ءبىزدىڭ وبلىستاعى قالا مەن اۋدان اكىمدەرىنىڭ اراسىندا «ولمەسە بەرىلمەيتىندەي» ەرەكشە ءبىر باسەكە ءجۇرىپ جاتىر. ونىسى قايسىسى شەتەلدىك ەڭ قىمبات ماشينا ءمىنىپ، وزگەلەردى شاڭ قاپتىرىپ كەتەدى ەكەن دەگەن ولسە دە بەرىسپەس تايتالاس.  «مۇنداي ايرىقشا كولىك بيۋدجەتتىڭ ەسەبىنەن الىنادى عوي، ياعني حالىقتى اقشاسى جۇمسالادى. ازداپ بولسا دا قاراپايىمدىلىق تانىتالىق» دەگەن وي ەشقايسىسىنىڭ دا ويىنا كىرىپ-شىقپايدى.

قوستاناي وبلىسىنا قاراستى اۋدانداردىڭ اكىمىدەرى جاپپاي ءمىنىپ جاتقان تۇلپار وسى...

ال ەندى باسەكەگە  اينالعان قانداي كولىك دەيسىز عوي؟ ول ءبىزدىڭ شەنەۋنىكتەردىڭ ىلعي تۇسىنە كىرىپ جۇرەتىن اتاقتى «Toyota Land Cruiser 200» دەگەن سۇلىكتەي سىلاڭداعان شەتەلدىك اسا ىڭعايلى دا، ادەمى كولىك. باعاسى دا ادام قىزىعارلىقتاي. ەڭ سورلىسى دەگەنىنىڭ ءوزى 20 ميلليون تەڭگەدەن اسىپ جىعىلادى. ولار ءتىپتى بۇدان ءسال دە بولسا ارزانداۋ، الايدا الگى ماشينادان ەش كەمدىگى جوق  «Toyota Land Cruiser Prado» ماشيناسىن دا مەنسىنبەيدى. ال ونى ارى كەتسە 15-16 ميلليون تەڭگەگە وپ-وڭاي الۋعا بولادى.

ايىرماشىلىعى شامالى، تەك جايلىلىعى ياعني كومفورتى ەرەكشە دەمەسەڭ. پالەنىڭ ءبارى مىنە وسى كومفورت دەگەنگە تىرەلىپ تۇر ەمەس پە؟ ايتپاقشى، Prado سەكىلدى جول  تالعامايتىن ءدجيپتى بىلاي قويىپ، جەر بەتىندە ءسان-سالتاناتى ەش ماشينادان كەم ەمەس «Mercedes-Benz»، «Audi»، «Volkswagen»، «Nissan»، «Renault»، «Ford»، «ۋاز»، «ۆاز» جانە «KIA» ماركالى كولىكتەر جىرتىلىپ-ايرىلادى ەمەس پە؟ جوق، ءبىزدىڭ شەندىلەر ولاردىڭ بىرىنە دە وتىرمايدى. ال   ءوز وبلىسىمىزدا شىعارىلاتىن JAC, Peugeot, Ravon جانە Iveco ءتارىزدى ماشينالارعا ءتىپتى دە مۇرىن شۇيىرە قارايدى. دەمەك، بىزدەگى شەنەۋنىكتەر ەلباسىنىڭ ءوزىمىزدىڭ اۆتوموبيل زاۋىتتارى وندىرەتىن ونىمدەرگە كوبىرەك كوڭىل ءبولۋ كەرەك دەگەن ءسوزىن قۇلاعىنا ىلمەگەنى عوي. بۇدان كەيىن بۇل جەردە ولارعا «سەن نەگە ەلىمىزدىڭ پاتريوتى بولىپ، ءوز كولىگىمىزدى نەگە مىنبەيسىڭ؟» دەپ ايتۋعا دا ۇيالادى ەكەنسىڭ،

جالپى بىزدەگى وسىنداي شەنەۋنىكتەردىڭ وزدەرىنە دەگەن اسا مىرزالىق قاسيەتى استاناداعى پارلامەنتتىڭ دە قۇلاعىنا جەتىپتى. «ماشينالاردى ساتىپ الۋداعى باعا ايىرماشىلىعى بەس ميلليون تەڭگەدەن دە اسىپ جىعىلادى، - دەيدى ءماجىلىس دەپۋتاتى ءابساتتاروۆ. - ماسەلەن، پاۆلودار قالاسى اكىمىنىڭ اپپاراتى «Toyota Land Cruiser 200» ماشيناسىن ساتىپ الۋعا دەپ 20 ميلليون تەڭگە بەلگىلەسە، ال قوستاناي وبلىسىنىڭ اۋليكول اۋدانى اكىمىنىڭ اپپاراتى 25 ميلليون 125 مىڭ تەڭگە بولگەن».

