كەشە عانا ەسىگىمىزدەن شىعارىپ سالعان 2017 جىل ءوز ەرەكشەلىكتەرىمەن ەستە قالدى. سونىڭ مەملەكەت باسشىسى «بولاشاققا باعدار: رۋحاني جاڭعىرۋ» اتتى ماقالاسىندا ەل دامۋىنا زور ۇلەس قوسقان ازاماتتاردىڭ وزدەرى مەن ولاردىڭ تابىسقا جەتۋ تاريحىنا ءمان بەرىپ، ولارعا اقپاراتتىق قولداۋ جاساپ، تانىمال ەتۋدىڭ جاڭا مۋلتيمەديالىق الاڭىن قالىپتاستىر تاپسىرماسى اياسىنداعى «100 جاڭا ەسىم» جوباسى بولاتىن.

اتاق مانساپقا قۇمار ەل ەمەسپىز بە، ءجۇز ەسىمگە ۇمتىلعانداردار قانشاما بولدى. ال، ولاردى تاڭداۋ الەۋمەتتىك جەلى ارقىلى جۇرگىزىلدى. ەستەرىڭىزدە بولار قولدارىڭىزداعى تەلەفونعا «مىنا كىسىگە داۋىس بەرىڭىز» دەگەن سمس حاتتار اعىلى. ال، ەل بولسا ۇمىتكەردىڭ ەل دامۋىنا قانداي ەڭبەك سىڭرگەنىنە ەمەس، تانىستىعى مەن بىلىستىگىنە قاراي داۋىس بەرىپ الەك بولدى. بىلايىنشا ايتقاندا مادەني سىبايلاستىققا قاتتى ۇقسادى. قازاق ەلىندە جالپى حالىقتىق سايلاۋ، تاڭداۋ دەگەننىڭ قالاي وتەتىنىن جاقسى بىلەسىزدەر.

ايتا كەتەيىك ىرىكتەلگەن جاڭا ەسىمدەردىڭ13-ءى بيزنەس وكىلى، 31-ءى ءارتۇرلى سالا وكىلدەرى، 17-ءى عىلىم، 12-ءى سپورتشى، 20-ى مەديتسينا ماماندارى بولسا،  9-ى مادەنيەت مايتالماندارى بولدى.

دۇرىس، عالىمداردى تاڭداۋى ءجون-اق. بىراق، سول عالىمداردىڭ نە ارتىقشىلىقتارى ءۇشىن تاڭداعانى بۇلىڭعىرلاۋ بولىپ تۇر. بالكىم داۋىس بەرەتىن تۋعان-تۋىس باسىم نە تىرەگى مىقتى ما دەگەن جالعان كۇدىك جالپ ەتتى. بولماسا قازاقستاندا 27 مىڭنان استام عىلىم دوكتورى مەن عىلىم كانديداتتارى بار. بۇل سوڭعى 3-4 جىلدا بەرىلگەن ph دوكتورى عىلىمي دارەجەسىن ايتپاعاندا. بارلىعىن قوسا العاندا عالىمدارىمىزدىڭ سانى 30 مىڭعا جۋىقتايدى ەكەن. ولەڭگە اركىمنىڭ دە بار تالاسى دەمەكشى وسىلاردىڭ ىشىنەن ىرىكتەلىپ شىعارداي ايدى اسپانعا شىعارعاندارى بار ما؟ ارينە، وعان ءۋاجى دە تابىلار.

ال، جاڭا ەسىمدە سپورتشىلاردىڭ نەگە جۇرگەنىن بىلمەيمىن. ولاردىڭ ەسىمدەرى ونسىز دا جەر جارىپ  تۇرعان جوق پا؟ ءتىپتى، اقىن بەگارىس شويبەكوۆتىڭ دە ەسىمىن كورىپ قالدىق. ونى اقىندىق قىرى ءۇشىن تاڭداعان شىعار. بىراق، نەگە التىن دومبىرانىڭ ەكى مارتە يەگەرى مۇحتار نيازوۆ ەمەس بولماسا جاڭا شىعىپ كەلە جاتقان اقىن بولمادى. ءيا، وسىنداي كۇدىكتەر كوپ. دەگەنمەن بايدىڭ اسىن بايعۇس قىزعانعانداي بولمايىق. سوندىقتان مۇنى تالداپ كەرەك ەمەس شىعار. 

 جا، وندا مۇنى جيىپ قويا سالايىق. ەندى، الداعى ۋاقىتتا جاڭا ەسىمدى تابۋ جالعاسىن تاپپاق. ولاي بولسا سوعان ءبىر ۇسىنىس جاسايىق. ماسەلەن سول جاڭا ەسىمدەردىڭ ىشىندە قازىرگىدەي بيزنەسمەندەر مەن مىندەتىن ورىنداپ جۇرگەن مەديتسينا ماماندارىن ەمەس ىبىراي جاحاەۆ سەكىلدى دالا اكادەميگىن، ءساليما جۇمابەكوۆا سەكىلدى تازا ەڭبەك ادامدارىن جانە كۇنى كەشە عانا ەلدى ءدۇر سىلكىندىرگەن قاراعاندى وبلىسى، جاڭارقا اۋدانىنىڭ ۋازيك كولىگىن ساماسوۆال ەتىپ وزگەرتكەن ويلاپتاپقىش ازاماتى مەن جامبىل وبلىسىندا قاراپايىم قويشىسى ءۇش دوڭعالاقتى موتوتسيكلدەن اۆتوكولىك جاساپ، ونى «قازاقۆاگەن» دەپ اتاعان ونەرتاپقىش تولەگەن يۋسۋپوۆ سىندى جانداردى تاڭداۋى كەرەك. سوندا عانا ءبىز ءادىل سايلاۋ، تازا تاڭداۋ جاساپ، ەل دامۋىنا ۇلەس قوسامىز. بولماسا ەڭبەگى ەش، تۇزى سور بولىپ جاتقان قانشا ونەرتاپقىشتار مەن عالىمداردىڭ ەڭبەكتەرى ەلەنبەي قالا بەرەدى دە، ەل بولاشاعى بۇلىڭعىرالانا بەرەدى. ەڭ قۇرىعاندا وسى سايلاۋ ءادىل بولسىنشى اعايىن! سوندىقتان جاڭا ەسىمدەردى تاڭداعاندا تۋىستىق پەن تانىستىققا قاراپ ەمەس، ەلگە بەرەرى بار ەڭبەگىنەن قاراپ تاڭداۋ جاسايىق.

ساكەن الداشباەۆ

Abai.kz