ناقتى سۇراققا ناقتى جاۋاپ بەرە الماي سەنات توراعاسى قاسىم-جومارت توقاەۆتان سىن ەستىگەننەن كەيىن ۇلتتىق ەكونوميكا ءمينيسترى تيمۋر سۇلەيمەنوۆتىڭ سەناتورلاردىڭ الدىنا العاشقى كەلۋى. ەستەرىڭىزدە بولسا سول جولى «مينيستر ءمۇدىرىپ قالدى» دەگەن سىن ماقالا بەرىلىپ، ءمينيستردىڭ دايىندىقسىز كەلۋى قوعام ىشىندە ءبىراز رەنىش تۋعىزعان. اقيقاتى كەرەك، بۇل جولى مينيستر سەناتقا دايىندالىپ كەلىپتى. قازاقشاسى دا ءجاپ-جاقسى...

دەگەنمەن، بۇل جولى دا مينيستر سەناتورلاردىڭ سىن ساداعىنان قۇتىلا المادى. سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى ا.بەيسەنباەۆ «زاڭ جوباسىنداعى وزگەرتۋلەردى رەيتينگ كورسەتكىشىنە جانە كاسىپكەرلىككە قاتىستى دەپ ايتا المايمىز. زاڭ جوباسىندا كاسىپكەرلىككە مۇلدە قاتىسى جوق سالالىق وزگەرتۋلەر دە ورىن العان. مىسالى، ەرەكشە قورعالاتىن تابيعي اۋماقتاردا، ورمان قورىن قورعاۋدا، جانۋارلار دۇنيەسىن قورعاۋدا قانداي كاسىپكەرلىك بولۋى مۇمكىن؟ ول جەردە تەك زاڭ بۇزاتىن براكونەرلەر بولۋى مۇمكىن جانە اۋماقتاعى مەملەكەتتىك باقىلاۋ مەن قاداعالاۋدى جۇرگىزەتىن قىزمەتكەرلەر بولۋى كەرەك» ، - دەپ ناقتى مىسالعا جۇگىنە وتىرىپ، كەمشىلىكتى اشىپ كورسەتتى.

ا.بەيسەنباەۆتىڭ ايتۋىنشا، زاڭ جوبالارىن دايىنداۋ بارىسىندا، جاۋاپتى وكىلەتتى ورگانمەن قاتار، باسقا دا سالالىق مينيسترلىكتەردىڭ  بىرگە جۇمىس اتقارۋى وتە ماڭىزدى بولسا، وكىنىشكە قاراي، زاڭ جوباسىمەن جۇمىس بارىسىندا كەيبىر مينيسترلىك وكىلدەرىنىڭ وزدەرىنە قاتىستى وزگەرىستەردى بىلمەيتىندىگى انىقتالعان جانە ونى قابىلدانعاننان كەيىنگى سالدارى دا زەرتتەلمەگەن.

سەناتورلار الداعى ۋاقىتتا ۇكىمەت رەيتينگ كورسەتكىشىن جاقسارتۋعا ارنالعان جۇمىستاردى جۇيەلى تۇردە جۇرگىزىپ، زاڭدارعا رەيتينگكە تىكەلەي قاتىستى وزگەرتۋلەر ەنگىزۋى قاجەتتىگىنە كوڭىل اۋداردى.

سەناتور ەدىل مامىتبەكوۆ ايتقان دەرەكتەر بويىنشا، ەلىمىزدە 20 كودەكس قولدانىستا، ونىڭ 19-ىنا وزگەرىستەر مەن تولىقتىرۋلار ەنگىزىلدى، سونداي-اق 296 ارناۋلى زاڭنىڭ 266-سىنا وزگەرىس ەنگىزىلدى. «ءبىزدىڭ ويىمىزشا، ەرەجەلەردىڭ كوپتىگى مەن زاڭناماعا ۇدايى وزگەرىستەر ەنگىزۋ ەكونوميكانىڭ ءتيىمدى دامۋىنا كەدەرگى بولادى»، - دەگەن سىن ايتتى دەپۋتات.

2018 جىلعا دەيىنگى ەسەپ بويىنشا قازاقستان 190 ەل اراسىندا 36-شى ورىنعا يە بولدى. جاقسى ناتيجە سياقتى كورىنەدى. سونىمەن قاتار، قازاقستان مىناداي كورسەتكىشتەر بويىنشا: «سالىق» 50-ءشى، «قۇرىلىسقا رۇقسات الۋ» 52-ءشى، «ەلەكتر جەلىلەرىن قوسۋ» 70-ءشى، «نەسيە الۋ» 77-ءشى، «حالىقارالىق ساۋدا» 123 ورىندى يەلەنىپ، ارتتا قالىپ كەلەدى.

سەناتور دۋلات قۇسداۋلەتوۆ زاڭناماعا وزگەرىستەر ەنگىزۋ مەن باقىلاۋ-قاداعالاۋ مىندەتىن قىسقارتۋ شارالارى ەش كەتكەن ەڭبەككە بالادى. سەناتور بۇل شارالار ۋاقىتشا اسەر ەتەتىنى تۋرالى پىكىرىن ايتىپ، ۇكىمەتتى بيزنەسپەن جۇمىس ستراتەگياسىن قايتا قاراۋعا جانە ودان دا ءتيىمدى جۇمىس ادىستەرىن ىزدەستىرۋگە شاقىردى.

دەگەنمەن، مينيستر سەناتورلاردىڭ سىنىنا توتەپ بەردى. ءسويتىپ، ەسكەرتۋلەر مەن ۇسىنىستاردىڭ ءبارى وزەكتى ەكەنى ايتىلىپ، زاڭ جوباسىن ازىرلەۋشىلەر ولاردى الداعى ۋاقىتتا ۇكىمەتتە ازىرلەنىپ جاتقان جانە ءماجىلىستىڭ قاراۋىنا ۇسىنىلعان باسقا زاڭ جابالارىندا، باسقا نورمالىق-قۇقىقتىق اكتىلەردى ازىرلەۋ بارىسىندا ەسكەرۋگە كەلىستى.

مينيستر سەناتورلاردىڭ سىن ساداعىنا ىلىككەنىمەن، بۇل جولى سەناتتان كوڭىلدىرەك شىقتى. كەيپىندە ءبىر سەنىمدىلىك بار. ءدال وسى بەتىنەن تايماسا، بىرەر جىلدا ەسەپ-قيساپتى قازاقشا سۋشا ساپىراتىن  ءتۇرى بايقالادى. كوز تيمەسىن. ءوز ءتىلىن وگەيسىنىپ جۇرگەندەردى وسىلاي توقاەۆشا سىلكىپ-سىلكىپ قويعاننىڭ زيانى جوق سياقتى عوي.

ادىلبەك قابا

Abai.kz