تەرگەۋ كەزىندە زاڭ بۇزۋشىلىقتاردىڭ كوپ بولعانىن ايتقان قادىروۆتىڭ ادۆوكاتى جۇماباي ارىستانوۆ اپەللياتسيالىق شاعىم تۇسىرەتىنىن ايتىپ وتىر.

- ءبىز تەرگەۋ كەزىندەگى زاڭسىزدىقتار تۋرال سوت پروتسەسى بارىسىندا بىرنەشە ءوتىنىش كەلتىردىك. سۋديا ونى كەڭەسۋ بولمەسىندە قاراپ شىققان بولسا كەرەك. ۇكىمنىڭ تولىق نۇسقاسى ءالى قولىمىزعا تيمەگەندىكتەن وتىنىشتەرىمىزگە قاتىستى سۋديانىڭ جاۋابىن بىلە الماي وتىرمىز. قالاي بولعاندا دا، سوت ۇكىمىنە رازى ەمەسپىز.ۇكىمدى قولىمىزعا العاننان كەيىن اپەللياتسيالىق شاعىم تۇسىرمەك ويىمىز بار، - دەيدى جۇماباي ارىستانوۆ.

2017 جىلى تامىزدا قازاقستان باس پروكۋراتۋراسى اقتوبە پروكۋراتۋراسىنىڭ بىرقاتار وكىلدەرىنىڭ ۇستىنەن “قىزمەتىنە سالعىرت قاراعانى” ءۇشىن ءىس قوزعاعان. بۇل ءىس بويىنشا تەرگەۋ امالدارىن جۇرگىزۋ اتىراۋ وبلىسىنىڭ ارنايى پروكۋرورىنا تاپسىرىلعانى حابارلاندى.

ءىس ماتەريالدارىنا سايكەس، قارعالى اۋدانىنىڭ پروكۋرورى مىندەتىن اتقارعان ەسەنتۋر قادىروۆ باس پروكۋراتۋرانىڭ تەرگەۋ توبىنا “قىلمىستىق جاۋاپكەرشىلىكتەن قاشۋ ءۇشىن” پارا بەرۋگە تىرىسقان. ەسەنتۋر قادىروۆ وزىنە تاعىلعان ايىپپەن كەلىسپەيدى.

بۇل ءىس بويىنشا سوت پروتسەسى ءساۋىر ايىنىڭ باسىندا باستالعان.

وسىعان دەيىن ۇيقاماقتا بولىپ، بۇگىن سوت زالىنان قاماۋعا الىنعان 36 جاستاعى ەسەنتۋر كادىروۆ سوت ۇكىمىنە ساي ەندى ەشقاشان مەملەكەتتىك قىزمەتپەن اينالىسا المايدى. سونداي-اق، كىشى ادىلەت كەڭەسشىسى اتاعىنان دا ايىرىلدى.

Abai.kz