كەشە عانا پورتالدا جارىق كورگەن ەرجان بايتىلەستىڭ «نامىسسىزدىق» اتتى نامىستان شابىس تىلەگەن ماقالاسى جارىق كوردى. ماقالادا  قازاقستان مەن انگليا فۋتبول قۇرامالارىنىڭ سايىسى كەزىندە ورىن العان وقيعالار تۋرالى ايتىلعان  بولاتىن.
ەستەرىڭىزگە سالا كەتەيىك، ويىننىڭ سەكسەنىنشى مينۋتتارىندا جاس قازاق جانكۇيەرى پوليتسيا شەبىن بۇزىپ، ەكى توسقاۋىلدان سەكىرىپ، الاڭنىڭ جارتىسىن قيىپ، انگليا قۇراماسىنىڭ قاقپاسىنا كۇمپ ەتكەن بولاتىن. پوليتسيا قىزمەتكەرلەرى الگى جانكۇيەردى اعىلشىن قاقپاسىنان ارەڭ سۇيرەپ شىعىپ، الاڭنىڭ سىرتىنا الىپ كەتتى. نامىسقوي فۋتبول فاناتىنا سول كەزدە بۇكىل ستاديون دۋ قول شاپالاقتاپ، پوليتسەيلەرگە «جىبەرىڭدەر! ۇرماڭدار! تيىسپەڭدەر!» دەپ ايقايلاپ جاتتى...
سول جانكۇيەردىڭ اتى-ءجونى بەلگىلى بولدى. ول – الماتىداعى مەديتسينالىق ۋنيۆەرسيتەتتىڭ ەكىنشى كۋرس ستۋدەنتى ەدىگە راي ەكەن.
كەشە عانا الماتىنىڭ مامانداندىرىلعان اۋدانارالىق اكىمشىلىك سوتىندا سۋديا ب.كۇزەمباي ەدىگەنى «بۇزاقى» دەپ تانىپ، ونى 3 ايلىق ەسەپ كورسەتكىش (1 اەك 1273 - تەڭگە) كولەمىندە ايىپپۇل تولەۋ تۇرىندەگى اكىمشىلىك جازاعا تارتتى. سوتتا ەدىگە ءوز قادامىن «قازاق فۋتبوليستەرىنە انگليا قۇراماسىنىڭ قاقپاسىنىڭ قاي جاقتا ەكەنىن كورسەتكىم كەلدى» دەپ ءتۇسىندىردى. جانكۇيەر ءوزىنىڭ كىناسىن تولىق مويىندادى.
ە. رايدىڭ تۋعان اعاسى ەرجان بەزىمباەۆتىڭ ايتۋىنشا، قازاقستاندىق جانكۇيەر الكوگولگە نەمەسە ەسىرتكىگە ءۇيىر ەمەس ەكەن. ونىڭ ايتۋىنشا، وسى ارەكەتى ءۇشىن ە. راي وقۋدان شىعارىلمايدى.
سوت نە دەسە و دەسىن، ءبىزدىڭ ويىمىزشا، قازاق قۇراماسىنىڭ نامىسىن قوزدىرۋ ءۇشىن وسىنداي دا قادامدار كەرەك. نامىس جوق جەردە جەڭىس تە بولمايدى! 
توقسان مينۋت بويى جۇگىرۋگە جارامايتىن قازاقستان فۋتبول قۇراماسى (قارقىندى، پاراساتتى ويىن  ورنەگىن كورسەتۋ تۋرالى اۋىز اشپاعاننىڭ وزىندە) حاقىندا ايتا-ايتا جامال اپاي دا، جانكۇيەر جاماعات تا قارتاياتىن بولدى. بۇگىنگىلەردەن، شىنىن ايتساق، ءۇمىت تە، قايىر دا جوق سياقتى. ەدىگەنىڭ كەشەگى تەنتەكتىگى جاڭادان ءوسىپ كەلە جاتقان نامىسى ناركەسكەندەي جاس قازاق فۋتبولشىلارىنىڭ بار ەكەنىن تانىتتى. 
ال ازىرگە، ەرجان ايتپاقشى، ەسەپ 1:4! ەرتەڭدەرى قازاقتىڭ قاسقىر مىنەزدى قۇراماسى وسى ەسەپتى انگليا سياقتى ارىستان كوماندالارعا ەسەلەپ قايتارار كۇندە تاۋادى ءالى!

«اباي-ينفورم»