ەۋرازيالىق ەكونوميكالىق وداقتا قازىر داعدارىس. وعان مۇشە مەملەكەتتەر نارازى. اسىرەسە، قازاقستان مەن بەلورۋسسيا. بەلگىلى ءبىر دەڭگەيدە بەلورۋسسياعا  ىمىراعا كەلۋ ءۇشىن رەسەيدەن اقشا مەن پرەفەرەنتسيا الۋ جەتكىلىكتى بولسا، بىزگە قارجىلاي كومەك پالەندەي كەرەك ەمەس. شىندىعىندا، قازىر ەۋرازيالىق ەكونوميكالىق وداقتىڭ ەكونوميكالىق پايداسىنان گورى زيانى باسىم بولىپ تۇر.

ارينە، رەسەيگە سالىنعان باتىس سانكتسيالارىنىڭ كەسىرى بىزگە دە تيەتىنى ءسوزسىز. ال بۇنداي شىعىنى كوپ ۇيىمنان بولىنەتىن كۇن قاشان تۋارى دا بەلگىسىز. وندا دا قاۋىپ بار. ول قاۋىپ – رەسەي بىزگە گيدريدتىك سوعىس جۇرگىزە مە؟ - دەگەن قاۋىپ.  تۇپ-تۋرا ۋكرايناداعى جاعداي قايتالانا ما؟ سوندىقتان ەكونوميكانى وزگە نارىققا باعىتتاۋ وڭاي جۇمىس ەمەس. ءبىز قالاي دەسەك تە، ەۋرازەو ىدىراۋعا شاق قالدى.

رەسەيدەگى قازىر داعدارىس ەلدىڭ  ەكونوميكاسى مەن كۇندەلىكتى تۇرمىسىن جايلاپ الدى.  ەندى تەك ساياسي داعدارىستىڭ باتپاعىنا باتۋ عانا قالدى. ال سول ساياسي داعدارىس بىزگە وتارشىلدىقتىڭ سوڭعى قامىتىن سىپىرىپ تاستاۋعا مۇمكىندىك بەرەر مە ەكەن؟ قۇداي بەتىن ءارى قىلسىن، بىزدەگى ورىسشىل از بۋىن قازاقستاندى ورىس ءتىلدى مەملەكەتكە اينالدىرىپ ۇلگەرمەسە، ارينە.

يرلانديا ەگەمەندىك العانىمەن اعىلشىن تىلىنە كوشىپ، يرلاند ءتىلىن قۇربان قىلدى. شوتلانديا ەليتاسى ەگەمەندىكتى اڭساعانىمەن، يرلاند حالقىنىڭ كوبىسى بريتانيا قۇرامىنان بولىنگىسى جوق. ويتكەنى، شوتلاندىقتاردىڭ باسىم كوپشىلىگى اعىلشىن ءتىلدى.

مەنىڭ شوتلانديالىق دوسىم ەگەمەندىك رەفەرەندۋمىن قولدامايدى. ءوزى تەك اعىلشىنشا سويلەيدى.  20-عاسىردىڭ ەكىنشى جارتىسىندا افريكانىڭ كوپتەگەن ەلدەرى اعىلشىن، فرانتسۋز تىلىنە وزدەرىنىڭ ءتول تىلدەرىن ايىرباستادى.

الجيردە 1962 جىلى ساياسي ەليتا مەن يستەبليشمەنت تەك فرانتسۋزشا سويلەپ، ارابشانى ۇمتقان بولاتىن. ولار ەكى رەت ارابيزاتسيا ساياساتىن باستادى.  اراب تىلىنە ءوتۋ ساياساتىن نەگىزىنەن حالىق قولدادى. بۇگىن دە، اراب قىزمەتكەرلەرى مەن ينتەلليگەنتسيا ءوزارا فرانتسۋز، اعىلشىن تىلدەرىندە سويلەسكەندى ءجون كورەدى. مەنىڭ ماۆريتانيالىق دوسىم: ارابشام ناشار، ديالەكتە سويلەيمىن، دەپ ارابشادان بەزەدى. «ارابشانى قايتەسىڭ، اعىلشىنشا سويلەسەيىك» دەيدى ماعان. بىزدە مىنە، وسىنداي قاتەلىكتەرگە جول بەرمەۋ ءۇشىن، ءارى وتارلىق، بوداندىق حالدەن ءبىرجولا قۇتىلۋ ءۇشىن تاۋەلسىزدىگىمىز بەن ءتىلىمىزدى ساقتاۋىمىز كەرەك!

ءازىمباي عالي

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە، مىنا پاراقشاعا جازىپ قالدىرىڭىز!

Abai.kz