قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ كەزەكتى وتىرىسى ءوتتى، - دەپ حابارلايدى Abai.kz.

جيىنعا ءدىن ىستەرى جانە ازاماتتىق قوعام ءمينيسترى د.كالەتاەۆ، مادەنيەت جانە سپورت ءمينيسترى ا.مۇحامەديۇلى، وڭتۇستىك قازاقستان وبلىسىنىڭ اكىمى ج.تۇيمەباەۆ، الماتى قالاسىنىڭ، الماتى، جامبىل جانە قىزىلوردا وبلىستارى اكىمدىكتەرىنىڭ وكىلدەرى، جاستار ۇيىمدارىنىڭ كوشباسشىلارى، جاستار ساياساتى سالاسىنىڭ ساراپشىلارى جانە باسقا دا ازاماتتار قاتىستى.

گۇلشارا ابدىقالىقوۆا

وتىرىستى اشقان گ.ابدىقالىقوۆا ەلباسى ن.ءا.نازارباەۆتىڭ «جاس وتان» جاستار قاناتىنىڭ IV cەزىنە جولداعان قۇتتىقتاۋ سوزىندە جاستاردى جان-جاقتى دامۋعا، ياعني سپورتپەن شۇعىلدانىپ، ونەرلى بولۋعا، شەت تىلدەرىن ۇيرەنۋگە، وتاندىق جانە الەم ادەبيەتىنىڭ باي مۇراسىن تانىپ-بىلۋگە، ەڭ باستىسى، الەمدىك دەڭگەيدەگى كاسىبي مامان بولۋعا شاقىرعاندىعىن اتاپ ءوتتى.

مەملەكەتتىك حاتشى قازىر ەلىمىزدە «ءۇشىنشى جاڭعىرۋ» جانە «پرەزيدەنتتىڭ بەس الەۋمەتتىك باستاماسى» جۇزەگە اسىرىلىپ، يندۋستريا 4.0 ەلەمەنتتەرى ەنگىزىلىپ جاتقانىن ايتتى.

– ءبىز ءۇشىن، ەڭ باستىسى، جاستاردىڭ تاريحقا، ۇلتتىق مادەنيەتكە، داستۇرگە قىزىعۋشىلىعىن وياتۋ. ول ءۇشىن جاستارعا ارنالعان جوبالاردى ۇكىمەتتىك ەمەس ۇيىمدارمەن بىرلەسە ازىرلەپ، ءداستۇرلى قۇندىلىقتاردى زەرتتەۋمەن جانە ناسيحاتتاۋمەن اينالىساتىن ورتالىقتار اشۋ قاجەت، – دەدى مەملەكەتتىك حاتشى.

كەڭەس وتىرىسى «Open talks» فورماتىندا ءوتتى. مينيسترلەر، وڭتۇستىك قازاقستان وبلىسىنىڭ اكىمى، جاستار بىرلەستىكتەرىنىڭ باسشىلارى قازىرگى قازاقستان جاستارىنىڭ بويىندا قۇندىلىقتار جۇيەسىن قالىپتاستىرۋ جانە مادەني-دەمالىس شارالارىن ۇيىمداستىرۋ ماسەلەلەرى جونىندە بايانداما جاسادى.

كەڭەس مۇشەلەرى وڭتۇستىك قازاقستان وبلىسىنىڭ ستۋدەنتتەرىمەن، جۇمىسشى جاستارمەن، جاس كاسىپكەرلەرمەن جانە سپورتشىلارمەن كەزدەسۋلەر وتكىزدى. بۇگىندە وڭىردەگى جاستاردىڭ سانى 700 مىڭنان استى. بۇل – ەلىمىزدەگى بۇكىل جاستاردىڭ 18 پايىزى.

ءدىن ىستەرى جانە ازاماتتىق قوعام مينيسترلىگى «رۋحاني جاڭعىرۋ» اياسىندا «اتامەكەن» باعدارلاماسىن ىسكە اسىرۋدا. 2017 جىلى 1197 جوبا جۇزەگە اسىرىلدى، 2018 جىلعا 1558 جوبا جوسپارلانعان.

«جاستار» عىلىمي-زەرتتەۋ ورتالىعى جۇرگىزگەن الەۋمەتتىك ساۋالناماعا سايكەس، رەسپوندەنتتەردىڭ 97 پايىزى قازاقستان ازاماتى ەكەندىگىن ماقتان تۇتادى، ال 92,3 پايىزى وزدەرىن پاتريوت دەپ سانايدى.

قازىرگى كەزدە وڭىرلەردە جاستاردىڭ دەمالىسىن ۇيىمداستىرۋ جونىندە 2017-2020 جىلدارعا ارنالعان ءىس-شارالار جوسپارى جۇزەگە اسىرىلۋدا. 8 مىڭنان استام مادەني-دەمالىس مەكەمەلەرى بار. ماسەلەن، الماتى وبلىسىندا مەملەكەتتىك جاستار ساياساتىن ىسكە اسىرۋعا باعىتتالعان جاستارعا قىزمەت كورسەتۋ ورتالىعى جۇمىس ىستەيدى، ال شىعىس قازاقستان وبلىسىندا مەملەكەتتىك مەكەمەلەردەگى بارلىق سپورت ۇيىرمەلەرىنە 18 جاسقا دەيىنگى جاسوسپىرىمدەردىڭ تەگىن قاتىسۋى كوزدەلگەن، ستۋدەنتتەر ءۇشىن 50 پايىز جەڭىلدىك قاراستىرىلعان.

جيىن سوڭىندا مەملەكەتتىك حاتشى گۇلشارا ابدىقالىقوۆا جاستاردىڭ بويىندا قۇندىلىقتار نەگىزىن قالىپتاستىرۋ جانە ولاردىڭ دەمالىسىن ۇيىمداستىرۋ ماسەلەلەرى جونىندە بىرقاتار تاپسىرما بەردى.

Abai.kz