ وكىلدەرى بىلىمدارلىق، قايراتكەرلىك قابىلەتتەرىمەن ايرىقشا كوزگە ءتۇستى. الاشوردا ۇكىمەتىنىڭ توراعاسى بولعان ءاليحان بوكەيحان ماسكەۋ مەن پەتەربورداعى ورىس وقىمىستىلارى مەن دەموكراتيالىق باعىتتاعى قايراتكەرلەر اراسىندا ەرەكشە بەدەلگە يە بولدى. ورتالىق ازيا تاريحىندا جاريالانعان تۇڭعىش دەموكراتيالىق مەملەكەتتىك قۇرىلىم – تۇركىستان اۆتونومياسىن دا مۇحامەدجان تىنىشپاەۆ پەن مۇستافا شوقاي سياقتى الاش ارىستارى كەزەكتەسە باسقاردى. ءتىپتى بۇل اۆتونوميا كۇشپەن تاراتىلىپ، ونىڭ ورنىنا دۇنيەگە كەلگەن تۇركىستان كەڭەستىك رەسپۋبليكاسىنىڭ باسشىلىعىندا دا تۇرار رىسقۇلوۆ پەن ءنازىر تورەقۇلوۆ سياقتى قازاق قايراتكەرلەرى بولدى. ۇركەردەي جارقىراعان ءدال وسىنداي تالانتتار شوعىرىن سول كەزدەگى ورتا ازيانىڭ بىردە ءبىر ۇلتى شىعارا العان جوق. اتتەڭ، رەپرەسسيا زۇلماتى بولماسا الاش ارىستارى وسىدان ءبىر عاسىر بۇرىن-اق قازاق حالقىن الەمدىك وركەنيەت بيىگىنە شىعارار ەدى. بۇگىنگى ۇرپاق وسىنى ۇمىتپاۋى كەرەك. قازاقتىڭ وتكەن تاريحتا كەتكەن ەسەسىن جاڭا زاماننىڭ تالانتتى جاستارى تولىقتىرادى دەپ سەنەمىن، – دەدى مۇحتار قۇل-مۇحاممەد.

Abai.kz