وسىدان ءۇش-ءتورت كۇن بۇرىن ينتەرنەت بەتىندە نۇرگۇل حانىمعا ريزا بولعان ماقالالار ءجيى شىعىپ جاتتى. شىنىمدى ايتسام سول كەشتىڭ ءدال وسىلاي قازاق تىلىندە ارىنداتا وتەرىن مەن دە كۇتپەگەن ەدىم.  باسپاسوز ورتالىعىنا جينالعان قازاق قاندى تىلشىلەردىڭ ءبارى كوڭىلدەنە، رۋحتانا سويلەگەن قر-نىڭ باس پروكۋرورىنىڭ كەڭەسشىسى، اعا كومەكشىسى – نۇرگۇل قاراعويشينا حانىمعا  ىشتەي ريزا بولىپ وتىردى.

– ءبىز رۋحاني جاڭعىرۋدىڭ ارقاسىندا جاڭعىرۋعا، ۇلتتىق رۋحىمىزدى اسقاقتاتۋعا ءتيىستى حالىقتىڭ قىزمەتشىلەرىمىز. تاۋەلسىزدىكتى ءتاۋ ەتكەن، ەلدىڭ شەكاراسىن كۇزەتكەن، تۇتاستىق پەن تىنىشتىققا جاۋاپ بەرگەن، ادامداردىڭ قۇقىقتارى مەن تاعدىرلارىن تارازىعا سالاتىن وسى ءىرى ورگاندار بولىپ تابىلادى. سوندىقتان دا، وسى جەردە قىزمەت ەتەتىن ادامداردىڭ ءبارى بىرىگە وتىرىپ ۇلتتىق ساناسى جاعىنان وزگەرۋگە، وزگەرۋگە  تالپىنۋعا ءتيىسپىز. ءتىلىمىز بارىنەن دە بيىك ەكەنىن ۇعىنۋىمىز ءجون-اق.

قانداي عاجاپ سوزدەر! ەكپىندەتە ايتا تۇسسە ەكەن دەيمىز ىشتەي.  ىستەرى قانشالىقتى ەكەنىن الدا كورەرمىز، دەگەنمەن وسى ءباسپاسوز الاڭىندا: – رۋحاني جاڭعىرامىز دەپ ءجۇرىپ، سۇراقتارعا ورىسشا جاۋاپ بەرگەننەن، سويلەگەننەن ۇيالامىن دەپ كوسىلۋى بىزگە مايداي جاققانى انىق ەدى. نۇرگۇل حانىممەن بىرگە بىزدە جان-جاعىمىزعا كۇلىمدەي قاراپ، ىرجالاقتاپ قويامىز. قۇددى تۇمان سەيىلىپ، كۇن جارىق ەتە تۇسكەندەي بويىمىزدى ىستىق لەپ ەسىپ كەتىپ ەدى.

كابينەتكە كەلدىكتە كوسىلە جازۋعا وتىردىق. ورىس اقپارات قۇرالدارىنىڭ وكىلدەرىنىڭ كوڭىل-كۇيى سول جەردە-اق بۇزىلعان. بۇل جەردە دە نە جازارلارىن بىلمەي ارپالىسىپ كەتتى. دىم تۇسىنبەگەن سوڭ قيىن عوي ارينە. ورىسشا ءباسپاسوز حابارلاماسىنان بىردەڭەلەردى العان بولدى دا قىسقاشا جازىپ، تاپسىرمانى ورىندادى. ارتىنان ارينە اشۋلانىپ تايىپ تۇردى. ءبىز جىمىيىپ قويامىز.  ­­­­­وز ەلىڭدە، ءوز تورىڭدە، ءوز تىلىڭدە كوسىلە سايراپ، ونى بىزدەر اۋدىرىپ قينالماي، اقپاراتتارعا ەركىن قانىعىپ، كوسىلتە جازعانعا نە جەتسىن شىركىن...

بۇل بىراق كوپكە بارماعان قۋانىش بولدى. بويمىزعا قۇيىلعان شۋاقتىڭ دا قىزۋى باسەڭدەپ بارا جاتىر ەدى. جينالىستار بۇرىنعى ىزىمەن قايتا جالعاسىپ جاتتى. باياعىداي جاۋدىرەي تىڭداپ، تۇيتەڭدەپ اۋدارىپ جازاتىن بولدىق. شىركىن دەيمىز ىشتەي نۇرگۇلدەر كوبەيسە عوي... ءبىز شىنىمەن سول نۇرگۇلدەرگە سۋساپ قالعان ەكەنبىز...

التىناي نۇردىبەك

Abai.kz