مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆ قىزمەتىنەن بوساتىلدى. بۇل تۋرالى اقوردانىڭ ءباسپاسوز قىزمەتى حابارلادى.

ونىڭ ورنىنا مادينا ابىلقاسىموۆا مينيستر بولىپ تاعايىندالدى.

ەستەرىڭىزگە سالا كەتەيىك، بۇگىن ۇكىمەتتىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ مينيستر دۇيسەنوۆاعا: "تامارا، جۇمىستان شارشادىڭ با؟" دەگەن ەدى.

"بىزگە مىندەتتى الەۋمەتتىك مەديتسينالىق ساقتاندىرۋدى كەيىنگە شەگەرۋگە تۋرا كەلدى. سەبەبى ءوزىن-ءوزى جۇمىسپەن قامتىپ جۇرگەن ازاماتتاردى زاڭداستىرىپ، رەسمي تۇردە تىركەۋ كەرەك. ولار سالىق تولەمەيدى، زەينەتاقى جۇيەسىنە قاتىسپايدى. بىلايشا ايتقاندا، "كولەڭكەدە" ءجۇر. مەن وسىنى بەس جىل بويى ايتىپ كەلەمىن. ناقتى تاپسىرمالار دا بەردىم. الايدا ول ازاماتتارمەن ەشكىم تىعىز اينالىسىپ جاتقان جوق. مينيستر دۇيسەنوۆاعا (ەڭبەك جانە حالىقتى الەۋمەتتىك قورعاۋ ءمينيسترى – اۆت.) دا تالاي رەت ايتتىم. نە بولدى؟ تامارا، ال ايتشى؟ الدە شارشادىڭ با مىنا جۇمىستان؟", – دەدى ن.نازارباەۆ.

Abai.kz