بۇگىن قازاقستانىڭ وتان قورعاۋشىلار كۇنىنە ارنالعان جاۋىنگەرلىك شەرۋ ءوتىپ جاتىر، دەپ حابارلايدى "اباي-اقپارات".

بيىلعى جاۋىنگەرلىك شەرۋ جىلداعىداي استانادا ەمەس، جامبىل وبلىسىنداعى "وتار" 40-اسكەري بازاسىندا وتۋدە.

شەرۋگە 3 مىڭعا جۋىق اسكەري قىزمەتشى، 300 بىرلىك قارۋ-جاراق پەن اسكەري تەحنيكا جانە شامامەن 40 بىرلىك ۇشۋ اپپاراتى قاتىسادى. سالتاناتتى شاراعا قازاقستان رەسپۋبليكاسىنىڭ پرەزيدەنتى، قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆ قاتىسۋدا.

سونداي-اق، پوليگوندا بارلىق وبلىستىڭ جانە استانا مەن الماتىنىڭ اكىمى بار. ستسەناري بويىنشا، پاراد ەكى بولىمنەن تۇرادى، ءبىرىنشى بولىمدە اكىمدەرگە اۋماقتىق قورعانىس بريگادالارىنىڭ جاۋىنگەرلىك تۋى تابىس ەتىلەدى. تۋ تابىس ەتىلگەن سوڭ، ءداستۇر بويىنشا، قوناقتار مەن كورەرمەندەر الدىندا سالتاناتتى مارشپەن 19 جاياۋ شەرۋ توبى ءجۇرىپ وتەدى، ولاردىڭ قاتارىندا قر قك ارنايى وپەراتسيالار كۇشتەرىنىڭ، سونىمەن قاتار، اۋماقتىق اسكەر قىزمەتكەرلەرى بار.

ەكىنشى بولىمدە قارۋ-جاراقتار مەن اسكەري تەحنيكالاردىڭ قاتىسۋىمەن بارلاۋ-اسكەري بولىمشەلەرى شىنايى تاكتيكالىق ارەكەتتەردى كورسەتەدى. اسكەري شەرۋدىڭ سوڭىندا "جەتىسۋ" ۇشقىشتىق توبى ەڭ جوعارى پيلوتاج فيگۋرالارىن ورىندايدى.

ەستەرىڭىزگە سالا كەتەيىك، وسىعان دەيىن 7 مارتە اسكەري شارۋ ۇيىمداستىرىلعان. ولار:

2005 جىلى جەڭىستىڭ 60-جىلدىعىنىڭ قۇرمەتىنە اسكەري شەرۋ وتكىزىلدى. وعان 3 مىڭ اسكەري قىزمەتكەر، 130 اسكەري تەحنيكا جۇمىلدىرىلدى. بۇل شاراعا 934 مىڭ دوللار جۇمسالدى.

2009 جىلى وتكىزىلگەن ءۇشىنشى شەرۋ قازاقستان كونستيتۋتسياسىنىڭ 14 جىلدىعىنا ارنالدى. مۇندا قالىڭ كوپشىلىك 120 اسكەري تەحنيكانىڭ مۇمكىندىگى مەن قابىلەتىنە كۋا بولدى. اسكەري شەرۋگە مەملەكەت باسشىسى، جوعارعى باس قولباسشىسى نۇرسۇلتان نازارباەۆ قاتىستى. ال شەرۋگە قورعانىس ۆيتسە-ءمينيسترى، گەنەرال-مايور نۇرلان جولامانوۆ باسشىلىق ەتتى.

2011 جىلعى ءتورتىنشى شەرۋ ەل تاۋەلسىزدىگىنىڭ 20 جىلدىعىن اسپەتتەدى. «قازاق ەلى» مونۋمەنتى الدىندا وتكەن شەرۋدى العاش رەت ەل پرەزيدەنتى-قر قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ءوزى قابىلدادى. بۇل شەرۋ اسكەري قىزمەتكەرلەردىڭ تۇڭعىش رەت جاڭا اسكەري كيىم ۇلگىسىن كيىپ شىعۋىمەن، بۇرىن-سوڭدى كورسەتىلمەگەن جاڭا اسكەري تەحنيكانىڭ پاش ەتىلۋىمەن جانە شەرۋگە مەرگەندەر جاساعىنىڭ، قۇرلىق اسكەرلەرى تاۋلى-اتقىشتار بريگادا­سى­نىڭ سونىمەن قاتار ايەل اسكەري قىزمەتشىلەردىڭ قاتىسۋىمەن ەستە قالدى.

2013 جىلى جامبىل وبلىسىنداعى «وتار» 40-شى اسكەري بازاسىندا وتكەن جاۋىنگەرلىك شەرۋ بەسىنشى شەرۋ بولىپ تىركەلدى. ول وسىعان دەيىنگى جانە كەيىنگى شەرۋلەردەن ەرەكشە بولدى. سەبەبى بۇعان دەيىنگى جانە كەيىنگى شەرۋلەردىڭ  بارلىعى مەرەكەلىك داتالارعا ورايلاستىرىلسا، بۇل شەرۋ جاۋىنگەرلەردىڭ وزدەرىنە ارنالدى.

2014 جىلعى التىنشى اسكەري شەرۋ دە «قازاق ەلى» مونۋمەنتىنىڭ الدىندا ءوتتى. شەرۋدىڭ سالتاناتتى مارشىنىڭ جاياۋ لەگىنە 2 مىڭعا جۋىق اسكەري قىزمەتشى، 2500 اسكەري، 70 اۆياتسيالىق تەحنيكا قاتىستى.

2015 جىلى ۇيىمداستىرىلعان جەتىنشى شەرۋ جەڭىستىڭ 70 جىلدىعىنا ارنالدى. ول بۇعان دەيىنگى شەرۋلەردەن اۋقىمدىلىعىمەن جانە مازمۇنىمەن دارالاندى. شەرۋ تاريحي جانە زاماناۋي بولىمدەردەن تۇردى. تاريحي بولىمگە 1941-1945 جىل­دار­داعى سوعىس تەحنيكاسىنىڭ 36 ءتۇرى قاتى­سسا، زاماناۋي بولىمدە قازاق­ستان ارمياسىنىڭ قولدانىستاعى قارۋ-جاراعى مەن اسكەري تەحنيكاسى كورسەتىلدى.

2017 جىلى قر قارۋلى كۇشتەرىنىڭ 25 جىلدىعىنا ارنالىپ وتكىزىلگەن سەگىزىنشى اسكەري شەرۋگە 5 مىڭعا جۋىق اسكەري قىزمەتشى، 300-گە جۋىق اسكەري تەحنيكا جانە اسكەري اۆياتسيانىڭ 80 ۇشاعى مەن تىكۇشاعى قاتىستى. بۇل ەل تاريحىنداعى ەڭ ءىرى شەرۋ بولدى.

Abai.kz