بيشىمباەۆ ەلباسىدان كەشىرىم سۇرادى
بۇرىنعى ۇلتتىق ەكونوميكا ءمينيسترى قۋاندىق بيشىمباەۆ سوت زالىندا مەملەكەت باسشىسى نۇرسۇلتان نازارباەۆتان كەشىرىم سۇرادى، - دەپ حابارلايدى اباي-اقپارات.
ەكس-مينيستر سوتتا وزىنە تاعىلعان ايىپتارعا قاتىستى تەك شىندىقتى ايتاتىنىن ءارى جىبەرگەن قاتەلىگى ءۇشىن حالىقتان كەشىرىم سۇرايتىنىن جەتكىزدى.
«مەنىڭ بۇل ىسكە قاتىسىم جوق. مۇنى ءبىزدىڭ قوعامعا جانە ەڭ ماڭىزدىسى قازاقستان پرەزيدەنتى، ۇلت كوشباسشىسى نۇرسۇلتان نازارباەۆقا جەتكىزگىم كەلەدى. وسىنداي كاسىبي دەڭگەيگە جەتۋىم سول كىسىنىڭ ارقاسى. پرەزيدەنتتىڭ الدىندا كىنالى ەكەنىمدى سەزىنەمىن. سەنىم ارتىپ، جۇمىسقا شاقىرعان ازاماتتار مەنى جارعا جىقتى. مەن سول ءۇشىن جاۋاپ بەرەمىن. ولار مەنى جانە سەنىمىمدى پايدالاندى. سول ءۇشىن مەن ەلباسىدان، حالىقتان كەشىرىم سۇرايمىن. وسى جاعدايعا قاراماستان مەن ارقاشان پرەزيدەنتكە بەرىلگەن ازامات بولامىن»، - دەدى ەكس-مينيستر سوت زالىندا.
ايتا كەتەيىك، 31 قازان كۇنى استانادا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ جانە اتالعان ىسكە قاتىسى بار دەپ كۇدىككە ىلىنگەن 22 ازاماتقا قاتىستى الدىن الا سوت تەرگەۋى باستالدى. بۇرىنعى مينيسترگە قىلمىستىق كودەكستىڭ «پارا الۋ» - 366-بابى، 4-تارماعىنا، سونداي-اق «سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ» - 189-باپتىڭ 4-ءبولىمى، 2-تارماعىنا سايكەس ايىپ تاعىلىپ وتىر.
«قورعاس» شەكارالاس ىنتىماقتاستىق ورتالىعىنىڭ بۇرىنعى پرەزيدەنتى، «1 ميلليون دوللار پارا الدى» دەپ ايىپتالعان ۆاسيلي ني وسىنداي كەشىرىم سۇراۋدان كەيىن اقتالعان ەدى. ءنيدىڭ باعى بيشىمباەۆقا بۇيىرا ما؟
ءشارىپحان قايسار
Abai.kz
