جالىعۋ
ابايدىڭ 20-قارا ءسوزى: "تاعدىردىڭ جارلىعىن بىلەسىزدەر - وزگەرىلمەيدى. پەندەدە ءبىر ءىس بار جالىعۋ دەگەن" - دەپ باستالىپ، وسى جالىعۋدىڭ قانداي ادامعا تəن ەكەنىن ءتۇسىندىرىپ بارىپ، بىلاي دەمەيتىن بە ەدى:
"بىراق وسى جالىعۋ دەگەن ارنەنى كورەم دەگەن، كوپ كورگەن، ءدامىن، باعاسىن، ءبارىنىڭ دە بايانسىزىن ءبىلىپ جەتكەن، ويلى ادامنان شىعادى. سونشالىق عۇمىرىنىڭ بايانسىزىن، دۇنيەنىڭ ءاربىر قىزىعىنىڭ اكىرىنىڭ شولاقتىعىن كورگەن-بىلگەندەر تىرشىلىكتەن دە جالىقسا بولادى".
يə، "ويلى ادامعا قىزىق جوق بۇل جالعاندا" دەگەندى ولەڭمەن جازعان قايران اباي، 20-قارا سوزىندە سول كونتسەپتسياسىن ارى قاراي دامىتىپ، بىلاي دەپ تəمامدايدى:
"بۇلاي بولعاندا اقىماقتىق، قايعىسىزدىق تا ءبىر عانيبەت ەكەن دەپ ويلايمىن".
"راس-اۋ!" - دەپ قالاي باس يزەپ كەلىسىپ قويعانىڭدى ءوزىڭ دە بايقاماي قالاسىڭ.
بىراق، جالىعۋ - ءتۇڭىلۋ ەمەس. ويلى ادام ەشۋاقىتتا تۇڭىلمەيدى. باسىندا تۇرعان باقتىڭ بايانسىزىن تۇسىنگەن ادام، سوردىڭ دا وتپەلى ەكەنىن تۇسىنبەيدى دەيسىز بە؟ تۇسىنەدى.
مۇرات راقىمجاننىڭ Facebook-تەگى پاراقشاسىنان
Abai.kz
