الماتى وبلىسىنىڭ اكىمى اماندىق باتالوۆ باستاعان ايماقتىڭ باسشىلارى، بيزنەس-قاۋىمداستىقتاردىڭ وكىلدەرى تاشكەنتكە رەسمي ساپارمەن باردى دەپ، حابارلايدى مەنشىكتى ءتىلشىمىز.

دەلەگاتسيا الدىمەن تولە بي كەسەنەسىندە بولىپ، وسىدان كەيىن اماندىق باتالوۆ «تاشكەنت تراكتور زاۋىتى» اشىق اكتسيونەرلىك قوعامىندا «ۋزاگروتەحماش» حولدينگىلىك كومپانياسى شىعارعان اۋىلشارۋاشىلىق تەحنيكالارىمەن تانىستى.  الماتى وبلىسىنىڭ اگرارلىق باعىتىن ەسكەرە وتىرىپ، وزبەك كاسىپكەرلەرى اۋىلشارۋاشىلىعىندا پايدالانۋعا بولاتىن تراكتور ماشينالارىنىڭ بارلىق تۇرلەرىن كورسەتتى. وزبەكستاننىڭ ۆيتسە-پرەمەرى نادىر اتاجانوۆ  پەن «ۋزاگروتەحماش» شك باسقارماسىنىڭ توراعاسى مۇرات كارىموۆپەن بولعان ەكىجاقتى كەزدەسۋ بارىسىندا وبلىس اكىمى جەتىسۋ ايماعىنداعى استىق جيناۋ جەلىسىن اشۋ جونىندەگى پىكىرىمەن ءبولىستى. «قازاقستان – ەۋرازيا ەكونوميكالىق وداعىنىڭ مۇشەسى، سونىمەن قاتار، ءبىزدىڭ ءوڭىرىمىز  قىتاي حالىق رەسپۋبليكاسىنىڭ نارىعىنا كىرەتىن ۇلكەن قاقپانىڭ ءبىرى. ءبىز، سىزدەردى بارلىق قاجەتتى ينفراقۇرىلىممەن قامتىلعان

«تالدىقورعان» يندۋستريالدى ايماعىندا قۇراستىرۋ تسەحىن اشۋعا شاقىرامىز. ەسكەرە كەتەتىن جاعدايدىڭ ءبىرى تمد اراسىندا قۇرعاق پورت تەك ءبىزدىڭ وڭىردە ورنالاسقان، بۇل سىزدەردىڭ ونىمدەرىڭىزدى شەت مەملەكەتتەرگە قىسقا ۋاقىت مەرزىمىندە جەتكىزىلۋىنە ءوز سەپتىگىن تيگىزەدى»، - دەدى اماندىق باتالوۆ. وسى ورايدا، وزبەكستان ۆيتسە-پرەمەرى نادىر اتاجانوۆ وبلىس اكىمىنىڭ ايتقان ۇسىنىسىنا قىزىعۋشىلىق تانىتا وتىرىپ، بىرلەسە جۇمىس ىستەۋگە ىنتالى ەكەندىگىن ءبىلدىردى.

«ءبىزدىڭ قازاقستانمەن بىرىگىپ جۇزەگە اسىرعىمىز كەلەتىن بىرقاتار جوبالارىمىز بار جانە الماتى وبلىسىنىڭ باسشىلىعىنان الىنعان ناقتى ۇسىنىستار، ولاردى ىسكە اسىرۋعا نەگىز بولادى. مىسالى، زاۋىت وتكەن جىلى 1,5 مىڭ تەحنيكا بىرلىگىن وندىرسە، بيىل بۇل كورسەتكىش 6 مىڭعا جەتتى. بۇل سىرتقى نارىققا شىعۋدىڭ دا قاجەتتىگىن كورسەتىپ وتىر. ول ءۇشىن ءبىزدىڭ ەلدەن ارنايى وكىلدەر جاقىن ارادا الماتى وبلىسىنا بارىپ، نارىق مۇمكىندىكتەرىن باعالاپ كورمەك»، - دەدى ۆيتسە-پرەمەر.

