بەلگىلى اقىن، قوعام قايراتكەرى، استاناداعى "نۇر وتان" پارتياسى قابىلداۋ ءبولىمىنىڭ حاتشىسى، "Abai.kz" اقپاراتتىق پورتالىنىڭ استاناداعى اۆتورى اۋىت مۇقيبەكتىڭ جاڭا كىتابى جارىق كوردى. كىتاپ "زاڭ تۇزەلدى قانداسىم، سەن دە تۇزەل!" دەپ اتالادى. "كوركەم" باسپاسىندا باسىلىپ، بەلگىلى جازۋشى داۋرەن قۋات پىكىر جازعان ەكەن.

"سوناۋ قاراڭعى تۇنەك زاماندا الاش ارداگەرلەرى قازاق، قىرعىز، تاتار، باشقۇرت سياقتى قارىنداس جۇرتتىڭ ءحالىن دۋما دەپۋتتارىنا ءبىلدىرىپ، پاتشا ۇكىمەتىنىڭ نازارىنا ۇسىنىپ، شىرىلداپ ەدى. ال، بۇگىن قازاق بالاسى قازاق بيلىگىنە «قايتسە، قازاق كوشى ىركىلمەي جول تابادى؟!» دەگەندى ۇقتىرۋ ءۇشىن جانىن شۇپەرەككە ءتۇيىپ، جانە جۇگىرىپ ءجۇر. وسناۋ ماسەلەنى مينيسترلەردىڭ ميىنا، دەپۋتاتتاردىڭ دىلىنە جەتكەنشە، كۇن تارتىبىنەن ءبىر ساتكە تۇسىرمەي، ايتىپ، جازىپ كەلەدى. اۋىت مۇقيبەكتىڭ قازىرگى ارەكەتىنەن سول ەسكى كۇننىڭ ەلەسىن كورگەندەي بولاسىز. توقىراپ بارىپ ارناسىنا قايتا تۇسكەن قازاق كوشى ەندى ىركىلمەك ەمەس، ماڭگىلىك ەلىمىزدىڭ ماڭگى توقتاماس ءبىر تولقىندى وزەنىنە اينالىپ، جوڭكىلە بەرمەك.
«زاڭ تۇزەلدى، قانداسىم، سەن دە تۇزەل!» كىتابى – سونىڭ ايقىن دالەلى",-دەيدى جازۋشى داۋرەن قۋات.

ايتىلعان پىكىرگە الىپ-قوسارىمىز جوق. "Abai.kz" پورتالى اۋىت مۇقيبەكتىڭ قازاق كوشى-قونى جايلى جازعان ەڭبەكتەرىن ۇزبەي جاريالاپ وتىردى.

باسقاسىن ايتپاعاندا، سوڭعى بەس-التى جىلدىڭ شەگىندە پرەزيدەنت نازارباەۆتىڭ قازاقستان تاۋەلسىزدىگىن الماي تۇرىپ جولعا قويعان "كوشى-قون" ساياساتىن قولداۋ، الىستاعى اعايىننىڭ اتاجۇرتىنا كەلۋىنە جاعداي جاساۋ جولىنداعى اۋىت مۇقيبەكتىڭ اتقارعان شارۋالارى ۇشان-تەڭىز.

جوعارىداعى كىتاپ اۋىت مۇقيبەكتىڭ ۇزاق جىلعى جانكەشتىلىگىنىڭ كەزەكتى جەمىسى دەپ باعالادىق.

Abai.kz