قاھارلى قۇدىرەت

ول سوڭعى 10 كۇن ىشىندە ادامداردىڭ زىعىردانىن قايناتتى. اشەيىندە كەشكى استان سوڭ ىدىس-اياعىن جۋماي ءۇندى، تۇرىك سەريالدارىن قاراۋعا وتىرا كەتەتىن «حانىمداردىڭ» قولىنا ءبىر شەلەك كومىر مەن شىرپى ۇستاتىپ قويدى. كوشەدە جەلدىڭ وتىندە جۇرسە دە، كاپرون شۇلىق كيەتىن قىزداردىڭ ءناپسىسىن تاۋبەسىنە ءتۇسىردى. تۇندەلەتىپ، كوشەنىڭ بۇرىش-بۇرىشىنان تاماق قالدىعىن ىزدەپ كەتەتىن يتتەردى كۇركەگە تىقتى. كوشە بويىندا  تاڭعى، تۇسكى، كەشكى ۋاقىتتاردا ادام اياعى كوپ جۇرەتىن جەرلەردە وتىراتىن بايىرعى مەملەكەتتىك قىزمەتكەر، دارىگەر، بۋحگالتەر، مۋزىكانت بولعان جانداردىڭ ءتۇر-ءتۇرىن جيناپ ءبىر لاشىققا تىقتى.

ارا-اراسىندا قاسقىردىڭ نە جەلدىڭ داۋسى ەكەنى بەلگىسىز تەرەزەلەردىڭ تىعىنىنان اندا-ساندا ءان سالىپ قويادى. بەت  قارىعان ىزعاردان قالىڭ بەتتەر دە ۇيالىپ، قىزاراتىن بولدى. ءۇي تۇرعىندارىنان ۇيالعاندىقتان داۋىلدى كۇندەرى كوپپاتەرلى  تۇراقجايلاردىڭ توبەسى پاتىرلاۋعا كوشتى. كۇندىزگى تىنىق كەزدە ءۇن-ءتۇنسىز مۇلگىپ تۇرادى دا، قاراڭعى شىمىلدىعىن جازا سالا قايتا انىنە سالادى. اراسىندا ليريكالىق، بىردە روك، دجاز، رەپ  باعىتتارىندا ءان سالۋ ءۇشىن اسپاپتارىن سايلاپ، ۇقساتا الماسىن بايقاعان سوڭ تىنىشتالا قويادى.  جازدى كۇنى ينەسىن قاداپ شاعىپ العان اراداي تۇلا بويىڭدى تىتىركەندىرەدى. مىنە، ساعان جاز بويى مەنى اڭساپ ەدىڭ دەپ، دولى كۇشىنە ەنەدى. قانشا دولى بولسا، تابيعات پەن قۇدايدىڭ الدىندا ءوز ءامىرىنىڭ ۋاقىتشا ەكەندىگىن بىلە مە ەكەن، ايتەۋىر، تۇسكى ساعات ءۇش شاماسىندا كوڭىلدەنىپ، جىلى نۇرىن توگەدى.

انە، ول تاعى دا اشۋىنا ءمىندى. ايالداماعا تاياۋ ماڭدا اۋىر سومكەسىن ارقالاپ، جەڭىل كۇرتەمەن جالاڭ باس كەتىپ بارا جاتقان بويجەتكەننىڭ نازىك ساۋساقتارىن قاۋقارىنان ايىرىپ،  كوزىنەن جاس اعىزدى.

جاساندى ينتەللەكت

جاس ىزدەنۋشى تاعى مىنەزىن تيعان. العاشقىدا ۇستەل ۇستىنە قارا جۇمىستان كۇس-كۇس بولعان قولىن قويۋعا جاسقاناتىن. ءتىپتى، كىتاپ وقىعاندا سىرتىنان بايدىڭ ايەلى دوبالداي قولدارىن كورىپ قويادى ما دەپ قىسىلاتىن.  الگى ءۇيدىڭ وزىنەن 3 جاس ۇلكەن قىزى مەن اناسىنىڭ ءبىر-بىرىنە سىپايى سويلەيتىنىنە تاڭداناتىن. ءوزى سەكىلدى ماتروستاردىڭ قىلىعى مەن باي بالاسىنىڭ دارەجەسى جەر مەن كوكتەي دەپ ويلايتىن. ەندى مىنە، ارادا ءبىر جارىم جىل وتكەندە اقسۇيەكتەر اۋلەتىنىڭ سىرتتاي ءبىلىمدى، وركەنيەت كوشىنەن قالماعان، عىلىم-ءبىلىمنىڭ سان سالاسىن جاستايىنان ءبىلىپ وسكەن اقساۋساق جىگىتىنىڭ ناداندىعىنا قايران قالىپ وتىر. ىشىنەن «مىنالاردىڭ  ۋنيۆەرسيتەتكە العان ءبىلىم قايدا كەتكەن؟ وسىنشا ۋاقىت مىنا مەندەي ماتروسقا قاراعاندا جوعارى تاپ وكىلى سانالاتىن  «زاڭقويلاردىڭ ەركەتوتايلارى جاساندى ينتەللەكت» ەكەن» دەۋمەن كەڭ ۇيدەگى ورتادان جيىركەنىپ كەتتى.

