استانا قالاسى جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىندا بۇگىن «3D-پروتەزدەۋ تەحنولوگيالارى» تاقىرىبىنا ارنالعان شارا ءوتتى دەپ حابارلايدى اباي اقپارات اگەنتتىگى.

كەزدەسۋ بارىسىندا كەلۋشىلەر نازارىنا 3D-پروتەزدەۋ تەحنولوگياسى تۋرالى بەينەروليك كورسەتىلىپ، جاڭا ءادىستىڭ مۇمكىنشىلىكتەرى مەن ەرەكشەلىكتەرى ەگجەي-تەگجەيلى ءتۇسىندىرىلدى. شاراعا مەديتسينالى-الەۋمەتتىك ساراپتاما ماماندارى، ۇكىمەتتىك ەمەس ۇيىمداردىڭ وكىلدەرى، پروتەزگە مۇقتاج مۇمكىندىگى شەكتەۋلى جاندار قاتىستى.

بۇگىنگى تاڭدا قر ەڭبەك جانە حالىقتى الەۋمەتتىك قورعاۋ مينيسترلىگىمەن جاسالعان مەملەكەتتىك تاپسىرىستى جۇزەگە اسىرۋدىڭ اياسىندا پروتەزدى-ورتوپەديالىق كومەكتى كورسەتۋمەن الەۋمەتتىك وڭالتۋدى دامىتۋدىڭ عىلىمي-تاجىريبەلىك ورتالىعى اينالىسادى. بۇل تۇرعىدا ورتالىق پروتەزدى-ورتوپەديالىق بۇيىمداردى جاڭا تەحنولوگيالار بويىنشا ازىرلەۋ جۇمىستارىن دا قولعا الىپتى. اعىمداعى جىلدىڭ تامىز ايىندا جاڭا ءادىس بويىنشا ەلىمىزدە العاش رەت اياققا ارنالعان پروتەز جاسالعان ەكەن.

«تامىزدا ءبىز الماتىلىق جاس جىگىت ءۇشىن جاڭا تەحنولوگيا بويىنشا پروتەز دايىندادىق. ءبىز وعان جاڭا سيراق پروتەزىن جاسادىق. 3D-تەحنولوگياسى بويىنشا جاسالعان پروتەزدىڭ گيلزاسى، قوندىرمالى قابى مەن كوسمەتيكالىق قاپتاماسى بولادى. بۇل – ءبىزدىڭ رەسپۋبليكاداعى العاش رەت جاسالعان وسىنداي پروتەز»، - دەپ مالىمدەدى الەۋمەتتىك وڭالتۋدى دامىتۋدىڭ عىلىمي-تاجىريبەلىك ورتالىعى باس ديرەكتورى ورىنباسارىنىڭ مىندەتىن اتقارۋشى مىڭجاسار شۇعايپوۆ.

ونىڭ سوزدەرىنە قاراعاندا، 3D-تەحنولوگياسىنىڭ ارقاسىندا پروتەزدى دايىنداۋعا كەتەتىن ۋاقىت تا، ماتەريال شىعىنى دا ۇنەمدەلسە كەرەك.

«3D-تەحنولوگياسى بويىنشا دايىندالعان گيلزا سىنىق بولشەگىنىڭ ولشەمىمەن بىردەي بولادى. سول سەبەپتى، ءداستۇرلى ءادىس بويىنشا پروتەزدى دايىنداۋ كەزىندە بىرنەشە رەت جاسالعان كيىپ ولشەۋ، ونى شاقتاۋ جۇمىستارى جاڭا ءادىس بويىنشا تەك ءبىر-اق رەت وتكىزىلەدى. ودان كەيىن پروتەزدى جيناقتاۋ شارالارى باستالادى. ناقتىراق ايتقاندا، ماتەريالدىڭ جۇمسالۋى، ەڭبەك سىيىمدىلىعى مەن پروتەزدى دايىنداۋعا كەتەتىن ۋاقىت تا قىسقارادى»، - دەپ ءتۇسىندىردى مىڭجاسار شۇعايپوۆ.

«3D-پروتەزدەۋ تەحنولوگيالارى» تاقىرىبىنا ارنالعان كەزدەسۋلەر بۇدان دەيىن الماتى، قاراعاندى، تاراز، تالدىقورعان جانە شىمكەنت قالالارىندا وتكەن بولاتىن.