استانا دەيتىن ايدىك شاھاردىڭ اكىمى اسەت  يسەكەشەۆ، وتكەندە جۇرت الدىندا  جاڭا جىلعا دايىندىقتى تەك تاۋەلسىزدىك مەرەكەسىنەن كەيىن عانا باستايتىنىن ايتقانى ەسىمىزدە. "وي، بارەكەلدى" دەستىك ءبىز. ءتاۋ ەتەر تاۋەلسىزدىك كۇنىن باسقا-باسقا، استانانىڭ ايرىقشا اتاپ وتەر ءجونى بار.

سەنبەسەڭىزدەر، اسەت مىرزانىڭ اكىمياتىنىڭ سايتىندا بۇل اقپاراتى ءالى تۇر. جەلتوقسانداعى مەرەكەلىك داتالارعا دايارلىقتىڭ ارنايى ءتارتىبى بەكىتىلگەن.

«جاڭا جىلدىق شىرشالاردى تاۋەلسىزدىك كۇنىن اتاپ وتكەن سوڭ، 18 جەلتوقساننان باستاپ ورناتامىز دەپ جوسپارلاعان ەدىك. كەيبىر جەكەلەگەن نىساندار شىرشا ورناتىپ، ونى بەزەندىرە باستادى. بۇعان قاتىستى نارازىلىق بىلدىرگەندەر بار. تاۋەلسىزدىك كۇنى ەلىمىزدىڭ باستى مەرەكەسى بولعاندىقتان، باسىمدىلىق سول مەرەكەگە بەرىلەدى»، - دەگەن. بۇل اكىم اسەكەڭنىڭ ءوز ءسوزى ەدى. الىپ-قوسقانىمىز جوق.

سويتسەك، استانا جاڭا جىلدى تويلاۋدى ازىردەن-اق باستاپ كەتىپتى. استانانىڭ حالىق ەڭ كوپ جينالادى دەگەن ورىندارى جاسىل شىرشالارمەن بەزەندىرىلىپ ۇلگەرگەن ەكەن. جۇرت جاپاتارماعاي الگى شىرشانىڭ تۇبىندە سۋرەتكە ءتۇسىپ، امپەي-جامپەي، ءماز-مەيرام.

ەسەسىنە، "stan.kz" دەيتىن سايت، ەلورداداتاۋەلسىزدىك كۇنىنە قاتىستى بەلگى يا ەسكەرتپە جوق دەپ جازادى.

بۇل قالاي بولعانى، اسەت مىرزا؟ ايتەۋىر، ۇققانىمىز - اسەت مىرزانىڭ سوزىنە پىسقىرىپ جاتقان جۇرت جوق استانادا.

تاۋەلسىزدىك كۇنىنە دايىندىققا 17-جەلتوقساننان باستاپ كىرىسەمىز دەگەن اكىم اسەتتىڭ باسقارۋىنداعى باس شاھاردىڭ جاڭا جىلدى تويلاۋدى باستاپ كەتكەنىنە جول بولسىن دەدىك.

رەسەي سەكىلدى الپاۋىت يمپەريانىڭ بۇعاۋىنان بوساپ، ازاتتىق العان ەلدەر اراسىندا جاڭا جىلعا ءدال قازاقستانداي قۇرمەت كورسەتەتىندەرى نەكەن ساياق-اۋ.  بولسا دا، ءوز رەتىمەن، اسپاي-تاسپاي، شىعىن شىعارماي تويلاۋعا بەيىم كوپشىلىگى. ال بىزدە شە؟ ۇلان - اسىر توي. قىپ-قىزىل شىعىن.

الايدا،  قانشاما جىل ساناعا سىڭگەن جاڭا جىل، بىرەۋلەر ءۇشىن تاۋەلسىزدىكتەن بيىك بولىپ تۇرعانىن وزگە قالالاردى قايدام، استانانى اياڭداپ ءجۇرىپ ارالاعان ادام سەزە قويارىنا ءباس تىگەمىز...  استانا اكىمى بۇيرىقپەن ەشتەڭە وندىرە الماس، تەك تاۋەلسىزدىكتىڭ ارقاسىندا بايىعان، بيلىككە جەتكەن شەنەۋنىكتەر ويلانىپ، الدى-ارتىنا قاراسا عانا ءبىر جەتىستىككە جەتەتىنىمىز انىق. ايتپەسە، ءبارى بەكەر شارۋا بولا ما دەگەن قاۋىپ بار...

نۇرزات توعجان

Abai.kz