پارلامەنت سەناتىنىڭ توراعاسى قاسىم-جومارت توقاەۆ بىرىككەن اراب امىرلىكتەرى ۇلتتىق فەدەرالدىق ءماجىلىسىنىڭ دەپۋتاتى، تولەرانتتىق جانە بەيبىتشىلىك جونىندەگى جاھاندىق كەڭەستىڭ توراعاسى احمەد بەن مۇحاممەد ءال-دجارۆاندى قابىلدادى.

ق.توقاەۆ قازاقستاننىڭ بىرىككەن اراب امىرلىكتەرىمەن ىنتىماقتاستىعىنىڭ جوعارى قارقىنىنا توقتالا كەلىپ، وعان مەملەكەتتەر باسشىلارىنىڭ اراسىنداعى ءوزارا سەنىمدى قاتىناستار تىكەلەي ىقپال ەتىپ وتىرعانىن اتاپ ءوتتى.

سەنات توراعاسى الەمدىك جانە ءداستۇرلى دىندەر ليدەرلەرىنىڭ سەزىن شاقىرۋ تۋرالى پرەزيدەنت نۇرسۇلتان نازارباەۆتىڭ باستاماسىنىڭ ىسكە اسۋى تۋرالى مەيمانعا اڭگىمەلەپ بەردى. «ءدىني كوشباسشىلار، مەملەكەت باسشىلارى مەن ءىرى حالىقارالىق ۇيىمداردىڭ جەتەكشىلەرى، تانىمال ساياساتكەرلەر قاتىساتىن بۇل فورۋم جاھاندىق ماسەلەلەردى شەشۋ جولدارىن ىزدەستىرەتىن، تولەرانتتىق پەن ءوزارا تۇسىنىستىك قاعيدالارىن نىعايتاتىن ەرەكشە الاڭ بولىپ وتىر»، - دەپ اتاپ ءوتتى ق. توقاەۆ.

احمەد بەن مۇحاممەد ءال-دجارۆان الەمدىك دىندەر وكىلدەرىنىڭ اراسىنداعى ءوزارا تۇسىنىستىكتى نىعايتۋدى، ايماقتىق جانە حالىقارالىق تۇراقتىلىققا جاردەمدەسۋدى ماقسات ەتەتىن جاھاندىق تولەرانتتىق جانە بەيبىتشىلىك كەڭەسىنىڭ جۇمىسى باستالعانى تۋرالى حاباردار ەتتى.

پارلامەنت جوعارعى پالاتاسىنىڭ باسشىسى دىنارالىق ۇنقاتىسۋ سالاسىنداعى قازاقستان باستاماسىمەن ۇيلەسەتىن كەڭەستىڭ قۇرىلۋىنا قولداۋ ءبىلدىردى. ق.توقاەۆتىڭ پىكىرىنشە، سەزد حاتشىلىعى مەن جاھاندىق كەڭەس دىنارالىق ۇنقاتىسۋدى، ءوزارا تولەرانتتىقتى، بەيبىتشىلىك پەن قاۋىپسىزدىكتى ىلگەرىلەتۋ جانە نىعايتۋ ماقساتىندا ارىپتەستىك قاتىناستاردى ورنىقتىرا الادى. امىرلىك پارلامەنتشىسى ۇسىنىستىڭ كەلەشەگى زور ەكەنىن ايتا وتىرىپ، كەلىسەتىنىن جەتكىزدى.

ق. توقاەۆ احمەد بەن مۇحاممەد ءال-دجارۆاندى قازان ايىندا قازاقستان استاناسىندا وتەتىن الەمدىك جانە ءداستۇرلى دىندەر ليدەرلەرىنىڭ VI سەزىنە كەلىپ قاتىسۋعا شاقىردى.

Abai.kz