قىتاي ۇكىمەتىنىڭ ونداعى از ۇلتتارعا اشىق جاساپ جاتقان ساياسي قۋدالاۋلارى جايلى باسپاسوزدە ءجيى ايتىلىپ كەلەدى. اسىرەسە، شىڭجاڭ ولكەسىندەگى قازاقتاردىڭ جەرگىلىكتى بيلىك تاراپىنان ءتۇرلى قىسىم كورىپ، قاماۋعا الىنىپ جاتقانى دالەلدەندى، بۇگىندە.

ساياسي قىسىم قىتايدا تۇراتىن قازاقتارعا عانا جاسالىپ جاتقان جوق. قازاقستانعا كەلىپ-كەتىپ جۇرگەن اعايىن دا، قازاقستان ازاماتتىعىن العان قازاقتار دا قۋعىن-سۇرگىنگە ۇشىراۋدا. ەكى ورتادا وتباسىلار اجىراپ قالىپ جاتىر. وكىنىشتى دەسەك تە، راس.

"Abai.kz" اقپاراتتىق پورتالىنا ۇلكەن ءۇمىت ارتىپ، دۇعاي-دۇعاي سالەمىن جولداپ جاتقان اعايىن ازايماي تۇر. سولاردىڭ ءبىرسىپىراسىن وتكەن جولى جاريالادىق.  ولاردىڭ جاعدايىمەن تولىق تانىسامىن دەسەڭىزدەر، مىنا سىلتەمەدەن قاراساڭىزدار بولادى.

بۇگىن اراشا سۇراعان اعايىننىڭ بىرنەشە بەينە حاتىن جاريالاعاندى ءجون كوردىك.

امەن سارينا

5 بالانىڭ اناسى. شىعىس قازاقستان وبلىسى، قالباتاۋ اۋىلىندا تۇرادى. جولداسى 2017 جىلدىڭ قىركۇيەك ايىنىڭ 20-كۇنى قىتايعا كەتكەن. سول جاقتا بەلگىسىز سەبەپتەرمەن ساقشىلار قۇجاتىن تارتىپ العان بولىپ شىقتى. 8 ايدان بەرى وتباسىنىڭ قامقورشىسىز وتىرعان كوپ بالالى انا ەرىكسىز كوزىنە جاس الىپ، جوعارى جاقتان كومەك سۇرادى.

مايرا ومىرزاققىزى

جولداسى قىتاي ەلىندە. ساياسي ۇيرەنۋ دەپ ۇستاپ اكەتكەن ەكەن. سودان بەرى، ەش حابار جوق.  ول قىتاي ازاماتى. سەبەبى، سول جاقتىڭ اۆتوبۋسىن وسكەمەنگە جەتكىزىپ جۇرگەن ەكەن.

ايقىنگۇل كادىرعازىقىزى

قاراعاندى وبلىسى، اباي اۋدانى، سارىاپتا اۋىلىنىڭ تۇرعىنى. 2 بالاسى بار. كۇيەۋىنىڭ قىتاي ەلىنە كەتكەنىنە 6 ايعا جۋىق ۋاقىت بولعان. كۇيەۋى ءىنىسىنىڭ ۇيىندە، قۇجاتتارىن تارتىپ العاندىقتان دا شاراسىز كۇيگە تۇسكەن.

ءلاززات قايسا

شىعىس قازاقستان وبلىسى، جارما اۋدانىندا تۇرادى. اتا-اناسى 2017 جىلى جەلتوقسان ايىنىڭ 8-ءى كۇنى ەمدەلۋگە كەتكەن ەكەن. سودان، ولاردىڭ قۇجاتتارىن تارتىپ الدى. جاستارى 70-گە تاياپ قالدى. اتا-اناسىنىڭ قىتاي ەلىندە جاتاتىن دا جەرلەرى جوق.

قابدە گۇلسارا

قازاقستان رەسپۋبليكاسىنىڭ ازاماتى. الماتى وبلىسى، اقسۋ اۋدانى، جانسۇگىروۆ اۋدانىنىڭ تۇرعىنى. 2017 جىلى قىتايعا جۇمىس بابىمەن كەتىپ، ءالى ورالماعان ەكەن. قۇجاتىن تارتىپ الىپ، قايتارماعان.

ءتۇيىن. ءبىز قازاقستان رەسپۋبليكاسىنىڭ سىرتقى ىستەر مينيسترلىگى اراشا سۇراعان اعايىننىڭ ماسەلەسىن باقىلاۋعا الىپ، ەكى ەل اراسىندا ورىن العان وسى كەلەڭسىزدىكتى ديپلوماتيالىق جولمەن شەشەدى دەپ سەنەمىز.

Abai.kz