بىزدە جىل سايىنعى كەلەتىن جەڭىس كۇنى مەرەكەسى قارساڭىندا وسىنداعى وزگە ۇلتتىڭ وكىلدەرى ءبىر شۋلاپ قالماسا، ءتۇن ۇيقىسى ءتورت بۇزىلىپ، مازاسى قاشاتىن سەكىلدى. «داۋدىڭ باسى دايرابايدىڭ كوك سيىرى» دەگەندەي، داۋدىڭ باسى باياعى سول كۇنى كوڭىلى كوك تىرەگەندەي بولىپ، كەۋدەسىنە تاعىپ شىعاتىن گەورگي لەنتاسى. رەسەي رەسمي تۇردە وزىنە مەنشىكتەپ العان وسى مەرەكە جاقىنداعاندا بۇل جۇرت تاعى دا ەسكى ادەتىنە باسىپ، ۇلارداي شۋلاپ جاتىر. جاقىندا ءبىر توپ انا-انالار وزدەرى سەنەتىن وسىنداعى ورىس ءتىلدى گازەتكە «ءبىزدىڭ بالالارىمىزعا گەورگي بەلگىسى بار كوگىلدىر لەنتا تاعۋعا مىندەتتەپ جاتىر. ايتپەسە جازالايتىن كورىنەدى. جوعارىدان سونداي بۇيرىق بار دەيدى» دەگەن ەشبىر فاكتىسى جوق، وسەككە تولى دولى حاتتاردى بىرىنەن سوڭ ءبىرى رەداكتسياعا توعىتىپ جاتقان كورىنەدى. حات جازباعاندارى تەلەفونعا مازا بەرمەپتى.

گازەت جۋرناليستەرى دە جىلدام ەكەن. دەرەۋ وبلىستىق ءبىلىم باسقارماسىنا تەلەفون شالىپ، سان سۇراقتىڭ استىنا الادى. ورىس ءتىلدى گازەتتەن حابارلاسسا، ءبىزدىڭ شەنەۋنىكتەن نە جان قالسىن، وزگە شارۋاسىن تاستاي سالا، دەرەۋ جاۋاپ بەرەدى. سونداعىسى: «ءبىز ونداي بۇيرىق بەرگەن جوقپىز. جەڭىس بەلگىسىن نە تاقسىن، نە تاقپاسىن دەگەن تالاپ جوق. ونىڭ قانداي ءتۇرىن تاعۋ تۋرالى دا تالاپ ەتپەيمىز»، - دەپ اقتالىپ باعادى.

«ە، باسە» دەپ گازەت ءبىر قۋانىپ قالادى. سويتەدى دە «دەمەك، قانداي دا وتباسى قانداي لەنتا تاعۋدى وزدەرى شەشەدى ەكەن عوي. ءتىپتى تاقپاسا دا بولاتىن كورىنەدى»، - دەپ ءبىر قۋانتىپ تاستايدى.

ال ءبىز ويلايمىز. «وسى ءبىزدىڭ شەنەۋنىكتەر نەگە ىلعي كولەڭكەسىنەن قورقادى دا جۇرەدى»، - دەپ. اۋ، «وزدەرى بىلەدى» دەپ ارى يتەرىپ، بەرى جىعىپ، جالپاقشەشەيلىككە سالىنباسا، بىرەۋ جىلى ورنىن تارتىپ الا ما؟ الگى اتا-انالاردىڭ وزدەرىنشە شالا ءبۇلىنىپ، وتىرىك دابىل قاعۋىنىنىڭ استارىندا ءوزىمىزدىڭ كوگىلدىر لەنتامىزدى تاققىسى كەلمەي قاسارىسقاندىق سەكىلدى ارام پيعىل جاتقاندىعىن بايقاۋدىڭ نەسى قيىن؟ وسىندايدا قيسىنى كەلىپ تۇرعاندا، ەشكىمگە جالتاقتاماي-اق:  «بىزدە ءوزىمىزدىڭ تاۋەلسىز ەل ەسەبىندە بەلگىلەگەن جەڭىس بەلگىسى بار. وقۋشىلار سونى تاعىپ شىقسا جاراسىپ كەتەر ەدى. اناۋ ماسكەۋ بەكىتكەن لەنتاعا قاراپ قالعان كۇنىمىز جوق. ءبىزدىڭ ۇستانىمىز وسىنداي»، - دەسە  ورىنسىز پالە ىزدەگەندەردىڭ اۋزىنا قۇم قۇيىلماس پا ەدى؟ جوق، ونداي قيسىندى دا توتە جاۋاپ بەرۋگە باتىلىمىز جەتپەي، ستراۋستاي باسىمىزدى قۇمعا تىعىپ، «سەن تيمەسەڭ، مەن تيمەن، بادىراق كوز» دەگەن پيعىلمەن ىعايلى دا قاۋىپسىز ءومىر ءسۇرۋدى داعدىعا اينالدىردىق پا؟ سوندا تاۋەلسىز ەلدىڭ ۇلتتىق نىشاندارىن كىم ناسيحاتتايدى؟ وسكەلەڭ ۇرپاقتى پاتريوتتىققا كىم باۋليدى؟ ورىسشا ايتقاندا «پۋشكين با؟».

جايبەرگەن بولاتوۆ، قوستاناي

Abai.kz