ەلەكتروندى كۇندەلىك جوباسى مۇعالىم جۇمىسىن «وڭايلاتۋعا» ارنالعان جوبا. ول قازىر بارلىق جەردە پيلوتتىق جوبا رەتىندە جۇمىس ىستەپ جاتىر. دەسە دە، سول ەلەكتروندى كۇندەلىكتەن باس تارتۋدىڭ دالەلدى سەبەپتەرىن ۇسىنۋدى ءجون ساناپ وتىرمىز. ءبىزدىڭ ويىمىزعا مينيستر ساعاديەۆ نە دەر ەكەن؟ 

1. جۇيە تەك قانا ينتەرنەت بار ورتادا جۇمىس جاسايدى. قازاقستاننىڭ ءار اۋماعىنداعا مەكتەپتەردىڭ ينتەرنەتكە قولجەتىمدىلىگى ءارتۇرلى. كەزەكپەن نەمەسە ينتەرنەتى بار جەرلەردە عانا كۇندەلىك تولتىرۋعا مۇمكىندىگىڭ بار.

2. بۇل رەسەيدەن كوشىرىپ الىنعان جوبا. قازاق تىلىندەگى نۇسقاسىندا كوپ جەرلەرى قازاقشاعا اۋدارىلماعان، ءبىراز وڭدەۋدى قاجەت ەتەدى.

3. كۇندەلىك جۇيەسىندە ساباق كەستەسى اۆتوماتتاندىرىلماعان. ءار ساباقتى ءار توقسانعا جەكە-جەكە قولمەن تولتىرىلادى. مۇعالىمدەردىڭ قاي ساباقتان بەرەتىنى، تاريفتىك جوسپار بويىنشا قاي مۇعالىم نەشە ساعاتپەن جۇرگەندىگى، سەس-ءتىڭ تالاپتارى بويىنشا ءار ساباقتىڭ قيىندىق دارەجەسى بويىنشا اۆتوماتتى تۇردە ساباق كەستەسىن جاساۋعا قاۋقارى جوق. سوندىقتان ونى جۇرگىزۋ ءۇشىن ارنايى ادام بولماسا ارى قاراي جۇمىس جاساۋ مۇمكىن ەمەس.

4. kz قولداۋ قىزمەتتەرىنىڭ سىلتەمەلەرى رەسەيدىڭ «دنەۆنيگىنە» قاراي جول تارتىپ تۇر

5. بۇل جۇيەدە دە مونيتورينگ جۇرگىزىلەدى. Olap.kundelik.kz سايتىنا پايدالانۋشى اتى: MONITORING, قۇپيا ءسوز: kundelikkz تەرىپ قازاقستاننىڭ كەز كەلگەن جەرىن كورە الاسىز. ءتۇرلى دياگراممالارمەن قاي وبلىس نەشىنشى ورىندا، قاي جەر بەلسەندى بارلىعىن كورە الاسىز. وسى رەيتينگ ارقىلى كىرۋگە جاعداي بولماعان مەكتەپتەردىڭ مۇعالىمدەرى ەسكەرتۋ، سوگىس الۋدا.

6. اتا-انا مەن وقۋشىنىڭ ۇيىندە جاعداي بار ما؟ قالالى جەردە بار شىعار، بىرەۋگە ىڭعايلى شىعار. بىراق اتا-انا مەن وقۋشىلاردى مۇعالىمدەر وزدەرى كىرە الماي جۇرگەندە قالاي كىر دەپ ايتادى؟ كەيبىر جەرلەردە اتا-انا مەن وقۋشىنىڭ كىرۋىن قاداعالاۋ تۋرالى بۇيرىقتار بار. بۇل دەگەنىمىز كوزبوياۋشىلىق، مۇعالىم اتا-انانىڭ، وقۋشىنىڭ ورنىنا ءوزى كىرىپ ءرولىن سومدايدى دەگەن ءسوز.

7. ەلەكتروندى كۇندەلىكتىڭ قاعازبەن قوسا قولدانىلۋى ەكى جۇمىس ەكەنىن بارلىعى بىلەدى. ءبىلىم جانە عىلىم مينيسترلىگىنىڭ ەكەۋىنىڭ بىرەۋىن عانا تاڭداۋعا بولاتىنىنا بۇيرىعى بار ەكەنىن بىلە تۇرا ەكەۋىن دە تولتىرۋدى تالاپ ەتىپ وتىر.

8. ەلەكتروندى كۇندەلىكتى تولىق اۆتوماتتاندىرۋ قاجەت، جەكە شتات بەرىلۋى كەرەك. ونىمەن جۇمىستى قازىر «قوعامدىق» جۇمىس رەتىندە مۇعالىمدەر اتقارىپ ءجۇر.

كۇندەلىكتى تولتىرماۋ ءۇشىن دە وسىنداي سىن پىكىرلەر ايتىلىپ ءجۇر دەپ كەلىسپەيتىندەر دە بار. IT سالاسىنىڭ مامانى رەتىندە كۇندەلىك جوباسى تولىق اۆتوماتتاندىرىلمايىنشا،  قولدانىلۋى كوپشىلىككە ىڭعايلى بولمايىنشا قولداۋ تابۋى ەكىتالاي.  كوپ جاعدايدا كەيبىر جوبالار كوپشىلىكتىڭ ەسكەرۋىنسىز ەنىپ كەتىپ جاتىر. بىزدەن سۇراۋشى ما ەدى. نە بولسا دا سوڭى قايىرلى بولسىن

م. تەمىربەك، «مۇعالىم مارتەبەسى» قوعامدىق بىرلەستىگى

Abai.kz