مەملەكەت تارتىپسىزدىككە مۇلدەم توزبەۋشىلىك ءپرينتسيپىن ۇستانۋعا ءتيىس دەسەك، ونىمەن كۇرەستىڭ دە كۇشەيگەنى ەكى باستان بەلگىلى، دەپ جازادى اباي اقپارات اگەنتتىگى.

تارتىپسىزدىك پەن بەتىمەن كەتۋشىلىكتى سەزىنۋ ودان دا ەلەۋلى قىلمىستارعا جول اشادى. ۇساق  قۇقىق بۇزۋشىلىققا توزبەۋ احۋالى - قوعامدىق ءتارتىپتى نىعايتۋعا، قىلمىسپەن كۇرەسكە باستايتىن ماڭىزدى قادام. ءبىز قۇقىقتىق نيگيليزمدى جەڭىپ، قوعامدى قوعامدىق ءتارتىپتى قورعاۋ ىسىنە تارتۋىمىز كەرەك.

ەلباسى «قازاقستان 2050» ستراتەگياسىندا وسىلاي دەي كەلە قۇقىق بۇزۋشىلىق، قىلمىسپەن كۇرەسۋ كەرەكتىگىن ايتقان بولاتىن. وسى ورايدا وقو-دا وبلىس كولەمىندە جۇزەگە اسىرىلىپ جاتقان «جاس ساقشى» جانە «جاس پوليتسيا كومەكشىلەرى»، «ايبىن» جوبالارى مەن مەكەنجايلىق كومەك كورسەتۋ جۇمىستارىنىڭ ناتيجەسىندە جاستار اراسىنداعى قىلمىس پەن قۇقىقبۇزۋشىلىق كورسەتكىشى 2017 جىلى وتكەن جىلعا قاراعاندا 307-گە ازايىپ وتىر.

«سەرپىن – 2050» جوباسى اياسىندا سولتۇستىك ايماقتارداعى جوعارى وقۋ ورىندارىندا 6500-گە جۋىق جاس ءبىلىم الۋدا. ال كوللەدجدەردە تۇستىك وڭىردەن 1000-نان استام ستۋدەنت وقىپ جاتىر.

جالپى 4 جىلدا باعدارلاما بويىنشا جوعارى وقۋ ورىندارىنا وقۋعا قابىلدانعان ستۋدەنتتەردىڭ 50 پايىزى وڭتۇستىك قازاقستان وبلىسىنىڭ جاستارىنا تيەسىلى.

سونداي-اق، «ديپلوممەن اۋىلعا» باعدارلاماسىمەن 2017 جىلى 800-دەن استام مامانعا جولداما بەرىلگەن. ال ونىڭ ىشىندە 300-گە جۋىق جاس تۇرعىن ۇيمەن قامتاماسىز ەتىلىپ وتىر. وبلىستا «جاستار پراكتيكاسى» باعدارلاماسى دا ءوز جالعاسىن تاۋىپ كەلەدى. «جاستار پراكتيكاسى» باعدارلاماسىنا 2017 جىلدىڭ 10 ايدىڭ قورىتىندىسى بويىنشا 5294 جاس تارتىلىپ، وتكەن جىلمەن سالىستىرعاندا 159 ادامعا ءوستى. سونداي-اق، 2017-2020 جىلدارعا ارنالعان وڭىرلىك ءىس-شارالار جوسپارى ۇدايى ورىندالىپ كەلەدى.

ماسەلەن، «ولكەتانۋ» باعدارلاماسى اياسىندا ماۋسىم-قىركۇيەك ايلارىندا وبلىستاعى تاريحي-مادەني ورىندارعا جاستاردىڭ ەكسكۋرسيالارى ۇيىمداستىرىلىپ، وعان 5 مىڭنان استام جاس قاتىستى. سونىمەن قاتار، وڭىردەگى جازعى لاگەرلەرگە جالپى سانى 247,6 مىڭنان استام جاس بارعان.

سونىمەن قاتار، جاستاردىڭ ينتەللەكتۋالدىق، پاتريوتتىق قاسيەتتەرىن ارتتىرۋ ماقساتىندا جەرگىلىكتى تەلەارنالاردان بىرنەشە تەلەجوبالار ۇيىمداستىرىلىپ وتىر.

Abai.kz