قۇلسارىنىڭ ماڭعىستاۋعا كەتەر جولىنداعى شامامەن 5-6 شاقىرىم جەردە ورنالاسقان "شلام يگەرگىش" مەكەمەگە شلام-قالدىقتارى اقتوبە مەن ورال قالالارىنان دا اكەلىنىپ تاسىمالدانۋدا. جەرگىلىكتى جەردىڭ "قاراارنا، شولعارا" قالدىقتارى ول ەكىباستان وسى جەرگە توگىلۋدە. ورال تاسىمالىنىڭ ءبىر رەيسى 1 ملن 300 000 تگ.

ۇلتتىق رۋحى جوق، موينىندا قىرعىن نەسيەسى بار امالسىز جۇرگىزۋشىلەرگە "ەل تاعدىرى، ەكولوگيا، ۇرپاق ماسەلەسى" دەگەن تۇسىنىكتەر ميىنا كىرىپ تە شىقپايدى. ال مەسقارىن باسشىلارعا سەنىڭ تاعدىرىڭ كوك تيىن، ولارعا 5 تيىن بولسا بولدى. سوندا جىلوي اۋدانى بولاشاعىنان ءۇمىت كۇتتىرەتىن جاس قالا ما، الدە ء"بىرىڭ ءولىپ ءبىرىڭ قال" كىرپىشىنەن قالانعان قوقىس پوليگونى ما؟ جىلوي ايماعى كىم-كورىنگەننىڭ ساڭعىتىپ كەتەتىن تاستاندى قالاسى ەمەس!

اكىمدەر بۇگىن كەلىپ ەرتەڭ كەتەتىن كوشتىڭ ارباكەشتەرى. قىرعىن بولىپ جاۋ شاپسا دا بۇل جەردە تۇراقتاپ ولەتىن، بۇل جەردە قالاتىن تەك قانا وسى جەردىڭ بايرىعى قارا حالقى! مىنا كەلەڭسىزدىكتەردى كىم توقتاتادى؟ اكىمدەر بۇدان حاباردار ما؟ بۇل جەرگە قالدىق توكتىرۋگە كىم-كىمنىڭ دە رۇقسات بەرۋىنە حاقىسى جوق! بىراق، كوز قىستى، بارماق باستى ءامپاي-ءجامپاي مافيالار شامادان تىس شەكارادان شىعىپ بولدى. بۇل ماسەلەگە حالىق تۇيىلگەن قاباقپەن قاراۋدا. بۇرىنعى اۋدان اكىمى ءىزباسوۆ ماقسىم مىرزا: "مەنىڭ اكىم بولىپ قىزمەت ەتكەنىمە نەبارى 5 جىلداي ۋاقىت بولدى، بۇل مەكەمە مەنىڭ الدىمدا بوي كوتەرگەن. وعان كىم، نە ءۇشىن رۇقسات بەرگەنىن مەن بىلمەدىم" - دەپ جاۋاپ قاتقان بولاتىن، ءبىتتى، جالعاسى جوق. ال قازىرگى كەلگەن جاس اكىم جىلويدىڭ قىر-سىرىن ەندى عانا تۇيسىنە باستادى. وبلىس، اۋدان باسشىلارى، بۇل مەكەمەنى تەز جابۋعا شەشىم شىعارىڭدار! ول مەكەمە اقيقاتتى ءتۇسىنىپ ءوز ەركىمەن بوي ۇسىنباسا، قاعىلعان مىزعىماس قاداسىن حالىق بولىپ قاتاڭ تۇردە جۇلىپ الاتىنىمىزدى ەسكەرتەمىز! جانە دە وسى ۋاقىتقا شەيىن حالىقتى ۋلاپ كەلگەنى، اۋرۋعا ۇشىراتقانى ءۇشىن سانسىز ايىپپۇلدار تولەتەمىز!

