قىزدى قۇشاقتاي بەردىم...
ومىرىمدە ۇشاققا وتىرىپ كورمەگەن بايعۇس باسىم، دەمدە اعارىپ كەتتى، قاپ-قارا شاشىم... قاراعاندى – الماتى باعىتىنداعى «ەير استانا» Boeing-757 ۇشاعىنىڭ ستيۋاردەسساسى بەتىندە بىردەڭە جۇرگەندەي، سول يىعىنداعى شايتانى سىقىلىقتاپ كۇلگەندەي، كوزدەرى وت بولىپ، ورىسشا ايتسام، ءبىر ءتۇرلى شوك بولىپ: "بەنزين قۇيۋدى ۇمىتىپ كەتكەندىكتەن، الماتىعا قونا المايمىز. استاناعا قونامىز..." دەگەنى. اشەيىن ايتامىن، تەحنيكالىق اقاۋ شىعىپتى!
زارەمنىڭ ۇشقانى سونشالىق، قاسىمدا وتىرعان بەيتانىس قىزدى قۇشاقتاي الدىم! ء"ولدى، سوسىن كومدى!" دەگەن وسى! ءبىزدىڭ ۇشاقتار اجال ۇشاقتارى! تالايلاردىڭ تاعدىرىن جۇتقان ۇشاقتار!
– كەشىرىڭىز اعاي، نەمەنەگە قۇشاقتاپ وتىرسىز؟ – دەپ سۇرادى بويجەتكەن.
ونىڭ دا تۇرىنە قىشقىل بىردەڭە تامىپ كەتكەندەي ەدى.
– "بىرگە ولەيىك" دەگەنىم عوي.
– نە حوچۋ س ۆامي! ءسىزدى تانىمايمىن عوي؟
– كاكايا رازنيتسا؟
– ينتەرەسنو! تانىمايتىن، بۇرىن كورمەگەن اداممەن قالاي قۇشاقتاسىپ، بىرگە ولەمىن؟ نە ۋدوبنو...
ۇشاق جەرگە قاراي قۇلديلاپ، سىلكىلەي جونەلگەندە، كوزدەرىمدى تارس جۇمىپ، قىزدى تاعى دا قۇشاقتاي الدىم. ونىڭ دا جانى جەتى ءجۇز ەمەس قوي، مەنى قۇشاقتاپ، باسىن يەگىممنىڭ استىنا تىعىپ الىپتى.
– مەنى قۇشاقتاپ الىپسىز؟ تانىمايتىن ادامدى؟ – دەدىم مەن.
– يزۆەنيتە... بىلەسىز بە؟ مەن ءمينيستردىڭ قىزىمىن عوي.سىزدەي "پروستوي" اداممەن بىرگە ولگىم كەلمەيدى...
قازاقشانى قاقالىپ سويلەسە دە، سۇلۋ قىز ەكەن. مەن ونى قۇشاقتاپ، بەتىنەن ءسۇيىپ–سۇيىپ الدىم. اقىرى ءولىپ بارادى ەكەنبىز، ءبىر مەزگىل كوڭىل كوتەرىپ قالايىق تا؟
– نە ىستەپ جاتىرسىز؟ – دەپ سۇرادى ول.
– و دۇنيەگە ءسىزدى ءسۇيىپ اتتانايىن دەپ...
– ۋجاس...
– مەن باقىتتىمىن! ءمينيستردىڭ قىزىن قۇشاقتاپ وتىرمىن!
ول اكەسىنە ۇيالى تەلەفون سوقتى.
– پاپ، سامولەتىمىز قۇلاپ بارادى ما؟ نە زنايۋ. ءبىر دۋراك مەنى قۇشاقتاپ وتىر... نە ىستەيمىن؟ – دەگەن بويجەتكەن جىلاي باستادى. قوسىلىپ مەن دە جىلاپ وتىرمىن. و، جارىق دۇنيە! قادىرىڭدى جەر بەتىندە بىلمەيدى ەكەنبىز-اۋ؟
اتىسىپ، شابىسىپ، قۇشاقتاسىپ، سوسىن پىشاقتاسىپ... ءبىر كەزدە ۇشقىش: "استاناعا قوندىق. ساۋ بولىڭىزدار!" دەپ حابارلادى. قۋانعانىم-اي! جاتا قالىپ، جەردى ءسۇيىپ جاتسام، ءمينيستردىڭ قىزى يىعىمنان تۇرتەدى. جالت قاراپ ەدىم:
– دۋراك! – دەدى.
– دۋرا! – دەدىم مەن. ءسويتتىم دە، قىزدىڭ قارسىلىعىنا قاراماستان قۇشاقتاي الدىم. جەر باسىپ تۇرعانىنا ءماز بولعان ءمينيستردىڭ قىزى جىميدى...
مۇحتار شەرىم
Facebook-تەگى پاراقشاسىنان
