جۇما, 20 قىركۇيەك 2024
3233 0 پىكىر 20 ءساۋىر, 2018 ساعات 09:54

يراكتا ەكى رەسەيلىك كەلىنشەك يم-گە مۇشە بولدى دەپ ءومىر بويى سوتتالدى

يراكتىڭ باعداد سوتى ەكى رەسەيلىك ايەلدى "يسلام مەملەكەتى" (يم) تەرروريستىك توبىنا مۇشە بولدى دەگەن ايىپپەن ءومىر بويى باس بوستاندىعىنان ايىرعان. شەشەنستاننىڭ رەسمي وكىلىنىڭ مالىمەتىنشە، سوتتالعاندار داعىستاندىق. تىڭداۋ كەزىندە ەكى ايەلدىڭ قولىندا بالالارى بولعان.

بىلتىر جەلتوقسان ايىندا يراك جەرىنىڭ ۇشتەن ءبىرىن باقىلاپ كەلگەن يم توبىن تولىق جەڭدىك دەپ جاريالاعان. يراكتىڭ انتيتەررورلىق زاڭى يم-گە كومەكتەسكەندەردىڭ ءبارىن جازالايدى.

مالىمەتكە قاراعاندا، يراك بيلىگى مىڭعا جۋىق شەتەلدىك ايەلدى ۇستاپ وتىر. ولاردىڭ دەنى تۇركيا جانە پوستسوۆەتتىك ەلدەردىڭ ازاماتتارى. بىرقاتار ايەلدەردى ءولىم جازاسىنا كەسىپ جاتىر.

قىرعىزستاننىڭ سىرتقى ىستەر مينيسترلىگى يراكتا ءولىم جازاسىنا كەسىلگەندەردىڭ اراسىندا قىرعىز ازاماتتارى بار-جوعىن انىقتاپ جاتىر.

17 ساۋىردە ريا «نوۆوستي» يراكتىڭ Al-Sumaria تەلەكانالىنا سىلتەمە جاساپ، باعدادتا بىرنەشە شەتەلدىكتىڭ ءولىم جازاسىنا كەسىلگەنىن، ونىڭ ىشىندە ءبىر قىرعىز ايەلى بولعانىن حابارلاعان.

ناۋرىز ايىنىڭ باسىندا ريا «نوۆوستي» يراكتا قىرعىزستاننىڭ ءۇش ايەلى بالالارىمەن تۇرمەدە وتىر دەپ حابارلاعان. ولاردىڭ ءبارى تەرروريزممەن ايىپتالىپ جاتقانىن، ءولىم جازاسىنا كەسىلۋى مۇمكىندىگى ايتىلعان. ولاردىڭ اتى-جوندەرى - اسەل اسىلجانقىزى، زۋحرا كاديروۆا جانە فاتيما مارۋفجانوۆا. ولارمەن بىرگە بالالارى بار. وسىعان بايلانىستى قىرعىزستان ءسىم قىزىل كرەست كوميتەتىنە ارىزدانعان. بىراق ازىرگە حابار جوق.

Abai.kz

0 پىكىر