ەل جاپپاي نارازى بولعان جەردە ەشۋاقىتتا بەرەكەت بولمايدى! ۇرپاق سوندا وسپەي جاتىپ ءوشۋ كەرەك پە؟ ونبەي جاتىپ ءولۋ كەرەك پە؟ بىزدە قانداي بولاشاق بار؟ وندا نە ءۇشىن جيىنداردا "سالاۋاتتى ءومىر سالتى" دەگەن ەرتەگىنى قاقساپ قويمايسىڭدار؟ ءىس پەن ءسوز بولەك، ال حالىق اقىماق ەمەس، حالىقتى ۇزاق الداپ، ۇزاق قورقىتا دا الماسسىڭدار! قالادان 5 شىقىرىم جەردە قوقىس الاڭى ورنالاسقان. ونىڭ تۇتىنىنەن (شلامنىڭ قاڭسىق ساسىق يسىنەن بولەك) "مۇراگەر" اۋىلى زارداپ شەگۋدە. "جاسىل ەل باعدارلاماسى" قايدا اداسىپ ءجۇر ەكەن؟ قالا اينالاسى – تۇتىندەتىپ، ۋلاۋعا ارنالعان ايماق ەمەس، حالىق قولىنداعى 5-6 مالىن باعىپ، قىرلىققا شىعىپ تازا اۋا جۇتىپ، ازاتتىقتا بەيمارال راحات كۇي كەشىپ وتىراتىن مەكەنى! "كاسىپكەرلىكتى قولداۋ" قايدا؟

قايدا بارساڭدا قورقىتتىڭ كورى دەگەندەي، حالىقتى قورلاۋ! ەلدى توناۋ، ەلدى الداۋ! ەل-حالىقتىڭ شامادان كوپ پايىزى اۋرۋ. انكولوگيالىق اۋرۋلار، راك اۋرۋىنىڭ كۇشىكتەيتىن ۇرعاشى تۇرلەرى 10 نىڭ بىرىنەن بايقالا باستادى. جان ساقتاۋ بولىمىندە ورىن جوق. كوماعا تۇسكەندەرگە 1-2 اپپارات اۋىسپاي بەزەك قاعۋدا. ال بۇل جاعدايلار "رۋحاني جاڭعىرۋعا" جاتا ما؟ "100 ناقتى قادامعا" سوندا نە جاتادى؟ جىلوي -قورقىنىشتى فيلمدەردەگى مۋتانتتاردىڭ قالاشىعى ەمەس! ءبىزدىڭ ءبىر تۇسىنبەيتىنىمىز، جالپى بىرنارسە جاساردا حالىقپەن اقىلداساسىڭدار ما؟ حالىق رۇقسات ەتتى مە الدە حالىق پەشكى مە، مال ما؟ راحات قوي، ويىڭا كەلگەنىن جاساپ حالىقتىڭ باسىنا سارپ ەتىپ كەتە بەرەتىن بولساڭدار! حالىقتى اشۋلاندىرماڭدار! حالىق – تولقىن، داريا! ءبىر تاسىسا دەس بەرمەيدى! ال ءبىزدىڭ اۋداننىڭ "التىن بالىق" ەكولوگى قارا ۋىلدىرىقتاندا قىمباتتاپ، عايىپ الەمىنە سۇڭگىپ كەتكەنىنە قاي زامان!

ەل بولاشاعىن، ۇرپاق قامىن ويلاساڭدار، دەرەۋ بۇل مەكەمەنى جابۋعا بار كۇشتەرىڭدى سالىڭدار، اكىم-باسشىلار! كوزىمىز كورىپ، مۇرنىمىز ءيىس سەزىپ وتىرىپ ءبىز اۋامىزدى لاستاتپايمىز! ەندىگى جەردە بۇل مەكەمەگە نارازى بولعان جىلوي حالقى نارازىلىق تانىتاتىن بولادى. بۇل ماقالا بارلىق تيەسىلى ورىندارعا جونەلتىلەدى، جانە ەسكەرتۋ رەتىندە قابىلداڭدار! جىلوي حالقى ءوز ناقتى قادامىن جاساۋعا بەك كىرىستى!

تۇرار شاپقارا

Abai.kz