باس پروكۋراتۋراعا جەتس-ءتى جەتىلدىرۋ كەلىسىم-شارتىن دايىنداعان جانە نىساندى قابىلداپ العان مەملەكەتتىك قىزمەتكەرلەردىڭ ارەكەتىنە قۇقىقتىق باعا بەرۋ تاپسىرىلدى. باس پروكۋراتۋرا، ۇلتتىق قاۋىپسىزدىك مەملەكەتتىك كوميتەتى جانە ەسەپ پالاتاسى ءۇش ايدان سوڭ تەكسەرۋ بارىسى تۋرالى پارلامەنتكە ەسەپ بەرۋى ءتيىس.
پارلامەنت قاۋلىسىندا ەكس-پرەزيدەنت المازبەك اتامباەۆتىڭ جاۋاپكەرشىلىگىن قاراۋ تۋرالى تارماق بار. پارلامەنت وتىرىسىنداعى پىكىرتالاس كەزىندە دەپۋتات يسحاك ماساليەۆ ەلدە جاۋاپقا تارتۋعا بولمايتىن ءبىر-اق ادام بارىن، ول – ەكس-پرەزيدەنت ەكەنىن مالىمدەدى.
"ەگەر مەن ەكس-پرەزيدەنتتى جاۋاپقا تارتۋ كەرەك دەسەم، ونى جاۋاپقا تارتادى دەگەندى بىلدىرمەيدى. مەن زاڭدى وزگەرتۋدى ۇسىنامىن. قازىرگى پرەزيدەنتتى يمپيچمەنت ارقىلى جاۋاپقا تارتۋعا بولادى، دەپۋتاتتى دا جاۋاپقا تارتۋعا بولادى. بىراق ەكس-پرەزيدەنتتى ەشكىم ەشقاشان جاۋاپقا تارتا المايدى. قىرعىزستاندا جالعىز ادام عانا جازاعا تارتىلمايتىنىنىڭ ءوزى كونستيتۋتسياعا قايشى كەلەدى. اتا زاڭنىڭ ءبىرىنشى بابىندا زاڭ الدىندا بارلىعى تەڭ دەلىنگەن. ءبىز ەكس-پرەزيدەنتتىڭ وسى ءىس بويىنشا جاۋاپكەرشىلىگىن قاراستىرۋىمىز كەرەك", - دەدى ماساليەۆ.
2017 جىلى قىتايلىق تۆەا كومپانياسى بىشكەك جەتس-ءىن 386 ملن دوللارعا جەتىلدىرۋ جۇمىسىن اياقتادى، قاراجاتتى قىتايدىڭ ەكسيمبانكى نەسيە تۇرىندە بولگەن.
2018 جىلى 26 قاڭتاردا جەتس-تە اپات بولىپ، استانالىقتار ءبىر اپتا جىلۋسىز قالدى. باس پروكۋراتۋرا قىلمىستىق ءىس قوزعادى، ەنەرگەتيكا سەكتورىنىڭ بىرنەشە باسشىسى ۇستالدى. پارلامەنت اپات سەبەپتەرى مەن جەتس-ءتى جەتىلدىرۋگە بولىنگەن قاراجاتتىڭ جۇمسالۋىن تەكسەرۋ جونىندە دەپۋتاتتىق كوميسسيا قۇردى. قىتايدان نەسيە الۋ تۋرالى كەلىسىمگە قول قويعانداردىڭ اراسىندا بۇرىنعى ۇكىمەت باسشىلارى مەن مينيسترلەر - بارلىعى 30 ادامنىڭ اتى-ءجونى بار.
Abai.kz
