ەسەن ساۋسىز با؟

بۇل حاتتى جازىپ وتىرعان – الماتىدان، اقسەلەۋ سەيدىمبەكوۆ دەگەن تىلەۋلەسىڭىز. سىرتىڭىزدان كوپ كورگەن، كوپ بىلەتىن، كوكىرەك كوزى وياۋ، وي نيەتى ءتۇزۋ قارتتارىمىزدىڭ ءبىرى دەپ ەستۋشى ەدىم. سەمەي جاقتان قارا كورىنسە ءسىزدىڭ ساۋشىلىعىڭىزعا الاڭ كوڭىلمەن قۇلاقتاس بولىپ وتىرامىز. پەيىل نيەت سولاي بولعانمەن دە، ءدال قازىر حات جازا قويارمىن دەگەن وي جوق ەدى. الايدا ءسىزدىڭ «بۇحار جىراۋىڭىزدى» وقىعان سوڭ ءۇنسىز قالۋدىڭ رەتىن تاپپادىم.

ەل ءومىرى، حالىق تاعدىرىنا قاتىستى مىسقالداي بولسا دا يگىلىكتى ءىستىڭ تىندىرىلۋى زور قۋانىش قوي. كوپ وقۋشىنىڭ ءبىرى رەتىندە ءسىزدىڭ ماقالاڭىزعا دەگەن قۋانىشىمدى، العىس-راحمەتىمدى ءبىلدىرىپ وتىرمىن.
«بۇحار جىراۋ» – ساتىمەن تىندىرىلعان، ءالى تالاي-تالاي ۇرپاعىمىزدى مويىن بۇرعىزاتىن ەلەۋلى ەڭبەك. پىكىر-دالەلدەرىڭىز شىعار كۇندەي شىنشىلدىعىمەن باۋرايدى. جازىپ وتىرعان تاقىرىپ جونىندەگى حاباردارلىعىڭىز، بۇرىنعى-سوڭعى ماعلۇمات يەلەرىنە دەگەن كىسىلىكتى جۇگىنۋلەرىڭىز، ويدى جۇيەلى ءوربىتىپ، قات-قاتىمەن ءتۇسىرۋىڭىز، كەسەك-كەسەك ۇسىنىس پىكىرلەرمەن وي تۇيىندەۋىڭىز – ءسىزدىڭ ماقالاڭىزدىڭ باعىن اشىپ، كوپتىڭ كوڭىلىنە قوناقتاۋمەن بىرگە، ءسىزدىڭ ءوزىڭىزدىڭ دە ۇلكەن جۇرەكتى اقساقالىمىز ەكەنىڭىزدى مويىنداتىپ وتىر. ءتاڭىرىم بويىڭىزعا قۋات بەرىپ، كوكىرەك كومبەڭدەگى اسىلدار ساتىمەن بارشانىڭ قۋانىش-يگىلىگىنە اينالۋىنا جار بولسىن!

حاتىمنىڭ سوڭىندا وزىنىزگە دەگەن ءوتىنىشىمدى ايتقىم كەلەدى. «بۇحار جىراۋ» ماقالانىزدا ەرالى جازعان قانجىعالى جانتاي باتىر تۋرالى، كوكباي اقىن جازعان ابىلاي تۋرالى «سابالاق» اتتى پوەمالاردى ايتاسىز. سونداي-اق قانىجاعالى بوگەنباي باتىر تۋرالى دا وتىزىنشى جىلدارى جارىق كورگەن پوەمانىڭ بار ەكەنىن بىلەسىز عوي. ەگەر مۇمكىندىگىڭىز بولسا وسى پوەمالاردىڭ ءبىر-ءبىر كوشىرمە باسىلىمىن سالىپ جىبەرە الاسىز با؟ ءبىر ايعا العان شارۋا بار ەدى، سول ءۇشىن 18-عاسىرداعى باتىرلار، حاندار، جىراۋ-شەشەندەر، بيلەر، ارۋ-ايەلدەر تۋرالى جازىلعان ولەڭ، داستان، جىر نۇسقالارى مەيلىنشە قاجەت بولىپ وتىرعانى.

ارينە، ءتۇرلى سەبەپپەن مۇمكىندىگىڭىز كەلمەسە ەشقانداي وكپە جوق.

قۇرمەتتى كاكە، وسى حاتپەن بىرگە مىنا ءبىر شاعىن ەڭبەگىمدى سالىپ وتىرمىن. بىرىنشىدەن، وزىڭىزبەن تانىستىعىما دانەكەر بولسىن، ەكىنشىدەن سىزگە دەگەن قۇرمەتىمە بەلگى بولسىن دەگەن نيەت ەدى.

حاتىڭىزدى كۇتەمىن.

ساۋ – سالامات بولىڭىز!

قۇرمەتپەن – اقسەلەۋ سەيدىمبەكوۆ.

12.08.1982 ج. الماتى.

ەربول ىرگەبايدىڭ Facebook-تەگى پاراقشاسىنان

Abai.kz