پاۆلودار وبلىسىنىڭ اكىمى بولات باقاۋوۆتىڭ وتباسى جەلەزين اۋدانى جاڭا جۇلدىز اۋىلىنداعى ءوزى تۇلەپ ۇشقان التىن ۇيا مەكتەبىنە زاماناۋي مۇعالىمدەر ءوفيسىن تارتۋ ەتتى.

اتالعان ءىس-شارا رۋحاني جاڭعىرۋ باعدارلاماسىنىڭ «تۋعان جەر» باعىتى اياسىندا جۇزەگە استى..

ايتە كەتەيىك، اتالعان مەكتەپ «Teacher office» اشقان العاشقى پاۆلودار وبلىسىنىڭ اۋىلدىق وقۋ ورىندارىنىڭ ءبىرى اتاندى. جاڭا ۇلگىدەگى مۇعالىمدەر بولمەسىندە پەداگوگتاردىڭ ءتيىمدى جۇمىس جاساۋى ءۇشىن بارلىق جاعدايلار جاسالعان: جيھاز، جاڭا كومپيۋتەرلىك تەحنيكا، ساپالى ينتەرنەت جانە دەمالىس بۇرىشى. سونداي-اق، تۇلەكتەردىڭ مەرەيتوي كەشىنە كەلگەن اعايىندى جانە اپالى-ءسىڭىلى باقاۋوۆتار التىن ۇيا مەكتەبىنە 300 ءتۇپ قاراعايدان تۇراتىن شاعىن باق سىيلادى.

جاڭا جۇلدىز مەكتەبىنىڭ ءارتۇرلى جاستاعى تۇلەكتەردىڭ ساعىنىشتى كەزدەسۋى سىنىپ ساعاتىنان باستالدى. قاتىسۋشىلاردى بولات جۇمابەكۇلىنىڭ ءوز مۇعالىمىنە دەگەن جىلۋلىعى مەن ماحابباتىنىڭ قانشالىقتى بيىك ەكەنى ءتانتى ەتتى. ول كەزدەسۋگە الماتى قالاسىنان بايان قايىرگەلدىقىزىن ادەيى شاقىرعان. ءوڭىر باسشىسى قۇرمەت رەتىندە القاشقى ۇستازىنا گۇلدەر مەن سىيلىق تارتۋ ەتتى.

اۋىلدىق وقۋ ورىننىڭ وقۋشىلارى مەن مۇعالىمدەرىنە ارنالعان ءدارىس كەزىندە پاۆلودار وبلىسىنىڭ اكىمى بۇگىنگى كۇنى ۇلتتىق ءبىلىم بەرۋ جۇيەسى كوبىنەسە ۇستازداردىڭ دايارلىعىنا بايلانىستى ەكەنىن اتاپ ءوتتى. بولات جۇمابەكۇلى «بالالاردى زاماناۋي تەحنولوگيالارعا ۇيرەتۋ ءۇشىن مۇعالىمدەردىڭ وزدەرى وزگەرۋلەرى قاجەت، اقپاراتتى وڭدەۋدى ۇيرەنىپ، جاڭا باستامالارعا دايىن بولۋلارى ءتيىس. ءبىزدىڭ مىندەتىمىز – پەداگوگتار مەن وقۋشىلاردىڭ ناتيجەلى جۇمىسى ءۇشىن بارلىق جاعدايلار جاساۋ»، – دەپ اتاپ ءوتتى.

پاۆلودار وبلىسىنىڭ ءبىلىم بەرۋ باسقارماسىنىڭ باسشىسى ءدىنيسلام بولاتحانۇلى مەتسەناتتارعا پەداگوگتار مەن وقۋشىلار اتىنان العىس ايتتى: «ءبىز وسىنداي باعالى سىيلىققا وتە ريزامىز. بۇگىنگى كەزدەسۋ تۋعان ەلىنە دەگەن پاتريوتتىق سەزىمدى ءىس جۇزىندە دالەلدەۋدىڭ، اۋىلى مەن التىن ۇيا مەكتەبىنە قامقورلىق جاساۋدىڭ كەرەمەت ۇلگىسى بولىپ تابىلادى»، – دەدى.

ءوڭىر باسشىسىنىڭ بارلىق وقۋ ورىندارىنا مەملەكەتتىك تسيفرلاندىرۋ باعدارلاماسىن ەنگىزۋ ماسەلەسىندە پەداگوگتارعا ۇنەمى قولداۋ كورسەتەتىنىن اتاپ وتكەن ءجون. اعايىندى باقاۋوۆتار بىلىمگە جۇمسالعان قارجى – ەڭ ءتيىمدى ينۆەستيتسيا ەكەنىن تۇسىنە وتىرىپ، وزدەرىنىڭ جەكە قاراجاتتارىن دا ءبىلىم بەرۋگە ءبولىپ تۇرادى. وسىلايشا، 2017 جىلى «مەكتەبىمە تاعزىم» باعدارلاماسى اياسىندا ولار مەكتەپكە حوككەي كورتىن، فۋتبول الاڭىن، ترەناجەرلىك ايماق جانە ۆوركاۋت الاڭىن سىيعا تارتتى.

Abai.kz