قازىرگى تاڭدا كوپتەگەن اتا-انالار بالالارىن مەكتەپ جاسىنان  باستاپ ءتۇرلى اعىلشىن ءتىلىنىڭ كۋرستارىنا بەرىپ، زامان تالابىنان قالماۋعا تىرىسۋدا. باسەكە ارتقان سايىن، ءتىلدى مەڭگەرىپ جاتقان جاستاردىڭ قاتارى ارتۋدا. الايدا، كۋرستارعا بارۋعا جاعدايى كەلە بەرمەيتىن، اۋىلدىق ەلدى-مەكەندەردە كوپتەگەن مۇمكىندىكتەردەن تىس قالاتىن جاس تالاپكەرلەر ءۇشىن اعىلشىن ءتىلىن ءوز بەتتەرىنشە ۇيرەنۋدەن باسقا امال دا قالمايدى. ەندەشە، اعىلشىن ءتىلىن مەڭگەرۋدىڭ جولدارىن بىرگە قاراستىرايىق. ارينە، بۇل اقىل-كەڭەس مەنىڭ ءتىل ۇيرەنۋ بارىسىندا 2 جىلداي جۇزەگە اسىرعان ءىس-ارەكەتتەرىم جانە كوبىنىڭ پايداسى نەمەسە ەش ناتيجەسى بولماي دا قالۋى مۇمكىن.

بىرىنشىدەن، ءسىزدىڭ سول ءتىلدى مەڭگەرۋگە دەگەن ەرەكشە قۇشتارلىعىڭىز بولۋ كەرەك. ءوز-ءوزىڭىدى ماجبۇرلەپ نەمەسە باعا ءۇشىن دەپ ەشتەنە ۇيرەنە الماسىڭىز انىق. ەگەر، ۋاقىتشا جاتتاپ عانا جۇرسەڭىز، ونىڭ ەشقايسىسى ۇزاققا بارمايتىن بولادى. دەمەك، ادامنىڭ ماقساتى ايقىن بولعان سايىن، وعان جاسايتىن قادامدارى دا ناتيجە بەرە باستايتىن بولادى. سوندىقتان، ماقساتىڭىزدى ايقىنداي وتىرىپ، ەرەكشە تالپىنىس ءبىلدىرۋ كەرەكسىز.

ەكىنشىدەن، ءبارىن بىردەن تەز ۇيرەنىپ الۋعا اسىقپاۋ كەرەك. ءبىر ۋاقىتتا ەرەجەنى، سوزدەردى قاتار الىپ جاتتاۋعا دا بولمايدى. جۇيەل كەستە قۇرۋ ارقىلى، بارلىعىنا ارنايى ۋاقىت قاراستىرىپ داعدىلانىڭىز. ناتيجە تەز بولا قالسا ەكەن دەپ اسىعىستىق تانىتاتىن جاعدايلار دا بولادى. الايدا، ءتىل ۇيرەنۋ بارىسىندا سابىرلىق تانىتۋدىڭ ۇلكەن ءمانىسى بار.

ۇشىنشىدەن، كۇندەلىكتى دايىندىق قاجەت. ۋاقىتىڭىز مۇلدە بولماي جاتقاننىڭ وزىندە، كەمىندە 20 مينۋتىڭىزدى ءبولىپ، ەسكە ءتۇسىرىپ وتىرۋ كەرەك. كۇن سايىن 1 ءسوز جاتتاپ الساڭىزدا نەمەسە 1 بەت ەرتەگى وقىپ شىقساڭىزدا ۇلكەن پايداسىن بەرەتىن بولادى.

تورتىنشىدەن، ءسوز جاتتاۋ بارىسىندا سوزدەردى جەكە-جەكە جاتتاۋعا تىرىسپاڭىز. ءار سوزبەن بىرگە سويلەم قۇراستىرۋ ارقىلى ەستە ساقتايتىن بولاسىز. ارينە، قانشالىقتى كوپ ءسوز بىلەسىز، ءتىل مەڭگەرۋ مۇمكىندىگى سول دارەجەدە ارتا تۇسەدى. بىراق، سوزدەردى جاتتاۋدىڭ ءوز ادىستەرى بولاتىنىن ۇمىتپاڭىز.

بەسىنشىدەن، شاعىن كىتاپشالار جانە فيلمدەردىڭ كومەگى زور. الايدا، كورەتىن ءفيلمىڭىز سىزگە قىزىعۋشىلىق تۋدىرۋ كەرەك. العاشقى دا ەشنارسە تۇسىنبەۋىڭىز مۇمكىن. بىراق، كوپ كورگەن سايىن قۇلاعىڭىزدا ۇيرەنە باستاۋ ارقىلى سول ءتىلدى ۇيرەنۋگە كەڭىرەك جول اشاسىز. ەستە ساقتايتىن نارسە، نە كورسەڭىزدە استىندا اۋدارماسىمەن قاراماڭىز. بۇل ءسىزدىڭ ۋاقىتىڭىزدى ولتىرەدى جانە ەشقانداي ناتيجە بەرمەيدى.

قاي جەردە جۇرسەڭىز دە اعىلشىن تىلىندە راديوسى تىڭداپ، ءوزىڭىز جاقسى كورەتىن اندەردى اۋدارماسىمەن جاتتاپ ءجۇرىڭىز. راديو تىڭداۋ ارقىلى بەلگىلى ءبىر داعدىعا تۇسەسىز.

قازىر ينتەرنەتتى اشىپ قالساڭىز بولدى، اعىلشىن ءتىلىن ۇيرەتۋگە ارنالعان ءتۇرلى كۋرستاردان كوز سۇرىنەدى. ارينە، ولاردىڭ كوپ بولعانى دۇرىس-اۋ، ەگەر سول سىزگە ناقتى ناتيجە بەرە بىلەتىن بولسا. بىراق، بارلىعى ءسىزدىڭ وزىڭىزگە بايلانىستى. قانشاما اقشانىڭ باسىنا سۋ قۇيىپ، جىلداپ كۋرستارعا بارعانمەن ءالى كۇنگە ناتيجە الا الماي جۇرگەن تانىستارىمدى بىلەمىن. سول ءۇشىن دە جوعارىداعى شاعىن كەڭەستەردى ايتىپ  وتىرمىن. ارينە، اعىلشىن ءتىلىن وقۋدىڭ باستى جولى – تاجىربيە. ەشقاشان دا گرامماتيكا جاتتاپ، بار ۋاقىتىڭىزدى سوعان ولتىرمەڭىز. ونى تۇسىنبەگەندىكتەن دە ءوزىڭىزدى ءتىل ۇيرەنە المايتىنداي سەزىنەتىن بولاسىز. بۇل سىزدەگى قۇلشىنىستى وشىرەدى.

كوگەرشىن تىلەگەن

Abai.kz