دەپۋتات قانشا دەگەنمەن الىستا تۇرادى عوي، سوندىقتان دا تىم سىپايىلاپ ايتقان شىعار. ال ونىڭ جاڭاعى 20 ميلليون دەگەنىن بىزدە ونشا ۇلكەن اقشا سانامايدى، ماسەلەن، وسىنداعى  دەنيسوۆ اۋدانىنىڭ اكىمى ەرلان جامانوۆ «قۇلاساڭ ناردان قۇلا» دەگەندەي، الگىندەي سايگۇلىكتى 26 ميلليون تەڭگەگە ساتىپ الىپ، وزگە شەنەۋنىكتەردىڭ بارلىعىن دا جەرگە قاراتىپ كەتكەن. سونداي «ىسكەرلىگىنىڭ» ارقاسى شىعار قازىر ول سوناۋ يت ارقاسى قيانداعى دەنيسوۆ اۋدانىنان قالا ىرگەسىندەگى جاقىن دا جايلى ءوڭىر التىنسارين اۋدانىنا اكىم بولىپ تاعايىندالدى.

ەرلان جامانوۆ دەگەن اكىمىمىز وسى كىسى

«جامان ادەت جۇققىش كەلەدى» ەمەس پە،  مۇنداي مىرزالىقتى كورگەن وزگەلەرى دە ىسىراپشىلىقتىڭ كوكەسىن تانىتتى. قازىر ءدال سونداي كولىك الىپ ۇلگەرمەسە، تاعىنان ءتۇسىپ قالاتىنداي كەزەك-كەزەك ءبىر-ءبىر تۇلپاردان تاڭداپ ءمىندى. مىسالى، «Toyota Land Cruiser 200» كولىگىن ناۋرزىم اۋدانىنىڭ اكىمى 25 ميلليون 629 مىڭ تەڭگەگە، ارقالىق قالاسىنىڭ اكىمى 25 ميلليون 600 مىڭعا، سارىكول اۋدانانىڭ اكىمى 25 ميلليون 793 مىڭعا، جىتىقارا اۋدانانىڭ اكىمى 22 ميلليون 624 مىڭعا، تاران اۋدانانىڭ اكىمى 21 ميلليون 109 مىڭعا ساتىپ الىپ، حالىقتىڭ اقشاسىنىڭ تەگىن كەلگەن دۇنيە ەكەندىگىن ايداي الەمگە ايگىلەپ تاستادى. ال ەندى مۇنداي ىسىراپشىلدىق پەن مەنمەنسىنۋگە وبلىس اكىمى ارحيمەد مۇقانبەتوۆ قالاي قارايدى دەيسىزدەر عوي. ول كىسىگە ءبارى ءبىر سياقتى. ءتىپتى ءوز قاراماعىنداعى اكىمدەردىڭ كولىكتەرىنە قارامايتىن دا سەكىلدى. اكىم بولعان سوڭ قىمبات ماشينا مىنگەندە تۇرعان نە بار دەيتىن شىعار. ال حالىقتان جينالعان قارجى شە؟ ال ءبىز وسى كۇنگە دەيىن وبلىس اكىمىنىڭ قاراماعىنداعىلارعا  «سەندەر نەگە شەتەلدىك قىمبات ماشيناعا قۇمارسىڭدار؟ وزىمىزدە شىعارىلاتىن كولىكتى  الىپ، بىرىنشىدەن بيۋدجەتتىڭ اقشاسىن ۇنەمدەپ، ەكىنشىدەن وتاندىق ءوندىرىستى قولداۋعا نەگە ونەگە تانىتپايسىڭدار؟» دەگەنىن ەستىگەن ادام جوق.

ايتپاقشى، اۋدان جانە قالا اكىمدەرىنىڭ الگىدەي قىمبات كولىكتەرىن ساتىپ الۋعا دەپ بيۋدجەتتەن اناۋ-مىناۋ ەمەس  462 301 413,28 تەڭگەنى قينالماي-اق بەرە سالىپتى. قالامىزدا بالاباقشالارعا دەگەن زارۋلىك تالاي جىلداردان بەرى شەشىلمەي كەلە جاتقاندىعىن، ال ۇيگە كەزەكتىڭ جاقىن ۋاقىتتا جويىلا قويمايتىندىعىن، وبلىس تۇگىلى قوستاناي قالاسىنىڭ وزىندەگى كوشەلەردىڭ ابدەن قيۋى كەتكەندىگىن ەسكەرسەك مۇنداي «مىرزالىقتىڭ» قيسىنعا سىيمايتىن قيسىقتىق ەكەندىگىن مويىنداعان ءجون.

جايبەرگەن بولاتوۆ

Abai.kz