س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ۇجىمى ەلباسىنىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىن تالقىلادى، دەپ حابارلايدى  "Abai.kz" پورتالى "قازاقپاراتقا" سىلتەمە جاساي وتىرىپ.

ۋنيۆەرسيتەت رەكتورى اقىلبەك كۇرىشباەۆ ەلباسى بيىلعى جولداۋىندا اگرارلىق عىلىمعا جانە اگرارلىق ۋنيۆەرسيتەتتەردىڭ بەدەلىن كوتەرۋگە باسا نازار اۋدارىلعانىن جانە ناقتى تاپسىرمالار بەرىلگەنىن اتاپ ءوتتى.

"كانادا مەملەكەتىنىڭ اۋا رايى جاعدايى بىزدەگى سولتۇستىك قازاقستان ايماعىمەن بىردەي. بىراق، كانادادا اۋىل شارۋاشىلىعى سالاسىنداعى ەڭبەك ونىمدىلىگى بىزدىكىنەن 14 ەسەگە كوپ. گوللانديا - كىشكەنتاي عانا مەملەكەت، اۋماعى قازاقستاننان 66 ەسەگە كىشى. بىراق، سول گوللانديا جىلىنا 100 ملرد اقش دوللارىنا اۋىلشارۋاشىلىق ونىمدەرىن ەكسپورتتايدى. ال قازاقستان ەڭ كوپ دەگەندە 2,1 ملرد تەڭگەگە ءونىم شىعارادى. ياعني، گوللانديا كورسەتكىشىنەن 50 ەسە از. سوندىقتان، ۇلكەن الەۋەتىمىزدى پايدالانىپ، تابيعي-كليماتتىق جاعدايى ۇقساس ەلدەردىڭ ۇزدىك تاجىريبەلەرىن اكەلىپ، وزىمىزگە بەيىمدەۋ اسا ماڭىزدى", - دەدى رەكتور ەلباسى جولداۋىن تالقىلاۋعا ارنالعان جيىن بارىسىندا.

سونىمەن بىرگە، رەكتور ەلباسىنىڭ عىلىمي-زەرتتەۋ ۋنيۆەرسيتەتىن قۇرۋ تۋرالى تاپسىرماسى اياسىندا بىرقاتار جۇمىستاردىڭ اتقارىلعانىن اتاپ ءوتتى.

"اگرارلىق ءبىلىم بەرۋدە ۇزدىك دەپ سانالاتىن دەيۆيستەگى كاليفورنيا  ۋنيۆەرسيتەتىنىڭ عالىمدارىمەن بىرگە وقۋ باعدارلامالارىن وزگەرتىپ جاتىرمىز، تاجىريبەگە باسىمدىق بەردىك. ءبىزدىڭ عالىمدار مەن وقىتۋشىلار امەريكاعا باردى، ولار بىزگە كەلدى. وسىلايشا، شەتەلدىك سەرىكتەستەرمەن ۋنيۆەرسيتەتىمىزدىڭ دامۋ باعدارلاماسىن جاسادىق. بۇگىنگە دەيىن 6 باعدارلاما جاسالدى، بىراق، تاعى 62 باعدارلاما جاساۋ قاجەت. وعان مەملەكەتتىڭ قولداۋى كەرەك", - دەدى ا. كۇرىشباەۆ.

رەكتوردىڭ ايتۋىنشا، قازاتۋ-دا ءبىر بالانى وقىتۋعا مەملەكەت جىلىنا 346 مىڭ تەڭگە بولەدى. بۇل ستۋدەنتتەردىڭ عىلىمي زەرتتەۋ جۇرگىزۋىنە، وقىتۋشىلاردىڭ بىلىكتىلىگىن ارتتىرۋعا، وقۋ پروتسەسىن تۇبەگەيلى وزگەرتۋ ءۇشىن شەتەلدىك پروفەسسورلاردى شاقىرۋعا جەتپەيدى.

"سوندىقتان، ۇكىمەتتەن گرانت قۇنىن ۇلتتىق جوو دەڭگەيىنە - 635 مىڭ تەڭگەگە دەيىن كوتەرۋىن سۇرايمىز. ءبىزدىڭ ەسەبىمىزشە، جاڭا قۇنمەن بەس جىلعا 2,4 ملرد تەڭگە قاجەت. ءبىزدىڭ مەملەكەتتىڭ بۇعان مۇمكىندىگى جەتەدى.  ۇلكەن قايتارىمى دا بولادى. وسى جولداۋدان كەيىن ۇكىمەت ءبىزدىڭ دامۋ باعدارلامامىزعا قولداۋ بىلدىرەدى دەپ ۇمىتتەنەمىن", - دەدى ول.

ودان بولەك، رەكتور ۋنيۆەرسيتەتتىڭ شەتەلدىك ينۆەستيتسيالار تارتۋدى ۇيرەنگەنىن اتاپ ءوتتى. سوڭعى ءتورت جىلدا ۋنيۆەرسيتەتكە 1,2 ملرد تەڭگە ينۆەستيتسيا قۇيىلعان. سونىڭ ەسەبىنەن ۋنيۆەرسيتەت جانىنان وڭتۇستىك كورەيا، بەلارۋس، قىتاي جانە گەرمانيامەن بىرلەسكەن حالىقارالىق ورتالىقتار اشىلعان.

"وڭتۇستىك كورەيامەن بىرگە قۇرعان اقپاراتتىق تەحنولوگيا ورتالىعى استىق جيناۋ كەزىندە قازاقستاننىڭ بارلىق ءوڭىرىن عارىشتان باقىلاۋ مۇمكىندىگىن ۇسىندى. ەندى قازاقستانداعى بارلىق تابيعي رەسۋرستاردى عارىشتان باقىلاۋ بويىنشا تاپسىرىس الىپ، ۋنيۆەرسيتەتكە 500 ملن تەڭگە كولەمىندە تابىس اكەلىپ وتىر. قىتايلىق عالىمدارمەن بىرلەسىپ، تۇزعا ءتوزىمدى، شولگە ءتوزىمدى 40 اعاش ءتۇرىن جەرسىندىرۋ جۇمىستارى جۇرگىزىلىپ جاتىر. بۇل اعاشتار كەيىنىرەك استانانىڭ جاسىل بەلدەۋىنە وتىرعىزىلادى. ونىمدىلىگى 5 ەسە جوعارى جاڭا كارتوپ ءتۇرى دە قىتايلىق ماماندارمەن بىرلەسىپ جاسالعان.   

اۋستراليالىق عالىمدارمەن ءتۇرلى تابيعي جاعدايعا قاراماستان، ساپالى ءونىم بەرەتىن جاڭا بيداي سۇرىپىن شىعارۋ جوسپارلانعان", - دەپ ءسوزىن تۇيىندەدى اقىلبەك كۇرىشباەۆ.

سونداي-اق، ۋنيۆەرسيتەتتە ستۋدەنتتەر تاجىريبەسى ءۇشىن جىلىجايلار، ەگىستىكتەر، ەت، ءسۇت، مايلى داقىلداردى وڭدەيتىن تسەح جانە ناۋبايحانالار جۇمىسى ۇيىمداستىرىلعان.

Abai.kz