باق-تىڭ رەسمي ساۋالىنا جاۋاپ بەرگەن باس پروكۋراتۋرا ەرجان تاتىشەۆتى ءولتىرۋدى ۇيىمداستىرۋ فاكتىسى بويىنشا ابليازوۆكە قاتىستى تەرگەۋ جۇرگىزىلىپ جاتقانىن ايتقان.
"مۇحتار ءابليازوۆتى ەكستراديتسيالاۋ جانە ودان ارى قىلمىستىق جاۋاپقا تارتۋ ماسەلەسى سوتقا دەيىنگى تەرگەۋ اياسىندا قازاقستان زاڭدارىنا جانە حالىقارالىق كەلىسىمدەرگە ساي قارالادى" دەگەن باس پروكۋرتۋرا.
2004 جىلى جەلتوقساندا اڭعا شىققاندا مەرت بولعان ەرجان تاتىشەۆتىڭ قازاسىنان كەيىن "تۇرانالەم" بانكى باسشىلىعى قايعىلى وقيعانىڭ ساياسي استارى جوق ءارى باسەكەلەستىك تارتىستىڭ كەسىرى دەپ سانامايتىندارىن مالىمدەگەن. ال 2017 جىلى قۇزىرلى ورگاندار "كازسترويستەكلو" كومپانياسىنىڭ بۇرىنعى يەسى مۇراتحان توقمادي "ەرجان تاتىشەۆتى اڭعا شىققاندا قاساقانا ولتىرگەنىن جانە وزىنە تاپسىرىستى مۇحتار ءابليازوۆ بەرگەنىن مويىنداعانىن" مالىمدەگەن.
جامبىل وبلىستىق سوتى ناۋرىزدىڭ 16-سى كۇنى "تۇرانالەم بانك" باسشىسى ەرجان تاتىشەۆتىڭ قازاسى بويىنشا بيزنەسمەن مۇراتحان توقماديدى ايىپتى دەپ تانىپ، 10 جىل 6 ايعا سوتتاعان.
2017 جىلدىڭ ءساۋىر ايىندا ءابليازوۆ شەتەلدە تۇراتىن قازاقستاندىق جاقتاستارىمەن بىرگە "قازاقستاننىڭ دەموكراتيالىق تاڭداۋى" (قدت) قوزعالىسىن قۇراتىنىن جاريالاعان. قوزعالىستىڭ ماقساتى "قازاقستاندا دەموكراتيالىق رەفورمالاردى جۇزەگە اسىرۋ" دەگەن. استانا سوتى 13 ناۋرىزدا قازاقستاندا قدت قىزمەتىنە تىيىم سالىپ، "ەكسترەميستىك توپ" قۇرامىنا ەنگىزگەن.
Abai.kz
