سەناتتا «بالىق شارۋاشىلىعىنداعى يننوۆاتسيالىق دامۋ پەرسپەكتيۆالارى جانە قازىرگى جاي-كۇيى، ەكسپورتقا باعىتتالعان ءونىم شىعارۋ ماسەلەسى» تاقىرىبى بويىنشا ەلىمىزدىڭ اۋىل شارۋاشىلىعى مينيسترلىگىنىڭ باسشىلىعىمەن كەزدەسۋ بولدى. بۇل تۋرالى سەناتتىڭ ءباسپاسوز قىزمەتى حابارلايدى.

شارانى سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ اشىپ، مەملەكەت باسشىسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» حالىققا جولداۋىندا اگرارلىق سەكتوردى ەكونوميكانىڭ جاڭا درايۆەرىنە اينالدىرۋ قاجەتتىگى تۋرالى ايتقانىن ەسكە سالدى. قازاقستان كوپتەگەن باعىتتار بويىنشا الەمدىك نارىقتاعى ءىرى ەكسپورتتاۋشى بولا الادى. ەڭ باستىسى «قازاقستاندا جاسالعان»-«Made in Kazakhstan» برەندىمەن شىعاتىن ءونىم ەكولوگيالىق تازا بولۋى ءتيىس. ەلىمىزدىڭ ەكونوميكالىق دامۋىندا ا. بەيسەنباەۆ ايتقانداي، بالىق شارۋاشىلىعى ەرەكشە ءرول اتقارا الادى. كەيىنگى كەزدە بۇل سالادا اۋقىمدى جۇماستار اتقارىلدى. سونىمەن بىرگە، سەناتور اتاپ وتكەندەي، بىرقاتار وزەكتى ماسەلەلەر دە بار. اتاپ ايتقاندا، سالانى دامىتۋ جونىندەگى باعدارلامالىق قۇجاتتىڭ جوقتىعى، بالىق ونىمدەرىنىڭ كوپتەگەن بولىگى كولەڭكەلى اينالىمعا كەتۋى، بالىق شارۋاشىلىعى سالاسىندا بىلىكتى مامانداردىڭ جەتىسپەۋشىلىگى ورىن الۋدا. سونداي-اق ينسپەكتورلار قۇرامى ەڭبەكاقىسىنىڭ تومەندىگى، الەۋمەتتىك جەڭىلدىكتەردىڭ جوقتىعى، ينسپەكتسيانىڭ ماتەريالدىق-تەحنيكالىق جابدىقتالۋىنىڭ تومەندىگى قيىندىق تۋعىزىپ وتىر. ا. بەيسەنباەۆ اتاپ وتكەندەي، شاراعا قاتىسۋشىلار وسى ماسەلەلەردى تالقىلاۋى ءتيىس.

اۋىل شارۋاشىلىعى ءمينيسترىنىڭ ورىنباسارى ەرلان نىسانباەۆ نەگىزگى بايانداما جاساپ، ەلىمىزدىڭ بالىق شارۋاشىلىعىنىڭ قازىرگى جاي-كۇيى مەن كەلەشەگى تۋرالى پارلامەنتشىلەردى حاباردار ەتتى. ول سالانىڭ دامۋىنا بولىنگەن قارجى كولەمى، بالىق ونىمدەرىنىڭ ەكسپورتى مەن يمپورتى، 2021 جىلعا دەيىنگى بالىق شارۋاشىلىعىن دامىتۋ بولجامدارى تۋرالى ايتتى. سالالىق مەكەمەنىڭ وكىلى بالىق شارۋاشىلىعىن مەملەكەتتىك قولداۋ مەن ەلىمىزدىڭ بىرقاتار ايماقتارىنداعى يننوۆاتسيالىق جوبالاردى ىسكە اسىرۋ جانە يننوۆاتسيالىق دامۋ شارالارىنا جان-جاقتى توقتالدى.

سەنات دەپۋتاتى سارسەنباي ەڭسەگەنوۆ بالىق شارۋاشىلىعىن قولداۋ جونىندەگى بىرقاتار سىن ەسكەرتپەلەر ايتىپ، ءوز ۇسىنىستارىن ورتاعا سالدى. سەناتور سالانى ءتيىمدى باسقارۋدىڭ ناشارلىعى تۋرالى ايتا كەلىپ، سالانىڭ ۋاكىلەتتى ورگانى – بالىق شارۋاشىلىعى جونىندەگى كوميتەتتى قۇرۋ تۋرالى ماسەلە كوتەردى. سونداي-اق بالىق شارۋاشىلىعى كاسىپورىندارىن مەملەكەتتىك قولداۋ شارالارىن جەتىلدىرۋ، ونىڭ ىشىندە ولاردىڭ ەكسپورتتىق مۇمكىندىكتەرىن ىنتالاندىرۋ تۋرالى دا ايتىلدى. س. ەڭسەگەنوۆ كاسپي تەڭىزىنىڭ بالىق رەسۋرستارىن يگەرۋگە كۆوتا ءبولۋ جۇيەسىن وزگەرتۋ جونىندەگى وزەكتى ماسەلەلەرگە دە توقتالدى.

شارا بارىسىندا ينۆەستيتسيالار جانە دامۋ مينيسترلىگى ينۆەستيتسيالار جونىندەگى كوميتەتى توراعاسىنىڭ ورىنباسارى لاريسا جۇماعاليەۆا، قازاق بالىق شارۋاشىلىعى عىلىمي-زەرتتەۋ ينستيتۋتىنىڭ باس ديرەكتورى قۋانىش يسبەكوۆ، «قازاق بالىق شارۋاشىلىعى» بالىقشىلارىنىڭ قوعامدىق بىرلەستىكتەرى مەن بالىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعى باسقارما توراعاسىنىڭ ورىنباسارى سەرىك تەمىرحانوۆ، «جايىق-اتىراۋ بەكىرە بالىق ءوسىرۋ زاۋىتى» رەسپۋبليكالىق مەملەكەتتىك قازىنالىق كاسىپورىنىنىڭ ديەكتورى گيلمان سارسەماليەۆ ءسوز سويلەدى.

كەزدەسۋگە قاتىسۋشىلار سوزدەرىنىڭ نەگىزىندە بالىق شارۋاشىلىعىن رەتتەيتىن زاڭنامانى جەتىلدىرۋ جانە ءتيىستى مەملەكەتتىك ورگانداردىڭ  شارالار قابىلداۋى جونىندە ۇسىنىستار قابىلداناتىن بولدى. سالانى دامىتۋ جونىندەگى قادامداردىڭ ءبىرى رەتىندە «بيولوگيالىق رەسۋرستاردى ساقتاۋ جانە ورنىقتى پايدالانۋ» ارنايى سالالىق باعدارلاماسىن ازىرلەۋ جانە ونى بەكىتۋ تۋرالى ۇسىنىس جاسالدى.

Abai.kz