ۇلتتىق ادەبيەتىمىزدى دامىتىپ، جاس دارىنداردى قولداۋ ماقساتىندا قازاقستان رەسپۋبليكاسى مادەنيەت جانە سپورت مينيسترلىگى جانىنان جاستار كەڭەسى قۇرىلدى، - دەپ حابارلايدى اباي-اقپارات.

جاڭا جاساقتالعان كەڭەس – ونەر جانە ادەبيەت سالاسىندا ادىستەمەلىك-ساراپتامالىق جۇمىستى جۇزەگە اسىرۋ ءۇشىن قۇرىلعان كونسۋلتاتيۆتىك-كەڭەستىك ۇيىم.

سونىمەن جاستار كەڭەسى نە ىستەيدى؟ ونىڭ قۇزىرەتى قانداي؟

ايتايىق، اۋەلى جاستارعا قاتىستى كەشەندى ادەبيەت جانە ونەر سالالارىنىڭ باسىم باعىتتارىن انىقتاۋ، ونى قالىپتاستىرۋ جانە ىسكە اسىرۋ; جەكە جانە زاڭدى تۇلعالارمەن، شىعارماشىلىق وداقتار، اسسوتسياتسيالار جانە تاعى باسقا قوعامدىق ماڭىزى ۇيىمدارمەن بىرلەسە وتىرىپ جۇمىس جۇرگىزۋمەن اينالىسادى.

جاستاردىڭ ءتۇرلى زاماناۋي فورۋمدارعا، كونفەرەنتسيالارعا، جيىندارعا قاتىسۋ جانە مينيسترلىكتىڭ شەشىمدەرىن تالقىلاۋ مەن قابىلداۋ كەزىندە جۇرتشىلىقتىڭ پىكىرىن ەسكەرە وتىرىپ جۇمىس جاساۋ، مەملەكەتتىك جانە ۇكىمەتتىك باعدارلامالاردىڭ جوبالارىن جانە تاعى باسقادا جاستارعا قاتىستى وزگە دە ماڭىزدى سۇراقتارىن تالقىلاۋعا مۇمكىندىكتەر بەرەدى. شىعارماشىلىق قايراتكەرلەرمەن جۇمىس بارىسىندا تۋىنداعان ماسەلەلەردى شەشۋدە ورتالىق جانە جەرگىلىكتى اتقارۋشى ورگاندارعا كونسۋلتاتيۆتىك كومەك كورسەتەدى.

ۇلىقبەك ەسداۋلەت، قازاقستان جازۋشىلار وداعى باسقارما توراعاسى، قازاقستاننىڭ ەڭبەك سىڭىرگەن قايراتكەرى، قازاقستاننىڭ مەملەكەتتىك سىيلىعىنىڭ يەگەرى:

– مادەنيەت پەن ونەردىڭ جاناشىرى، قر مادەنيەت جانە سپورت ءمينيسترى ارىستانبەك مۇحامەديۇلىنىڭ مۇرىندىق بولۋىمەن جۇمىسىن باستاعالى وتىرعان جاستار كەڭەسىنىڭ باستى ماقساتى – قالامگەرلەر مەن وقىرماندار اراسىندا التىن كوپىر بولۋ، جاس قالامگەرلەردىڭ شىعارماشىلىعىن ناسيحاتتاۋ، ادەبي-مادەني ينتەلليگەنتسيانىڭ باس قوسار ورتالىعىنا اينالۋ. سياسى كەپپەگەن جاڭا كىتاپتاردى تالقىلاۋ، وزگە دە ايماقتارمەن بايلانىس جاساۋ ماقساتىندا ادەبي بەينە-كوپىرلەر، وزگە دە ايماق قالامگەرلەرىمەن كەزدەسۋ كەشتەرىن وتكىزۋدى جوسپارلاعان ورتا بولىپ وتىر.  

ماقسات مالىكوۆ، حالىقارالىق «شابىت» فەستيۆالىنىڭ گران-پري يەگەرى:

– مادەنيەت جانە سپورت مينيسترلىگىنىڭ جانىنان قۇرىلعان جاستار كەڭەسى – قوعامداعى جاستار ساياساتىنىڭ تامىرىنا قان جۇگىرتەتىن يگى باستاما دەپ قابىلدايمىن. اسىرەسە، ونەر جانە ادەبيەت سالاسىندا تالانتىمەن كوزگە تۇسكەن جاس بۋىن وكىلدەرىنە مەملەكەت جانە قوعامدىق ۇيىم تاراپىنان كوڭىل ءبولىپ، ولاردىڭ قالىپتاسۋ جولىندا قولتىعىنان دەمەسە، تالاي كۇرمەۋى قيىن ماسەلە شەشىمىن تاباتىنى اقيقات. سەبەبى، الاش ارداقتىسى احمەت بايتۇرسىنۇلى «بالام دەيتىن جۇرت بولماسا، جۇرتىم دەيتىن بالا قايدان بولسىن» دەپ ايتىپ كەتكەنىندەي، جاستارعا دەر كەزىندە كورسەتىلگەن قامقورلىق – ەلدىڭ بولاشاعىنا قوسىلعان قوماقتى ۇلەس. مىنەكەي، وسىنداي ماقسات-مۇددەنى تۋ ەتكەن جاستار كەڭەسى ونەرى ورگە جۇزگەن سانداعان دارىننىڭ تىنىسىن كەڭەيتىپ، كۇنى ەرتەڭ كەلەلى ءىستىڭ كەرەمەت بالاماسىنا اينالاتىنى ءسوزسىز.

جاس اقىن-جازۋشىلار كەڭەسىنىڭ قۇرامى:

Abai.kz