لاشىقتان شىققان اقىلدىلار

ومىرىندە ءدال وزىندەي ويلايتىن ادامعا جولىعارمىن، ءتىل تابىسىپ، شەر تارقاتۋعا تۇرارلىق ساتتەردە كوسىلىپ سويلەرمىن دەپ ويلاماعان. جاڭا تانىسى ودان دا باسقا جاڭاشىل يدەيالارعا باسىمدىق بەرەتىن دوستارىمەن تانىستىردى. قالانىڭ كەدەيلەرمەن جان-جاقتان جينالعان كەلىمسەكتەر مەكەن ەتەتىن شەتكى ايماعىنا بارۋعا كۇننىڭ ەكىنشى بولىگىن ارنادى. سپەنسەردىڭ كوزقاراستارىن تالقىلادى.

ءبىر تاڭعالارلىعى، جاڭا تانىسقان جولداستارىنىڭ بارلىعى جوعارى وقۋ ورنىن بىتىرمەگەن.  ەشقانداي ءدىندى ۇستانبايدى. بىراق، جاراتۋشىنىڭ بارىنا تىلسىم كۇشتىڭ ءيىرىپ اكەتەتىنىنە سەنەدى. كەيبىرى ورتا ءبىلىمدى دە تولىق الماعان. كوپبالالى وتباسىندا دۇيەگە كەلىپ، 9-11 جاسىنان باستاپ تەڭىزدەن ناپاقاسىن تاۋىپ جۇرگەن جاستار.  ارقايسىسىنىڭ كوزىندە وت پەن الىسقا جەتەلەيتىن ءۇمىت بار. ءالسىز جانعان شىراقتى ءسوندىرىپ الماس ءۇشىن ءار اپتانىڭ سوڭىندا وزدەرىن بولاشاقتىڭ زيالى قاۋىمى سانايتىن قارا جۇمىسشىلار تار  بولمەگە جينالادى.  تاڭعا دەيىن ءسوز جارىستىرۋدان، «ۇيقىنى دەمالىسقا جىبەرۋدەن»  تايىنبايدى.

كوز كامەراسى

جاڭاشىلدىق پەن جاسامپازدىقتى تۋ ەتكەن جاستاردىڭ الدىندا ول ءوزىن اقىماق كورسەتتى. دەگەنمەن، اقىماق بولمادى. جاي عانا اقىماق بولىپ كورىنگىسى كەلدى.  سورەدە تۇرعان كىتاپتاردى مىسىقشا تىمىسكىلەپ، قۇپيا قازىنانىڭ قۇلپىن اشقانداي اڭتارىلىپ ءجۇردى. دىمىن بىلدىرمەي باسەكەلەستەرىنىڭ شاماسىن بايقادى. وزىمسىنگەن ادامدارعا بوتەنسىمەدى. اۋىق-اۋىق  قارسى الدىنداعىلاردىڭ كوزىنە قارايدى. كىم بىلەدى، ارقايسىسىنىڭ ىشىندە ءبىر پەرىشتە، ءبىر زۇلىم جاتقان شىعار دەگەن ويمەن كۇدىكتەنە كوز تاستايدى.  كوز كامەراسىنا قولايسىز ەشتەڭە تۇسە قويماعان سوڭ بۇرىشتاعى پيانينونى ەرمەك ەتەدى.

قايتارىمسىز ەڭبەك

سوڭعى كۇندەرى تىعىز كۇن تاربىنەن ابدەن تيتىقتادى. جانارى توڭكەرىلىپ، قىزارا قارايدى. تۇنگى ۇيقىنى شام جارىعىمەن وتىرىپ قارايتىن ەسكى قولجازبالارعا ايىرباستاعان. 4 ساعات ۇيىقتاعان اتى بولماسا، ەشبىر سەريالدان كەم ەمەس شىم-شىتىرىق تۇستەردى كورىپ شىعادى. اشىعان ميى دا ءالسىن-ءالسىن سولق ەتە قالعانىمەن شىداۋعا ۇيرەنگەن. ول دا ءبىر كۇنى تەكەتىرەسكە تولى ەڭبەك مايدانىندا جارىلىپ كەتۋى مۇمكىن. قىزىلىڭىردەن ۇستەلگە سالبىراعان باسى ءتۇن جارىمىنا شەيىن ءبىر كوتەرىلمەيدى. تۋرا ءبىر كۇنگە قاراپ وسەتىن كۇنباعىس سەكىلدى. ۇيقى شاقىرىپ، سانا ماڭگىرە باستاعاندا، قاعاز بەتىن جاۋلاپ العان ارىپتەر تىم-تىراقاي قاشا جونەلەدى.

شاپاعات سەردالى

Abai.kz