ايىپتالۋشىلاردىڭ ىشىندە 70 جاستاعى اجە، 44 جاستاعى ۇلى، كەلىنى، قىزى جانە كۇيەۋ بالاسى بار. ولاردىڭ ءبارى بىلتىر تۇركيا-سيريا شەكاراسىندا ۇستالعان. سوت وتىرىسى حۋدجاند قالاسىندا جابىق ەسىك جاعدايىندا سەيسەنبى كۇنى باستالعان.

تەرگەۋ ىسىندەگى دەرەككوز مالىمەتىنشە، ءبىر وتباسىنىڭ جەتى بىردەي مۇشەسى سوتتالىپ جاتىر. وتباسىنىڭ ەكى مۇشەسى - ءبىرى كامەلەتتىك جاسقا تولماۋىنان، ەكىنشىسى پسيحيكالىق اۋرۋىنا بايلانىستى سوتقا تارتىلماعان.

«ءبىر وتباسىندا بارلىعى 29 ادام بولعان. ولار سيرياعا ءۇش شاعىن اۆتوبۋسپەن بارعان. ەكى اۆتوبۋس تۇرىك-سيريا شەكاراسىنان ءوتىپ كەتكەن. 9 ادامى بار ءۇشىنشى اۆتوبۋس ۇستالعان. ولاردى جىل باسىندا تاجىكستانعا قايتارعان»،- دەيدى دەرەككوز.

تاجىكستان بيلىگى ازىرگە ايىپتالۋشىلاردىڭ اتى-ءجونىن اتامايدى. سوت وتىرىسىنىڭ العاشقى كۇنى ولار سيرياعا "جيحادقا" بارماق بولعانىن مويىنداعان. ولار تۋعان جەرىندە بيلىك ءدىني قۇقىقتارىنان ايىردى دەگەن. ءبىر ايەل يسفار بازارىندا ميليتسيا قىزمەتكەرى ءوزىن حيدجاب كيگەنى ءۇشىن ۇستاعانىن ايتقان.

بەلگىلى بولعانداي، بىلتىر ناۋرىز ايىندا بارلىعى 29 ادام الدىمەن قازاقستانعا كەتكەن، ول جەردەن تۇركياعا ۇشقان. يسفاردا تەك 70 جاستاعى اجەنىڭ ءبىر قىزى عانا قالعان.

Abai.kz