اقپارات جانە كوممۋنيكاتسيالار ءمينيسترى داۋرەن اباەۆ ەلىمىزدە رەسەيلىك تەلەارنالاردىڭ كورسەتىلىمىنە قاتىستى جاعدايدى ءتۇسىندىردى، - دەپ حابارلايدى اباي-اقپارات.

بۇگىن سەناتتىڭ جالپى وتىرىسىندا اقپارات جانە كوممۋنيكاتسيالار ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا دەپۋتات داريعا نازارباەۆا مينيستر داۋرەن اباەۆتان ەلىمىزدە رەسەيلىك تەلەارنالاردىڭ كورسەتىلىمىنە قاتىستى تۋىنداعان جاعدايدى ءتۇسىندىرۋدى سۇرادى.

"تاياۋدا رەسەيلىك ارنالاردىڭ كورسەتىلىمىن توقتاتۋعا قاتىستى جانجال بولدى. جاعدايدى ءتۇسىندىرىپ بەرسەڭىز", — دەدى نازارباەۆا.

ء"بىز رەسەيلىك ارىپتەستەرىمىزبەن قاڭتار-اقپاندا ءتيىستى كونسۋلتاتسيالار وتكىزەمىز دەپ كەلىستىك. ول ۋاقىتقا دەيىن تەلەارنالاردىڭ كورسەتىلىمى توقتامايدى. بۇل جەردە بار گاپ ەكونوميكالىق ماسەلەگە كەلىپ تىرەلەدى. رەسەيدىڭ كەيبىر تەلەارنالارى قازاقستان اۋماعىندا ءوز تەلەونىمدەرىن كورسەتۋ ءۇشىن تاريف كوتەرىپ جاتىر. كەيبىر تەلە ونىمدەرگە ەلىمىزدە سۇرانىس جوق. ماسەلەن، "رەسەي-مادەنيەت" تەلەارناسى تاريفتەرىن وسىرۋدە. ءبىزدىڭ كابەلدىك وپەراتورلاردىڭ بۇل تەلەارنادان باس تارتۋعا قۇقىعى بار. ولار ءتاريفىن كوتەرىپ جاتىر، ال ءبىزدىڭ وپەراتورلار تەلەارنانىڭ رەيتينگىسىنە قاراپ، ونى كورسەتپەۋ تۋرالى شەشىم قابىلداي الادى", — دەپ ءتۇسىندىردى اباەۆ.

مينيستر بۇل ماسەلە الداعى ۋاقىتتا قاراستىرىلاتىنىن ايتتى.

Abai.kz