«اق جول» پارتياسى تابىس تۋرالى دەكلاراتسياداعى بولماشى عانا ايىرماشىلىقتارعا بولا ۇمىتكەرلەردى سايلاۋدان شىعارۋدان باس تارتۋدى ۇسىنادى – بۇل تۋرالى سەيسەنبى كۇنى ورتالىق سايلاۋ كوميسسياسىندا «سايلاۋ تۋرالى» زاڭعا ەنگىزىلگەن وزگەرتۋلەردى تالقىلاۋ بارىسىندا ازات پەرۋاشەۆ مالىمدەدى.

ول وسىدان ەكى جىل بۇرىن ءدال مۇنداي سىلتاۋمەن «اق جول» پارتياسىنىڭ اتىنان جەرگىلىكتى ماسليحاتتارعا ۇسىنىلعان 100-دەن استام ۇمىتكەر سايلاۋدان الىنىپ تاستالعانىن ەسكە سالدى. ارىدەن سوڭ، كەي - كەزدەرى سول دەكلاراتسياداعى تابىس تۋرالى مالىمەتتە 70-100 تەڭگە كولەمىندە عانا بىلەر-بىلىنبەس ايىرماشىلىقتار ەدى.

دەموكراتيالىق پارتيا مۇنداي تاجىريبە سىبايلاس جەمقورلىقپەن كۇرەسۋگە ەمەس، قولايسىز باسەكەلەستەردى جويۋعا قىزمەت ەتەدى دەپ سانايدى. سوندىقتان ا.پەرۋاشەۆ دامىعان دەموكراتيالىق ەلدەردىڭ ۇلگىسىندە ايىرماشىلىقتاردى انىقتاپ، كانديداتتارعا سايلاۋدان شىعارىلماي، قوسىمشا دەكلاراتسيالاردى ۇسىنۋعا نەمەسە ەڭ بولماعاندا رۇقسات ەتىلگەن كەلىسپەۋشىلىكتەردىڭ دالمە-ءدال شەگىن بەلگىلەۋگە مۇمكىندىك بەرۋدى ۇسىندى.

«اق جول» كوشباسشىسى سايلاۋ پروتسەسىنە قازىرگى زامانعى تەحنولوگيالاردى بەلسەندى تۇردە ەنگىزۋ جونىندە ۇسىنىس جاسادى. سەبەبى، بۇگىنگى كۇنى ينتەرنەت جەلىسىنە قوسىلۋ كەڭىنەن جۇزەگە اسىرىلۋدا، ءىرى قالالاردا دەرلىك بۇكىل اۋماق بەينەباقىلاۋ جۇيەسىمەن قامتىلعان.

«وسىعان بايلانىستى «اق جول» پارتياسى سايلاۋ كۇنى بارلىق سايلاۋ ۋچاسكەلەرىندە ينتەرنەت ارقىلى اشىق كورسەتىلىم جۇرگىزۋگە مۇمكىندىك بەرەتىن وسىعان ۇقساس بەينەباقىلاۋدى ورناتۋدى ۇسىنادى»، - دەپ باسا ايتىپ ءوتتى.

ونىڭ ايتۋىنشا، سول كەزدە عانا باقىلاۋشىنىڭ دا، كەز-كەلگەن وزگە مۇددەلى تۇلعانىڭ دا جالعان سايلاۋشىلاردىڭ قيتۇرقى «اتكەنشەك» ءادىسى بويىنشا داۋىس بەرۋ ارەكەتىن، سايلاۋ بيۋللەتەندەرىن توپتاپ سالۋ ىقتيمالدىعىن ، داۋىستاردى قاتە ساناۋ جانە باسقا دا زاڭعا قايشى بۇزۋشىلىقتاردى قاداعالاۋعا مۇمكىندىگى بولادى.

«مۇنداي قوعامدىق باقىلاۋ داۋىس بەرۋ ءراسىمىنىڭ اشىقتىعى مەن سەنىمدىلىگىنىڭ ۇزدىك كەپىلى بولا الادى»، - دەگەن سەنىم ءبىلدىردى ا. پەرۋاشەۆ.

دەموكراتيالىق پارتيانىڭ جەتەكشىسى تاعى ءبىر قىزىقتى اڭگىمەگە توقتالا كەتتى، وعان سايكەس ساياسي پارتيالار ساياسي پىكىر سايىستاردى دەربەس ۇيىمداستىرۋعا قۇقىلى بولا الادى.

«ءبىز بۇل باستامانى وتە كوڭىل قۇپتارلىق دەپ سانايمىز، بۇل ساياسي باعدارلامالاردىڭ ءتۇپ ماقساتىن تولىق اشىپ كورسەتۋگە، سايلاۋشىلاردىڭ اقپاراتتىق تۇرعىدان ءاردايىم حاباردار بولۋىن  ارتتىرۋعا مۇمكىندىك بەرەدى»، - دەپ اتاپ ءوتتى.

دەپۋتات وتكەن سايلاۋدىڭ تاجىريبەسىن تىلگە تيەك ەتە وتىرىپ، ورتالىق تەلەارنالار ەفيرىندە جۇرگىزىلگەن رەسمي پىكىرسايىستار ۋاقىت پەن تاقىرىپ بويىنشا شەكتەلگەنىن دە مىسال ەتىپ كورسەتتى. «2-5 مينۋتتا پارتيا تۋرالى نە بىلۋگە بولادى؟ تۇسىنەر ەدىم، ەگەر سايلاۋ ناۋقانى بارىسىندا ءار ءتۇرلى وزەكتى تاقىرىپتاردا، ءار ءتۇرلى فورماتتا پىكىرتالاستىڭ تۇتاستاي ءبىر توپتاماسى وتكىزىلەتىن بولسا»، - دەگەن ويىن ازات پەرۋاشەۆ اشىق ايتتى.

ونىڭ پىكىرىنشە، پىكىرتالاس الاڭدارى رەتىندە تاۋەلسىز ۇيىمداستىرۋشىلار – مەملەكەتتىك ەمەس ۇيىمدار، بۇقارالىق اقپارات قۇرالدارى بولۋى ءتيىس ەدى. وسىنداي پىكىرتالاستاردىڭ ماڭىزدى فاكتورى ولاردىڭ ينتەرنەتتە نەمەسە الەۋمەتتىك جەلىلەردە تىكەلەي ەفيردە كورسەتىلۋى كەرەك، بۇل وتكىر ساياسي داۋدىڭ ماڭىزدىلىعىن، اۋديتوريانىڭ سەنىمىن جانە ءتۇسىندىرۋدىڭ ايقىندىعىن، وبەكتيۆتىلىگىن ارتتىرادى.

«ءبىز ادىلەت مينيسترلىگىنە «سايلاۋ تۋرالى» زاڭعا تۇزەتۋلەردى ازىرلەۋدى قولعا الۋ فاكتىسى ءۇشىن العىسىمىزدى بىلدىرەمىز، بۇل كورسەتىلگەن وزگەرتۋلەر الدەقاشان ابدەن جەتىلىپ پىسكەن»، - دەپ تۇيىندەي كەلە پەرۋاشەۆ قۇجاتتى ەگجەي-تەگجەيلى سارالاپ، تالداۋ پارلامەنتتە تالقىلاۋ كەزىندە وتكىزىلەتىن بولادى دەپ ءوز ءسوزىن ءتامامدادى.

Abai.kz