قىرعىز دەپۋتاتتارى پرەزيدەنتتىڭ ايىر قالپاق كيىپ ءجۇرۋىن زاڭمەن مىندەتتەگىسى كەلەدى
قىرعىزستان پارلامەنتىنىڭ دەپۋتاتتارى ۇلتتىق باس كيىم - ايىر قالپاقتى ەلدىڭ باسقا دا ۇلتتىق بەلگىلەرى - مەملەكەتتىك تۋ، ەلباڭبا جانە انۇرانعا تەڭەستىرۋدى ۇسىندى. زاڭ جوباسى پارلامەنت سايتىندا جاريالاندى.
دەپۋتاتتار پرەزيدەنت، پارلامەنت توراعاسى مەن ونىڭ ورىنباسارلارى، ۇكىمەت باسشىسى جانە باسقا مەملەكەت باسشىلارىن رەسمي قابىلداۋلاردا نەمەسە ساپارلاردا ايىر قالپاق كيىپ جۇرۋگە مىندەتتەۋدى ۇسىندى. سول ارقىلى زاڭ شىعارۋشىلار "قىرعىز ۇلتىنىڭ مادەني قۇندىلىقتارىن ناسيحاتتاعىسى" كەلەدى.
قۇجاتقا سايكەس، حالىقارالىق جارىستاردا قىرعىزستان اتىنان شىعاتىن سپورتشىلار دا قالپاق كيىپ جۇرۋگە مىندەتتى بولادى.
ۇكىمەت قالپاقتاردى دايىنداۋ، ەلگە اكەلۋ جانە ساتۋدى شەكتەۋى ءتيىس، دەلىنگەن زاڭ جوباسىندا.
زاڭ اۆتورلارى "ايىر قالپاقتى ماقساتسىز پايدالانۋمەن" كۇرەسۋدى تالاپ ەتتى. وعان قولدانىلاتىن جازا زاڭدا ايتىلماعان.
بۇعان دەيىن قىرعىزستاندا جانۋارلارعا ارنالعان ءسان كورسەتىلىمىندە يتكە قالپاق كيگىزگەنى ءۇشىن داۋ شىققان ەدى. بەلسەندىلەر بۇنى قىرعىز ۇلتىنىڭ نامىسىنا تيۋ، ۇلت ارازدىعىن تۋدىرۋ دەپ قابىلدادى.
Abai.kz
