جاھاندىق تۇرمىستىق احۋالدى باعالايتىن حالىقارالىق بەدەلدى ۇيىمداردىڭ ءبىرى Credit Suisse Research Institute جۋىردا ءبىزدى «2017 جىلى الەمدەگى كەدەي ەلدەردىڭ قاتارىندا» دەگەن بايلام جاسادى.

بۇل ۇيىم ەلدىڭ جالپى كورسەتكىشتەرىن ەمەس، ءۇي-شارۋاشىلىعى جاعدايىن، جيناعان قاراجاتى مەن قارىزدارىن ەسەپكە الا وتىرىپ ناقتى كورسەتكىشتەردى شىعارادى. سونىمەن بىرگە ول ەلدىڭ جالپى بايلىعىنىڭ كوپتىگىنە قارامايدى، سول بايلىقتىڭ قالاي بولىنەتىنىن سارالايدى. سوندا قازاقستاندىقتاردىڭ ناقتى تابىسى ازايىپ، قارىزدارى كوبەيىپ كەتكەنى كورىنىپ قالعان. مۇنداي كورسەتكىش مەديالىق دەپ اتالادى. ول بايلاردىڭ بايلىعىن كەدەيلەردىكىنە قوسىپ، ورتاشاسىن انىقتاۋ ءۇشىن سانىنا بولە سالاتىن جالپى كورسەتكىش ەمەس، ناقتى كورسەتكىش.

مەديالىق ينديكاتور جوعارى دارەجەدەگى بايلار مەن وتە تومەنگى دارەجەدەگى كەدەيلەردىڭ حال-احۋالىن ەسەپتەن شىعارىپ تاستاپ، تەك حالىقتىڭ ورتا دارەجەدە تۇراتىندارىنىڭ جاعدايىن عانا باعالايدى.  ەگەر جالپى كورسەتكىش ءاربىر قازاقستاندىقتىڭ 2017 جىلعى ورتاشا تابىسى 4441 دوللار دەسە، مەديالىق ينديكاتور ونى 334 دوللار دەپ انىقتاعان. ايىرماشىلىق 13 ەسە... باسقا ەشقانداي ەلدە مۇنداي ايىرماشىلىق جوق ەكەن. سونىمەن قاتار قازاقستاندىقتاردىڭ 98 پايىزىنىڭ جىلدىق تابىسى 10 مىڭ دوللاردان تومەن، تەك 2,1 پايىزى عانا بۇدان جوعارى.

ءماجىلىس دەپۋتاتى ا.قوڭىروۆ وسىلاردى كورسەتە وتىرىپ پرەمەر-مينيستر ب.ساعىنتاەۆتىڭ اتىنا ساۋال جولداپ، ەلىمىزدىڭ بايلىعى دۇرىس بولىنبەي وتىر، سونى جونگە سالۋ جولدارىن انىقتاۋ كەرەك ەكەنىن ايتىپ، دابىل كوتەردى. بىراق سودان بىردەڭە شىقسا يگى...

سەرىك  ەلەۋ، ساراپشى

Abai.kz