سەسسيانىڭ كۇن تارتىبىندەگى نەگىزگى ماسەلە «بەس الەۋمەتتىك باستاما – قوعامنىڭ الەۋمەتتىك بىرلىگىنىڭ تۇعىرى» دەپ اتالدى. بۇل تۋرالى اقوردانىڭ ءباسپاسوز قىزمەتى حابارلادى.

جيىنعا ەلدىڭ بارلىق وڭىرىنەن كەلگەن اسسامبلەيا مۇشەلەرى مەن ارداگەرلەرى، ەتنومادەني بىرلەستىكتەردىڭ توراعالارى، پارلامەنت دەپۋتاتتارى، ۇكىمەت مۇشەلەرى، ورتالىق جانە جەرگىلىكتى اتقارۋشى ورگانداردىڭ، ساياسي پارتيالاردىڭ، ءدىني بىرلەستىكتەردىڭ، ۇكىمەتتىك ەمەس ۇيىمداردىڭ باسشىلارى، شىعارماشىلىق جانە اكادەميالىق زيالى قاۋىم وكىلدەرى مەن بۇقارالىق اقپارات قۇرالدارىنىڭ جەتەكشىلەرى قاتىستى.

سەسسيانى اشقان مەملەكەت باسشىسى قازاقستان حالقىنىڭ اسسامبلەياسى ەلىمىزدەگى بەيبىتشىلىك پەن تۇراقتىلىقتىڭ باستى كەپىلى رەتىندە ماڭىزدى ءرول اتقاراتىنىن اتاپ ءوتتى.

– قازاقستان سان قىرلى جاڭعىرۋعا بەت بۇرعان قازىرگى تاڭدا اسسامبلەياعا دا تىڭ مىندەتتەر جۇكتەلدى. مەن ناۋرىز ايىندا الەۋمەتتىك جاڭعىرۋ جولىنداعى «پرەزيدەنتتىڭ بەس باستاماسىن» ۇسىندىم. ونىڭ تابىستى جۇزەگە اسۋى ازاماتتاردىڭ ءوز بولاشاعىنا، مەملەكەتىنە، قوعامىنا، قالا بەردى ءبىر-بىرىنە سەنىمىن ارتتىرادى، – دەدى ەلباسى.

قازاقستان پرەزيدەنتى الەۋمەتتىك بىرلىك ساياساتى ءبىرتۇتاس ۇلت قالىپتاستىرۋ جولىنداعى ماڭىزدى قادام بولىپ سانالاتىنىن ايتتى.

– ءبىز سىرتقى جاعدايلارعا قاراماستان، بەس جاڭا جوبانى جۇزەگە اسىرۋدى باستادىق. بۇل قارجىمىزدىڭ جانە رەسۋرستارىمىزدىڭ كوپتىگىنە بايلانىستى بولىپ وتىرعان جوق. كەرىسىنشە، قازاقستاندىقتاردىڭ تۇرمىسىن جاقسارتۋعا تىڭ سەرپىن بەرۋدى كوزدەگەن شىنايى نيەتىمىزگە بايلانىستى ىسكە اسۋدا، – دەدى نۇرسۇلتان نازارباەۆ.

مەملەكەت باسشىسى «بەس الەۋمەتتىك باستامانى» ىسكە اسىرۋدىڭ نەگىزگى ءۇش فاكتورىنا توقتالىپ، ەلىمىزدىڭ الەۋمەتتىك ساياساتىنىڭ باستى ەرەكشەلىكتەرىن اتاپ ءوتتى.

ەلباسى قازاقستان قوعامىنىڭ بىرلىگىن ودان ءارى نىعايتۋ قاجەتتىگىنە ايرىقشا توقتالدى.

– ءححى عاسىر الەۋمەتتىك، ەكولوگيالىق، تەحنوگەندىك سياقتى جاھاندىق قاۋىپ-قاتەرلەر ەشقايدا جويىلىپ كەتپەيتىنىن كورسەتىپ وتىر. اركىم ءوز بولاشاعىنا ءوزى جاۋاپ بەرەتىن وزگەشە كەزەڭ كەلە جاتىر، – دەدى قازاقستان پرەزيدەنتى.

سونىمەن قاتار نۇرسۇلتان نازارباەۆ ەلىمىزدە جۇزەگە اسىرىلاتىن الەۋمەتتىك جوبالاردىڭ ءۇش قاعيداتىن اتاپ ءوتتى.

مەملەكەت باسشىسى «بەس باستاما» قازىرگى قازاقستاننىڭ ەڭ ماڭىزدى بەس الەۋمەتتىك پروبلەماسىن شەشۋگە باعىتتالعانىن ايتتى.

ەلباسى الەۋمەتتىك باستامالاردى ىسكە اسىرۋ ءۇشىن جۇمسالاتىن قاراجات قازاقستان قوعامىنىڭ بولاشاعىنا ارنالعان تىكەلەي ينۆەستيتسيا بولىپ سانالاتىنىن اتاپ ءوتىپ، قازاقستان حالقى اسسامبلەياسىنا بىرقاتار جاڭا مىندەتتەر جۇكتەدى.

سوڭىندا نۇرسۇلتان نازارباەۆ حالىقتىڭ بىرلىگىن جاڭارعان قازاقستاندى وركەندەتۋدىڭ باستى شارتى دەپ اتاپ، ەل تۇرعىندارىن الدا كەلە جاتقان قازاقستان حالقىنىڭ بىرلىگى كۇنىمەن قۇتتىقتادى.

سەسسيا بارىسىندا  ۆيتالي يونو تۆاريوناس پەن يسلامبەك تولەۋبايۇلى سالجانوۆ قازاقستان حالقى اسسامبلەياسى توراعاسىنىڭ ورىنباسارلارى بولىپ تاعايىندالدى.

سەسسيا سوڭىندا قازاقستان حالقى اسسامبلەياسىنىڭ ۇندەۋى قابىلداندى. وندا اسسامبلەيا قازاقستان حالقىن الەۋمەتتىك مەملەكەتتىڭ جانە ۇلتتىق ءال-اۋقاتتى ارتتىرۋدىڭ جاڭا مودەلىن بىرگە قۇرۋعا شاقىردى.

Abai.kz