ىشكى ىستەر ورگاندارى بولىمدەرى مەن باسقارمالارىندا اعىلشىن ءتىلى كۋرستارى ۇيىمداستىرىلدى دەپ حابارلادى تاجىكستان ىشكى ىستەر مينيسترلىگىنىڭ ءباسپاسوز حاتشىسى ۋماردجوني ەمومالي.

"مينيستر بۇكىل قۇرامعا شەتەلدىكتەرمەن قارىم-قاتىناس ەتيكاسى مەن اعىلشىن ءتىلىن ۇيرەنۋدى جۇكتەدى. قىزمەتكەرلەر جۇمىستان بوس ۋاقىتتا بەلگىلەنگەن ساباقتارعا قاتىسۋعا مىندەتتى. قىزمەتكەرلەرىمىزدىڭ كوبى ورىسشا سويلەيدى، ارينە، ولاردىڭ اعىلشىن سوزدەرىن ءتۇسىنىپ، شەتەلدىك تۋريستەرمەن تىلدەسە الاتىن دارەجەگە جەتكەنى جاقسى بولادى", - دەيدى ءىىم وكىلى.

تاجىكستان بيلىگى سوڭعى جىلدارى ەلگە تۋريستەردى كوبىرەك تارتۋعا تىرىسىپ جاتىر. وسى ماقساتتا وتكەن جىلى ۇكىمەت جانىنان جاڭا قۇرىلىم – ءتۋريزمدى دامىتۋ جونىندەگى كوميتەت قۇرىلعان. ەل پرەزيدەنتى ەمومالي راحموننىڭ شەشىمىمەن 2018 جىل تاجىكستاندا تۋريزم جانە حالىق قولونەرى جىلى دەپ جاريالانعان.

تەرريتورياسىنىڭ 90 پايىزدان استامى تاۋلى ايماقتا ورنالاسقان تاجىكستاندا سپورتتىق تۋريزم، تاۋ جورىعى، ەتنوتۋريزم، رافتينگ جانە حالىقارالىق اڭ اۋلاۋ ءتارىزدى تۋريزم تۇرلەرى تانىمال. شەتەلدىك تۋريستەر جەرگىلىكتى ءتارتىپ ساقشىلارىنىڭ بوپسالاۋىنا ۇشىراعانى تۋرالى ءجيى شاعىنادى.

ءتۋريزمدى دامىتۋ جونىندەگى كوميتەتتىڭ مالىمەتى بويىنشا، وتكەن جىلى تاجىكستانعا الەمنىڭ 146 ەلىنەن 430 مىڭ ادام قىدىرىپ بارعان.

Abai.kz