ىسكەرلىك قاۋىمداستىق ەكى ەل اراسىنداعى ينۆەستيتسيالىق الەۋەتتى تالقىلاۋمەن جالعاستى.

«2018 جىلدى ەكى ەلدىڭ  باسشىلارى «وزبەكستاننىڭ قازاقستانداعى   جىلى» دەپ جاريالادى، بۇل ەكى ۇلت اراسىنداعى ىنتىماقتاستىقتى جوعارى دەڭگەيگە كوتەرۋگە جانە جاڭا كوكجيەكتەرىن اشۋعا ءوز سەپتىگىن تيگىزەدى. الماتى وبلىسى - قازاقستان رەسپۋبليكاسىنىڭ تابيعي رەسۋرستارعا باي، ءارى ينۆەستيتسيا سالاسىنا كليماتى قولايلى ايماقتىڭ ءبىرى. وسى كەزدەسۋ ارقىلى ەكى جاق   تۋىسقاندىق ءارى باۋىرلاستىق قارىم-قاتىناستى ورناتا وتىرىپ، كاسىپكەرلەر ءوزارا ءتيىمدى سەرىكتەستىك قاتىناستارىن دامىتۋدىڭ جاڭا باعىتتارىن اشادى دەگەن ۇمىتتە.

2017 جىلى  الماتى وبلىسى وزبەكستانمەن سىرتقى تاۋار اينالىسىندا 36 ملن. اقش دوللارىن قۇراعانىن اتاپ ءوتۋ كەرەك. الماتى وبلىسىنان   وزبەكستان مەملەكەتىنە   ەكسپورت 15,8 ملن.، ال يمپورت - 20,2 ملن. اقش دوللارىن قۇراعان.

وزبەكستاننان ءبىز مينەرالدى تىڭايتقىشتار، اۆتوموبيلدەر، جەمىستەر مەن كوكونىستەردى جانە باسقا دا اۋىلشارۋاشىلىعى ونىمدەرىن الامىز. مەملەكەتتەر اراسىنداعى باۋىرلاستىق، كورشىلىك قارىم-قاتىناستاردىڭ جارقىن مىسالدارى ەكونوميكا، عىلىم مەن مادەنيەت سالالارىندا دا بار. بۇگىنگى كەزدەسۋ الماتى وبلىسى مەن وزبەكستان رەسپۋبليكاسىنىڭ كوپقىرلى بايلانىستارىن ودان ءارى نىعايتىپ، كەڭەيتەدى دەگەن سەنىمدەمىن»،- دەدى وبلىس اكىمى.

900 ورىنعا ارنالعان «تۇركىستان» كونتسەرت زالىندا جەتىسۋلىق ونەرپازدار ارنايى كونتسەرتتىك باعدارلاما ۇسىندى.

سونىمەن قاتار تۇرعىندارعا الماتى وبلىسىنىڭ تۋريستىك الەۋەتى  تانىتاتىن كورمە مەن قولونەرشىلەردىڭ بۇيىمدارى، قىلقالام شەبەرلەرىنىڭ تۋىندىلارى ۇسىنىلدى.

كونتسەرت سوڭىندا ءسوز العان وزبەكستاننىڭ مادەنيەت ءمينيسترىنىڭ ءبىرىنشى ورىنباسارى وزودبەك نازاربەكوۆ جەتىسۋ ونەرپازداردىڭ جوعارى كاسىبي دەڭگەيلىگى مەن ءوڭىردىڭ رۋحاني بايلىعىن كورەرمەنگە ەرەكشە شەبەرلىكپەن پاش ەتكەندەرىن جەتكىزدى.

ايتا كەتەيىك، الماتى وبلىسىنىڭ دەلەگاتسياسى ءوز ساپارلارىن ءساۋىردىڭ 15-نە دەيىن جالعاستىرماق. وبلىس وكىلدەرى وزبەكستاننىڭ بىرقاتار قالالارىن ارالاي وتىرىپ، الماتى وبلىسىنىڭ ينۆەستيتسيالىق مۇمكىندىكتەرىن كەڭىنەن تانىستىرادى.

رۇستەم قاناپيانوۆ

Abai.kz