جۋىردا "ەنشى" ينتەللەكتۋالدىق-تانىمدىق تەلەجوباسى كورەرمەنگە جول تارتادى،-دەپ حابارلايدى "Abai.kz" اقپاراتتىق پورتالى. 

"ەنشى" جايلى ەل-جۇرت نە دەيدى؟ قازىرگى تەلەيندۋستريا كونتەنتىندە  "زياتكەرلىك سايىستاردىڭ ماڭىزى بار ما؟  ءبۇل تۋرالى ءبىزدىڭ تىلشىلەر سۇراپ ءبىلىپ قايتتى.

-جالپى قازىرگى تاڭدا تەلەەكراننان ءارتۇرلى ويىن-ساۋىق باعدارلامالاردى كورىپ ءجۇرمىز عوي. بۇنداي زياتكەرلىك سايىستاردىڭ كوپ بولعانى دۇرىس دەپ ويلايمىن. سەبەبى، حالىقتىڭ زياتكەرلىك ءبىلىمىن وسىرۋگە ىقپال ەتەدى. ۇيدەگى بالالارىمىزدى، اسىرەسە مەكتەپ جاسىنداعى بالالارىمىزبەن بىرگە سۇراقتارعا جاۋاپ ىزدەي وتىرىپ، ءوزىمىز دە كوپ دۇنيەلەردى ءبىلىپ جاتامىز. وسىنداي باعدارلامالار كوپتەپ كەرەك دەپ ويلايمىن، - دەيدى الماتىلىق تۇرعىن ادەمى ساتىبالديەۆا.

راسىندا، قازىرگى تاڭدا قازاقستاننىڭ اقپارات نارىعىنداعى تەلەارنالاردىڭ دەنى نەگىزگى كونتەنت رەتىندە ءتۇرلى ويىن-ساۋىقتىق باعدارلامالاردى جۇرتقا ۇسىنىپ وتىر.

-جاستاردىڭ تالپىنىسىنا جول اشادى، ولاردىڭ دۇنيەتانىمىن كەڭەيتىپ،كوزقاراسىن وزگەرتەدى دەپ تۇسىنەمىن. مەن ينتەرنەتتەگى اقپاراتتان "ەنشى" دەگەن تەلەجوبا باستالادى دەگەندى وقىعانمىن. ارينە، قولدايمىن. سەبەبى، ءدال وسىنداي زەيىندى ارتىرۋعا باعىتتالعان تانىمدىق جوبالاردىڭ بولعانى ءاربىر اتا-انا ءۇشىن پايلادى، - دەيدى الماتى تۇرعىنى مۇرات بيساپا.

سونىمەن ەندى از ۋاقىتتا "ەنشى" زياتكەرلىك-تانىمدى تەلەجوباسى ەفيرگە جول تارتادى. بۇل ءبىلىم دوداسى. بىلىمدىلەر دوداسى.

باعدارلامانىڭ باستى ماقساتى تالانتتى جاستاردى تانۋ، ولاردىڭ وقۋعا قىزىعۋشىلىعىن ارتتىرۋ جانە ءبىلىمدى ناسيحاتتاۋ. باستىسى، جان-جاقتى ءارى بىلىمگە قۇشتار، لوگيكاسى مەن ينتۋيتسياسى دامىعان جاستاردى كوپشىلىككە تانىستىرۋ. سونداي-اق، قازاقتىڭ ۇمىت بولعان سالت-داستۇرلەرى، ۇلتتىق ويىندارى، تۇرمىستا قولدانىلعان قۇرال-سايماندارىن دارىپتەۋ. ءتورت كەزەڭدى قامتيتىن سايىسقا 10-11 سىنىپ وقۋشىلارى مەن 1-2 كۋرس ستۋدەنتتەرى قاتىسادى. العاشقى اينالىمدا ءتىل ءبىلىمى، مادەنيەت، تانىم، داستۇردەن قاتىسۋشىلارعا 15 سۇراق قويىلادى. ەكىنشى اينالىمدا ويىنشىلار «توعىز توراپ»-تا اتى ايتىپ تۇرعانداي 9 ءتۇرلى تاقىرىپ توڭىرەگىندە ءوزارا سىنعا تۇسەدى. جوبانىڭ ءۇشىنشى كەزەڭى «جامبى اتۋ» دەپ اتالادى. بۇل اينالىمدا ويىنشىلار وزدەرى قالاعان ۇياشىققا جامبىنى ورنالاستىرۋ ارقىلى سۇراقتى تاڭداۋعا مۇمكىندىك الادى. سوڭعى اينالىمنىڭ سۇراقتارى قازاق ادەبيەتى، قازاقستان تاريحى، سالت-داستۇرلەر، فولكلوردان كەلەدى. ءبىلىم بايگەسىنەن وزا شاۋىپ، ارتىنا قارا سالماعان قاتىسۋشى دودانىڭ باس بايگەسىنە يەلىك ەتىپ، ەنشىسىن الادى.

Abai.kz