پارلامەنت سەناتىنىڭ توراعاسى قاسىم-جومارت توقاەۆ XI استانا ەكونوميكالىق فورۋمىنا قاتىسۋ ءۇشىن قازاقستانعا ساپارلاپ كەلگەن گرۋزيانىڭ ۆيتسە-پرەمەر-ءمينيسترى، سىرتقى ىستەر ءمينيسترى ميحايل دجانەليدزەنى قابىلدادى.

ەلوردانىڭ قارقىندى دامۋىنا ريزاشىلىق بىلدىرگەن م.دجانەليدزە استانا ەكونوميكالىق فورۋمى جاھاندىق اۋقىمداعى وزەكتى ماسەلەلەر كوتەرىلەتىن حالىقارالىق الاڭعا اينالعانىن اتاپ ءوتتى.

ق.توقاەۆ مەملەكەت باسشىسى ن.نازارباەۆتىڭ باستاماسىمەن جۇزەگە اسىپ كەلە جاتقان ينستيتۋتتىق جانە الەۋمەتتىك رەفورمالار تۋرالى گرۋزين مەيمانىن حاباردار ەتتى.

تاراپتار ەكى ەلدىڭ جوعارى زاڭ شىعارۋ ورگاندارىنداعى ۇنقاتىسۋدى ورىستەتۋ ءۇشىن قۇرىلعان پارلامەنتارالىق ىنتىماقتاستىق توپتارىنىڭ الەۋەتىن بەلسەندى تۇردە پايدالانۋعا ۋاعدالاستى. «ءبىز وسى قاتىناستاردى دامىتۋعا جان-جاقتى جاردەمدەسەتىن بولامىز. سىزدەردىڭ تاجىريبەلەرىڭىز ءبىزدى قاتتى قىزىقتىرادى»، دەدى م. دجانەليدزە.

ق.توقاەۆ ەلدەردىڭ ترانزيتتىك الەۋەتىن ءتيىمدى پايدالانۋ ءۇشىن كۇش-جىگەردى بىرىكتىرۋ قاجەتتىگىن اتاپ ءوتتى. توراعا قازاقستان مەن گرۋزيا ازيا مەن ەۋروپا اراسىنداعى كولىك كوپىرىنە اينالاتىن قىتايدىڭ «ءبىر بەلدەۋ، ءبىر جول» جوباسىنىڭ كەلەشەگى زور دەپ سانايدى. «ءبىزدىڭ ەلدەرىمىز ترانسكاسپي حالىقارالىق كولىك باعدارى مەن باكۋ-تبيليسي-كارس جاڭا تەمىرجول جەلىسى اياسىندا ىنتىماقتاسىپ كەلەدى. لوگيستيكانىڭ جاقسارۋىنا بايلانىستى ساۋدانى دامىتۋ ءۇشىن قوسىمشا مۇمكىندىكتەر پايدا بولادى»، - دەدى ق.توقاەۆ.

Abai.kz