قىرعىزستان باس پروكۋراتۋراسى وسى ەلدە ۇستالىپ، قازىر قىرعىزستان مەملەكەتتىك ۇلتتىق قاۋىپسىزدىك كوميتەتىنىڭ بىشكەكتەگى تەرگەۋ اباقتىسىندا قاماۋدا وتىرعان قازاقستاندىق بەلسەندى، بلوگەر مۇراتبەك تۇڭعىشباەۆتى قازاقستانعا بەرۋ تۋرالى شەشىم قابىلداعان. بۇل تۋرالى حابارلاعان ونىڭ ادۆوكاتى نۋربەك توكتاكۋنوۆ پروكۋراتۋرا قاۋلىسىن مامىردىڭ 23-ءى كۇنى العانىن ايتادى.

ادۆوكات توكتاكۋنوۆ باس پروكۋراتۋرانىڭ شەشىمىمەن كەلىسپەي، سوتقا شاعىمداناتىنىن ايتادى. زاڭ بويىنشا ونىڭ شاعىمدانۋعا 10 كۇن ۋاقىتى بار.

ءىس ماتەريالدارىمەن تانىسقان ادۆوكات نۋربەك توكتاكۋنوۆ قازاقستان بيلىگى مۇراتبەك تۇڭعشىباەۆقا قارسى قوزعاعان ءىستىڭ ساياسي استارى بار دەپ سانايدى. ادۆوكاتتىڭ مالىمدەۋىنشە، تۇڭعىشباەۆ قازاقستان بيلىگىن بەلسەندى تۇردە سىناعانى ءۇشىن قۋعىن كورىپ وتىر.

ونىڭ ايتۋىنشا، مامىردىڭ 15-ءى كۇنى مۇراتبەك تۇڭعىشباەۆ قىرعىزستاننىڭ كوشى-قون دەپارتامەنتىنە وزىنە ساياسي باسپانا بەرۋىن سۇراپ ءوتىنىش تۇسىرگەن.

مۇراتبەك تۇڭعىشباەۆتى قىرعىزستان ارنايى قىزمەتى وكىلدەرى مامىردىڭ 10-ى كۇنى بىشكەكتە، بەلسەندى سول كوزىنە وپەراتسيا جاساتقان كۇنى ۇستاعان. كەلەسى كۇنى بىشكەكتىڭ پەرۆوماي اۋداندىق سوتى مۇراتبەك تۇڭعىشباەۆتى ەكى ايعا قاماۋعا سانكتسيا بەرگەن.

تۋىستارى مەن ادۆوكاتىنىڭ ايتۋىنشا، قازاقستان بيلىگى مۇراتبەك تۇڭعىشباەۆقا قازىر ەۋروپادا تۇراتىن قازاقستاندىق ەكس-بانكير ءارى وپپوزيتسيالىق ساياساتكەر مۇحتار ءابليازوۆ قۇرعان "قازاقستاننىڭ دەموكراتيالىق تاڭداۋى" (قدت) قوزعالىسىن قولداعان دەگەن ايىپ تاعىپ وتىر. بيىل ناۋرىزدىڭ 13-ءى كۇنى استانانىڭ ەسىل اۋداندىق سوتى قدت قوزعالىسىن "ەكسترەميستىك ۇيىم" دەپ تانىپ، ەل اۋماعىندا قىزمەتىنە تىيىم سالعان.

Abai.kz