ءCىم قىتايدا ۇستالعان قازاقتاردى بوساتۋدى سۇرادى
وتكەن اپتادا بەيجىڭدە كونسۋلدىق ماسەلەلەر جونىندەگى كەزەكتى قازاقستان-قىتاي كونسۋلتاتسيالارى ءوتتى، دەپ حابارلادى قر سىرتقى ىستەر مينيسترلىگى.
قازاقستان دەلەگاتسياسىن سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى ارداق ماديەۆ، ال قىتاي دەلەگاتسياسىن سىرتقى ىستەر مينيسترلىگى كونسۋلدىق دەپارتامەنتىنىڭ ديرەكتورى گو شاوچۋن باسقاردى.
تاراپتار كونسۋلدىق سالاداعى ەكىجاقتى ىنتىماقتاستىقتىڭ، ەكى ەلدىڭ ازاماتتارىنىڭ قۇقىقتارى مەن مۇددەلەرىن قورعاۋدىڭ، سونداي-اق قازاقستان مەن قىتاي تۇرعىندارىنىڭ ءوزارا ساپارلارىنىڭ وزەكتى ماسەلەلەرى بويىنشا تولىققاندى كەلىسسوزدەر جۇرگىزدى.
قازاقستاندىق تاراپ قىتايدان قازاقستانعا قونىس اۋدارعان جانە قازاقستان رەسپۋبليكاسىنىڭ ازاماتتىعىن العان ەتنيكالىق قازاقتاردىڭ جاعدايىنا قاتىستى ماسەلەنى قوزعادى.
قىتايدا قوس ازاماتتىق ءۇشىن ۇستالعان ەتنيكالىق قازاقتاردىڭ ىستەرىن وبەكتيۆتى جانە ءادىل قاراۋ مەن ولاردى بوساتۋ تۋرالى تاباندى تىلەك ايتىلدى. قىتايدىڭ شىڭجاڭ-ۇيعىر اۆتونوميالىق ايماعىنداعى ەتنيكالىق قازاقتاردىڭ ماسەلەلەرىن شەشۋدىڭ ورتاق امالىن ويلاستىرۋعا ۋاعدالاستى.
سونىمەن قاتار، كەزدەسۋ بارىسىندا ەلدەر اراسىنداعى ۆيزالىق رەجيمدى جەڭىلدەتۋ ماسەلەلەرى تالقىلاندى. تاراپتار ەكى ەلدىڭ حالىقارالىق اۋەجايلارىندا قازاقستان جانە قىتاي ازاماتتارىنىڭ كەلۋ/كەتۋ جانە ترانزيتپەن ءوتۋ ءتارتىبى تۋرالى اقپارات الماستى.
ۆيزالىق ساياسات سالاسىندا تۋىندايتىن ماسەلەلەردىڭ تەحنيكالىق سيپاتىن ەسكەرە وتىرىپ، تاراپتار ەكى ەل ازاماتتارىنىڭ ءوزارا ساپارلارى ءۇشىن قولايلى جاعداي جاساۋعا دايىن ەكەنىن ءبىلدىردى، سونداي-اق تۇراقتى كونسۋلتاتسيالاردى ودان ءارى جالعاستىرۋعا كەلىستى.
اbai.kz
